កីឡាករជនជាតិនីហ្សេរីយ៉ា Oiboh Julius សមាជិកក្លិបជើងឯកឆ្នាំចាស់បឹងកេតអែហ្វស៊ី ដែលធ្លាប់ឈ្នះស្បែកជើងមាសកាលពីឆ្នាំ២០១១ កន្លងទៅនៅលីគកំពូលកម្ពុជា នៅពេលនេះកំពុងតែឈរកំពូងតារាងអ្នករកគ្រាប់បាល់បញ្ចូលទីបានច្រើនជាងគេគឺចំនួន៨គ្រាប់ម្នាក់ឯងគិតត្រឹមប្រចាំសប្ដាហ៍ទី៧ នៃពានរង្វាន់ជម្រើសជើងឯកជាតិ (Metfone Cambodian League 2018)។
កីឡាករ Oiboh Julius ធ្លាប់បានឈ្នះស្បែកជើងមាសកាលពីឆ្នាំ២០១១ អំឡុងពេលដែលរូបគេនៅជាសមាជិកក្នុងក្រុមណាហ្គាវើល ក្រោយរកបានគ្រាប់បាល់២៨គ្រាប់ម្នាក់ឯង។ ក្រោយឈ្នះស្បែកជើងមាសនៅកម្ពុជា រូបគេបានផ្លាស់ទៅលេងនៅប្រទេសថៃចាប់ពីឆ្នាំ២០១៣ ដល់២០១៦ មុនមកជូនបឹងកេតអែហ្វស៊ី នៅចុងឆ្នាំ២០១៦ ខណៈនៅដើមឆ្នាំរូបគេផ្លាស់ទៅលេងក្លិប Pahang FA នៅប្រទេសម៉ាឡេស៊ី ហើយជើងទី២ផ្លាស់ទៅលេងក្នុងក្លិប Navy FC នៅប្រទេសថៃ មុនត្រឡប់មកកម្ពុជាវិញនៅដើមឆ្នាំ២០១៨នេះ។
សរុបប្រកួតត្រឹម៧សប្តាហ៍មកនេះ ក្រុមសមាជិកទាំង១២អាចទាត់បញ្ចូលទីគ្នាបាន១៤១គ្រាប់។ ចំណែក៨ គ្រាប់របស់កីឡាករ Oiboh Julius បានទាត់បញ្ចូលទីអាស៊ីអឺរ៉ុប ៣គ្រាប់ អគ្គស្នងការដ្ឋាននគរបាលជាតិ១គ្រាប់ វេស្ទើនភ្នំពេញ ១គ្រាប់ ក្រសួងការពារជាតិ១គ្រាប់ ព្រះខ័នរាជស្វាយរៀង ១គ្រាប់ និងអគ្គីសនីកម្ពុជា១គ្រាប់។ ក្រៅពីកីឡាករនីហ្សេរីយ៉ា រូបនេះគេសង្កេតឃើញកីឡាករកាម៉េរ៉ូនBefolo Mbarga របស់ក្រុមអាស៊ីអឺរ៉ុប និងកីឡាករនីហ្សេរីយ៉ា Bisan George របស់ណាហ្គាវើល រកបានម្នាក់៦គ្រាប់តាមពីក្រោយ ខណៈបរទេស៤នាក់ផ្សេងទៀតតាមពីក្រោយដែលរកបាន៥គ្រាប់ម្នាក់គឺកីឡាករ Cheo Myong Ho ជនជាតិកូរ៉េខាងជើង របស់ក្រុមវិសាខា ហើយកីឡាករNo Daeho ជនជាតិកូរ៉េខាងត្បូង របស់ក្រុមអគ្គស្នងការដ្ឋាននគរបាលជាតិ កីឡាករ នីហ្សរីយ៉ា Bata របស់សូលទីឡូអង្គរ និងកីឡាករ Maycon ជនជាតិប្រេស៊ីល របស់បឹងកេត។ ក្រៅពីនោះសុទ្ធតែអ្នករកគ្រាប់បាល់បានម្នាក់៤គ្រាប់ចុះក្រោម។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងដើម្បីស្វែងរកក្រុមខ្លាំង ដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម។
តាមគម្រោងក្រោយបញ្ចប់រដូវកាលឆ្នាំ២០១៨ នេះទៅកីឡាករដែលរកគ្រាប់បាល់ច្រើនជាងគេបង្អស់ នោះគណៈកម្មការរៀបចំការប្រកួតនឹងប្រគល់ពានរង្វាន់ (ឬហៅថាស្បែកជើងមាស) ព្រមទាំងថវិកាលើកទឹកចិត្តចំនួន១.៥០០,០០០៛។ កីឡាករជនជាតិរ្វ៉ាន់ដា Autheire Kipson អតីតសមាជិកនៅក្លិបណាហ្គាវើល ជាម្ចាស់ស្បែកជើងមាសឆ្នាំចាស់២០១៧ កន្លងទៅ៕
Source: Kampuchea Thmey Daily
0 Comments