ភ្នំពេញ ៖ នៅព្រឹកថ្ងៃទី៣០ ខែឧសភា ឆ្នាំ២០១៨នេះ នគរបាលខណ្ឌពោធិ៍សែនជ័យ បានបញ្ជូនខ្លួនថៅកែស្រី ដែលវាយធ្វើបាបកូនឈ្នួលអស់រយៈពេល៤ឆ្នាំ ទៅកាន់អយ្យការអមសាលាដំបូងរាជធានីភ្នំពេញ ដើម្បីធ្វើការសាកសួរពីដំណើររឿងធ្វើទារុណកម្មអនីតិជននោះ។
ថៅកែស្រីសាច់សតែចិត្តខ្មៅរូបនេះមានឈ្មោះ ម៉េង រ័ត្នពិសី ហៅ សុភា អាយុ៣៣ឆ្នាំ មុខរបរលក់សម្លៀកបំពាក់នៅផ្ទះកើតហេតុ។
ចំណែកក្មេងស្រីរងគ្រោះឈ្មោះ ជា ស្រីនូ ហៅស្រីពៅ អាយុ១៦ឆ្នាំ នាងបាន មករស់នៅផ្ទះកើតហេតុខាងលើរយៈពេល៤ឆ្នាំកន្លងមកហើយ ដោយមកធ្វើជាអ្នកបម្រើថៅកែស្រីនេះតាំងពីអាយុ១២ឆ្នាំមកម្ល៉េះ។
នាងមានស្រុកកំណើតភូមិទំនប់ថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ។ រឿងរ៉ាវចាប់ខ្លួនថៅកែស្រីបញ្ជូនមកតុលាការនេះ កើតឡើងក្រោយពីប្រជាពលរដ្ឋ ដែលរស់នៅក្បែរខាងផ្ទះថៅកែស្រីចិត្តយក្សទ្រាំមិនបាន នឹងការធ្វើទារុណកម្មក្មេងស្រីរងគ្រោះឲ្យឈឺចាប់ស្រែកទ្រហោរាល់ថ្ងៃ ក៏ប្ដឹងទៅបណ្ដាញផ្សព្វផ្សាយព័ត៌មាននានា និងប្ដឹងទៅអង្គភាពប៉ូលិសឲ្យបើកប្រតិបត្តិការចុះទៅអន្តរាគមន៍ រំដោះក្មេងខាងលើ កាលពីវេលាម៉ោង៥ល្ងាចថ្ងៃទី២៧ ខែឧសភា ឆ្នាំ២០១៨ នៅផ្ទះជនល្មើសដែលលក់សម្លៀកបំពាក់គឺផ្ទះលេខ១៧អា ខាងត្បូងជាប់ផ្សារបុរីសន្តិភាព២ ភូមិតំណាក់ត្រយឹង សង្កាត់ចោមចៅ២ ខណ្ឌពោធិ៍សែន តែម្ដង។
ឥឡូវនេះថៅកែស្រីចិត្តអប្រិយកំពុង ត្រូវបានសាកសួរដោយតំណាងអយ្យការអមតុលាការ ដោយមិនទាន់កំណត់ពីបទល្មើសដែលត្រូវចោទប្រកាន់ទេ៕
Source: Kampuchea Thmey Daily
0 Comments