ភ្នំពេញ ៖ លោកជំទាវ កិត្តិសង្គហបណ្ឌិតម៉ែន សំអនឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភានិងអធិការកិច្ច បានសម្ដែងនូវការគាំទ្រយ៉ាងពេញទំហឹងចំពោះក្រុមហ៊ុនឯកជនទាំងអស់ ដែលបានមកបណ្ដាក់ទន់វិនិយោគនៅប្រទេសកម្ពុជា ដោយសារតែរាជរដ្ឋាភិបាលធានាទាំងស្រុងនូវសន្តិសុខនិងប្រព័ន្ធច្បាប់។
លោកជំទាវកិត្តិសង្គហបណ្ឌិតថ្លែងបែបនេះ ខណៈអញ្ជើញជាអធិបតីក្នុងឱកាសសម្ពោធក្រុមហ៊ុន ចេង ហ៊្វុង អិនវេសម៉ិនសណ្ឋាគារសូហ្វីតែល ភ្នំពេញនាល្ងាចថ្ងៃពុធ១រោច ខែជេស្ន ឆ្នាំចសំរិទ្ធស័ក ព.ស២៥៦២ត្រូវនឹងថ្ងៃទី៣០ ខែឧសភា ឆ្នាំ២០១៨។
លោកជំទាវកិត្តិសង្គហបណ្ឌិតម៉ែនសំអន សង្ឃឹមយ៉ាង មុតមាំថា ក្រុមហ៊ុននេះ នឹង រួមចំណែក អភិវឌ្ឍព្រះរាជាណាចក្រកម្ពុជា តាមរយៈការផ្តល់ប្រឹក្សា រកដៃគូ និងណែនាំ ជូនអ្នកវិនិយោគ ទាំងក្នុងស្រុក និងក្រៅស្រុក ឲ្យចាប់ផ្តើមធ្វើអាជីវកម្មដោយជោគជ័យ លើវិស័យ ជាច្រើនដែលមានសក្កានុពលនៅកម្ពុជា ជាពិសេស វិស័យអចលនទ្រព្យ ហិរញ្ញវត្ថុ និងទេសចរណ៍។
លើសពីនេះទៀត ក្រុមហ៊ុន មិនត្រឹមតែជួយទាក់ទាញ ទុនវិនិយោគ ពីបរទេស និងទាក់ទាញ ទេសចរ មកទស្សនាកម្ពុជា ប៉ុណ្ណោះទេ តែថែមទាំងជួយ បង្កើនទំនាក់ទំនងសេដ្ឋកិច្ច និងពាណិជ្ជកម្ម រវាង កម្ពុជា និងប្រទេសជាច្រើន ជាពិសេសប្រទេសចិន ឲ្យកាន់តែរឹងមាំថែម ទៀត។
ក្រុមហ៊ុនថ្មីនេះ ត្រូវបានបង្កើត ឡើងចំពេល ដែល ព្រះរាជាណាចក្រ កម្ពុជា កំពុងតែមានការទាក់ទាញ ផ្នែកពាណិជ្ជកម្ម និងវិនិយោគផ្ទាល់ពីបរទេស ដោយសារប្រទេសនេះ មានស្ថិរភាពនយោបាយល្អ ស្ថានភាព ផ្នែក សេដ្ឋកិច្ចរស់រវើក និងមានគោលនយោបាយ គាំទ្រ ដល់អាជីវកម្មឯកជន។
ម្យ៉ាងទៀត ការបង្កើត ទីស្នាក់ការក្រុមហ៊ុនថ្មី នៅរាជធានីភ្នំពេញពិត ជាជំរើសដ៏ត្រឹមត្រូវណាស់ ព្រោះរាជធានីភ្នំពេញជាបេះដូង ជាមជ្ឈមណ្ឌល នយោបាយ សេដ្ឋកិច្ច និងពាណិជ្ជកម្ម នៃព្រះរាជាណាចក្រកម្ពុជា ដែល ជាទីតាំង យុទ្ធសាស្ត្រ ដ៏ល្អសម្រាប់ការ ស្នាក់នៅ និងធ្វើការតាមបែបទំនើប ជាពិសេសសម្រាប់ ជនបរទេស។
ក្រោមការ ដឹកនាំ ប្រកប ដោយកិត្ដិបណ្ឌិត និងភាពភ្លឺស្វាង វាងវៃ របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃរាជរដ្ឋាភិបាល កម្ពុជាហើយបច្ចុប្បន្ន នេះកម្ពុជា ទទួល បាន នូវស្ថិរភាព សន្ដិសុខ និង សន្តិភាព ពេញផ្ទៃប្រទេសការអភិវឌ្ឍន៍លើគ្រប់វិស័យ ជាពិសេស វិស័យវិនិយោគ ពាណិជ្ជកម្ម និងទេសចរណ៍។
ក្នុងរយៈ ពេលប៉ុន្មានឆ្នាំ ចុងក្រោយនេះប្រទេសកម្ពុជាមាន កំណើនសេដ្ឋកិច្ចជាមធ្យម ប្រមាណ៧ភាគរយជាប់ៗ គ្នា ដែលនាំឲ្យចំណូលរបស់ ប្រជាជន យើងមានការកើន ឡើង និងមានជីវភាពកាន់តែធូរធារផងដែរ។
ដោយឡែករាជធានីភ្នំពេញ កំពុងតែរីកលូតលាស់ ក្លាយទៅ ជាមជ្ឈមណ្ឌល ពាណិជ្ជកម្មមួយដ៏ទាក់ទាញ និងរស់រវើកដែលមានសកម្មភាព អាជីវកម្ម យ៉ាង មមាញឹក។ ជាក់ស្តែង យើងឃើញច្បាស់នឹងភ្នែកស្រាប់ មានរមណីយដ្ឋាន សណ្ឋាគារ ភោជនីយដ្ឋាន ហាងលក់ទំនិញគ្រប់មុខ ផ្សារទំនើប សំណង់ ធំៗ ជាពិសេស អគារ ខ្ពស់ៗ បុរីគេហដ្ឋានថ្មីៗ ជាច្រើន កំពុងតែត្រូវបាន សាងសង់ និង រីកដុះដាលដូចផ្សិតបម្រើ ដល់ ការរកស៊ី ស្នាក់នៅ និងធ្វើការងារ ប្រកបដោយផាសុកភាព។
ដោយ រាជរដ្ឋាភិបាល មានគោលនយោបាយ ចាត់ទុកវិស័យឯកជន ជាក្បាលម៉ាស៊ីនរុញកំណើន សេដ្ឋកិច្ច និងការស្វាគមន៍យ៉ាងកក់ក្តៅដល់អ្នកវិនិយោគបរទេស ដោយគ្មានប្រកាន់ជាតិសាសន៍ និងកត្តា អំណោយផល ផ្សេងទៀត រួមទាំងការលូតលាស់ ផ្នែកសេដ្ឋកិច្ចយ៉ាងលឿន ជាពិសេសខាង ពាណិជ្ជកម្ម សំណង់ ទេសចរណ៍ ហិរញ្ញវត្ថុ ទីផ្សារ ពលករ មានតម្លៃទាប និងច្បាប់ វិនិយោគដែល អនុគ្រោះដល់ធុរកិច្ច ទើប កម្ពុជា កំពុងតែក្លាយ ជា គោលដៅថ្មីមួយ គួរឲ្យចាប់អារម្មណ៍បំផុត ពី អ្នកវិនិយោគក្នុង ស្រុក និងបរទេស។
ក្នុងនាមរាជរដ្ឋាភិបាលកម្ពុជាលោកជំទាវកិត្តិសង្គហបណ្ឌិត ថ្លែងនូវការលើកទឹកចិត្តឲ្យក្រុមហ៊ុន ធ្វើសកម្មភាពរបស់ខ្លួនដោយរលូន និងបំពេញបេសកកម្ម និងសកម្មភាព ប្រកបដោយការយកចិត្តទុកដាក់ និងសូមគោរពទៅតាម ច្បាប់ និងលិខិតបទដ្ឋានគតិយុត្តិ ជាធរមាន របស់ព្រះរាជាណាចក្រកម្ពុជា។
ជាទីបញ្ចប់ លោកជំទាវកិត្តិសង្គហបណ្ឌិតបានជូនពរ ដល់ក្រុមហ៊ុន ចេង ហ៊្វុង អិនវេសម៉ិន ទទួលបាននូវជោគជ័យក្នុងភារកិច្ចរបស់ខ្លួនក្នុងការវិនិយោគនៅកម្ពុជា៕
Source: Kampuchea Thmey Daily
0 Comments