កណ្តាល ៖ ស្នងការរងនគរបាលខេត្តកណ្តាលទទួលផែនយុត្តិធម៌ លោកឧត្តមសេនីយ៍ត្រីរឿន ណារ៉ា បានឲ្យសមត្ថកិច្ចជំនាញស្រាវជ្រាវរកអត្តសញ្ញាណ និង ប្រកាសរកសាច់ញាតិរបស់សាកសពបុរសម្នាក់ ដែលអ្នកបង់សំណាញ់ប្រទះឃើញនៅក្នុងប្រឡាយគ្របដោយដើមកំប្លោកនិងលបត្រីដើម្បីកំណត់បទល្មើសនិងមុខសញ្ញា។
សាកសពនេះត្រូវបានប្រទះឃើញវេលាម៉ោង១៤និង៤០នាទី ថ្ងៃទី២៩ ខែឧសភា ឆ្នាំ២០១៨ នៅចំណុចក្នុងប្រឡាយទំនប់៩៤ ភូមិប្រាសាទ ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល។
លោកស្នងការរងបានឲ្យដឹងថា ជនរងគ្រោះ(មិនស្គាល់អត្តសញ្ញាណ ) ភេទប្រុស អាយុចន្លោះ៣០-៤០ឆ្នាំ អត់ពាក់អាវស្លៀកខោខូវប៊យជើងវែង ពណ៌ខៀវ ខោខ្លីក្នុង(លីអូ) ពណ៌ខ្មៅ។
បើតាមការបំភ្លឺរបស់ឈ្មោះម៉ុក ស៊្រីន ភេទប្រុស បានឲ្យដឹងថា នៅវេលាប្រហែលម៉ោង១២ថ្ងៃត្រង់ថ្ងៃទី២៩ ខែឧសភា ឆ្នាំ២០១៨ ខ្លួននិងឈ្មោះផន ផាត បានទៅបង់ត្រីនៅចំណុចខាងលើ ពេលទៅដល់ក៏ប្រទះឃើញសាកសពនៅក្នុងប្រឡាយទំនប់៩៤ ភូមិប្រាសាទ ឃុំព្រែកស្លែង រួចរាយការណ៍មកសមត្ថកិច្ច។
លោកស្នងការរងបានបញ្ជាក់ឲ្យដឹងថា ក្រោយទទួលបានសេចក្តីរាយការណ៍ភ្លាម ក៏បានបង្កើតគណៈកម្មការពិនិត្យរួមមាន កម្លាំងជំនាញខេត្ត កម្លាំងជំនាញស្រុក ប៉ុស្តិ៍អាជ្ញាធរមូលដ្ឋាននិងគ្រូពេទ្យចុះមកដល់កន្លែងកើតហេតុ ធ្វើការពិនិត្យទៅលើសាកសពឃើញថា សាកសពនៅក្នុង ប្រឡាយ ក្រោមដើមត្រស់ ត្រូវបានគ្របដោយដើមកំប្លោកនិងលបត្រី គ្របពីលើ។
សាកសពគ្មាន អាវ ស្លៀកខោ ខោវប៊យជើងវែងពណ៌ខៀវ ស្លៀកលីអូ ពណ៌ខ្មៅ ស្លាប់ដេកក្បាលទៅទិសខាងត្បូង មានស្នាមបែកនៅលើចិញ្ចើមខាងឆ្វេងទំហំ ៤m គុណ ២m មិនដល់ឆ្អឹង មានស្នាមជាំក្រោមថ្គាម ក្រោមទងត្រចៀកបាក់ឆ្អឹងថ្គាម ផ្នែកខាងឆ្វេង បែកឆ្អឹងក្បាលជង្គង់(បែកអង្គុញ) ខាងស្ដាំ ស្នាមមុតដាច់ស្មើរលើក្បាលជង្គង់ ប៉ះទង្គិចនឹងវត្ថុរឹងមុខមុត(សង្ស័យកាំបិត) សាកសពមានកម្ពស់១៦០ម៉ែត្រ កទន់ធម្មតា នៅក្នុងហោប៉ាវអាវ មានប្រាក់ក្រដាសប្រាំពាន់១សន្លឹក និងក្រដាសប្រាំរយ ៣សន្លឹក។
តាមការសន្និដ្ឋាន របស់ផ្នែកជំនាញខេត្ត ស្រុក គ្រូពេទ្យ, សាកសពជនរងគ្រោះ ស្លាប់ដោយសារករណីឃាតកម្ម។ ក្រោយពេលពិនិត្យរួច បានប្រគល់សព ជូនលោកមេឃុំ កប់រង់ចាំ ប្រកាសរក សាច់ញាតិ មកទទួលយក។ សមត្ថកិច្ចសូមប្រកាសរកសាច់ញាតិជនរងគ្រោះខាងលើ ប្រសិនបើមានបាត់បង់ បងប្អូន ដូចមានភិនភាគខាងលើ សូមធ្វើការទាក់ទងមក សមត្ថកិច្ច អធិការដ្ឋាននគរបាលស្រុកកណ្ដាលស្ទឹង៕
Source: Kampuchea Thmey Daily
0 Comments