ភ្នំពេញ ៖ លោក Christopher B. Monter ឯកអគ្គរដ្ឋទូតនៃសាធារណរដ្ឋហ្វីលីពីនប្រចាំព្រះរាជាណាចក្រកម្ពុជា បានអះអាងថា ថ្មីៗនេះមានក្រុមហ៊ុនកែច្នៃផ្លែស្វាយដ៏ធំមួយរបស់ហ្វីលីពីន បានរៀបចំគម្រោងវិនិយោគសាងសង់រោងចក្រកែច្នៃផលិតផលនេះ ទៅតាមស្តង់ដារ គុណភាព និងសុវត្ថិភាពនៅកម្ពុជា ដើម្បីធ្វើការនាំចេញ។
ការអះអាងបែបនេះ បានធ្វើឡើងកាលពីរសៀលថ្ងៃអង្គារ ១៥កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ ខែឧសភា គ.ស ២០១៨ នៅទីស្តីការក្រសួង នៅក្នុងជំនួបពិភាក្សាការងារជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ទាក់ទងទៅនឹង ទី១.ពង្រឹងកិច្ចសហប្រតិបត្តិការលើវិស័យកសិកម្មរវាងប្រទេសទាំងពីរ,ទី២.ការត្រៀមរៀបចំកិច្ចប្រជុំក្រុមការងារបច្ចេកទេសរវាងភាគីទាំងពីរ ដែលនឹងរៀបចំធ្វើនៅថ្ងៃទី ០៥-០៦ ខែមិថុនា ឆ្នាំ ២០១៨ នៅខេត្តសៀមរាប។
លោក Christopher B. Monter ឯកអគ្គរដ្ឋទូតនៃសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជា បានមានប្រសាសន៍កោតសរសើរពីការរីកចម្រើនរបស់ប្រទេសកម្ពុជា ដែលក្នុងនោះវិស័យកសិកម្មបានចូលរួមចំណែកក្នុងការជំរុញកំណើនសេដ្ឋកិច្ចជាតិ។ លោកឯកអគ្គរដ្ឋទូតបានវាយតម្លៃខ្ពស់លើកិច្ចសហប្រតិបត្តិការរវាងប្រទេសទាំងពីរ ពិសេសលើវិស័យកសិកម្ម ដោយទទួលបានកិច្ចសហការពីក្រសួងកសិកម្ម រុក្ខាប្រមាញ់ និងនេសាទបានយ៉ាងល្អប្រសើរ។
ទន្ទឹមនិងនេះ លោកឯកអគ្គរដ្ឋទូតក្នុងឱកាសបំពេញបេសកកម្មការទួតនៅកម្ពុជា លោកនឹងខិតខំអស់លទ្ធភាព ធ្វើយ៉ាងណាពង្រឹងនិងពង្រីកកិច្ចសហប្រតិបត្តិការនេះឲ្យបាន់តែល្អប្រសើរថែមទៀត។ លោកបានជម្រាបជូនផងដែរថា ថ្មីៗនេះមានក្រុមហ៊ុនកែច្នៃផ្លែស្វាយដ៏ធំមួយរបស់ហ្វីលីពីន បានរៀបចំគម្រោងវិនិយោគសាងសង់រោងចក្រកែច្នៃផលិតផលនេះ ទៅតាមស្តង់ដារ គុណភាព និងសុវត្ថិភាពនៅកម្ពុជា ដើម្បីធ្វើការនាំចេញ។
មានប្រសាសន៍នាឱកាសនេះ លោករដ្ឋមន្ត្រីបានសម្តែងនូវកិច្ចស្វាគមន៍ជូនចំពោះលោកឯកអគ្គរដ្ឋទូត និងសហការរីដែលបានអញ្ជើញមកនាថ្ងៃនេះ។ លោករដ្ឋមន្ត្រីបានសម្តែងនូវអំណរគុណយ៉ាងជ្រាលជ្រៅជូនចំពោះរដ្ឋាភិបាលនៃសាធារណរដ្ឋហ្វីលីពីន ដែលកន្លងមកបានជួយគាំទ្រ និងផ្តល់កិច្ចសហប្រតិបត្តិការលើគ្រប់វិស័យ ជាពិសេសវិស័យកសិកម្មដែលប្រទេសទាំងពីរបានចុះអនុស្សរណៈយោគយល់គ្នាកាលពីឆ្នាំ ២០១៥ តាមរយៈខ្លឹមសារនៃអនុស្សរណៈនេះបានធ្វើឲ្យសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសទាំងពីរកាន់តែល្អប្រសើរឡើង។
ក្រសួងបញ្ជាក់ថា លទ្ធផលនៃជំនួបនាថ្ងៃនេះ ភាគីទាំងពីរបានឯកភាពគ្នាលើចំណុចសំខាន់ៗមួយចំនួនដូចជា៖ ១-ការផ្លាស់ប្តូរបទពិសោធន៍របស់មន្ត្រីជំនាញតាមរយៈការធ្វើទស្សនកិច្ច ការរៀបចំសិក្ខាសាលា កិច្ចប្រជុំនិងការបណ្តុះបណ្តាល,ទី២-សិក្សាពីលទ្ធភាពនៃការបង្កើនការធ្វើពាណិជ្ជកម្មលើវិស័យកសិកម្មឲ្យកាន់តែល្អប្រសើរ, ទី៣-ពិនិត្យពិចារណាផ្តល់អាហារូបករណ៍ថ្នាក់អនុបណ្ឌិតដល់មន្ត្រីជំនាញកសិកម្មលើមុខវិជ្ជាក្សេត្រសាស្ត្រ វិទ្យាសាស្ត្រដី និងវិទ្យាសាស្ត្រជលផល៕
Source: Kampuchea Thmey Daily
0 Comments