Ad Code

លោក គឹម សន្តិភាព​៖ ការ​ជ្រលក់​ម្រាមដៃ​ជាមួយ​ទឹក​ថ្នាំ​ខ្មៅ​ផ្សេង​បន្លំ​ថាខ្លួន​បាន​ទៅ​បោះឆ្នោត គឺជាអំពើ​ល្មើសច្បាប់​ព្រហ្មទណ្ឌ



​ភ្នំពេញ​៖ លោក គឹម សន្តិភាព អ្នកនាំពាក្យ​ក្រសួងយុត្តិធម៌ បាន​ថ្លែង​កាលពី​ព្រឹក​ថ្ងៃទី​៣០ ខែឧសភា ឆ្នាំ​២០១៨​ថា ប្រសិនបើ​មានការ​ជ្រលក់​ម្រាមដៃ​ជាមួយ​ទឹក​ថ្នាំ​ខ្មៅ​ផ្សេង​ណាមួយ ដើម្បី​បន្លំ​ថាខ្លួន​បានទៅ​បោះឆ្នោត​នោះ គឺជា​អំពើ​ល្មើសច្បាប់​ព្រហ្មទណ្ឌ ដែល​ត្រូវ​ទទួលទោស​តាមច្បាប់ ពីព្រោះទង្វើនេះនឹង​បង្កើត​នូវ​ការយល់ច្រលំ​ថា ការបោះឆ្នោត​មាន​ភាពមិនប្រក្រតី ដែល​នឹងបង្កអោយមាន​ភាព​វឹកវ​រ​ក្នុងសង្គម​។

​អ្នកនាំពាក្យ​ក្រសួងយុត្តិធម៌​បាន​ថ្លែង​បែបនេះ បន្ទាប់ពី​ក្រុមប្រឆាំង ជាពិសេស​ទណ្ឌិត សម រង្ស៊ី ដែល​កំពង់​នី​រទេស​ខ្លួន​នៅក្រៅ​ប្រទេស បាន​អំពាវនាវ​កុំ​ឲ្យ​ប្រជាពលរដ្ឋ​ទៅ​បោះឆ្នោត នៅ​ថ្ងៃទី​២៩ ខែកក្កដា ឆ្នាំ​២០១៨ ខាងមុខ ហើយ​ក៏បាន​ប្រាប់​ឲ្យ​ប្រជាពលរដ្ឋ​យក​ថ្នាំ​ខ្មៅ​ផ្សេងៗ មក​ជ្រលក់​ម្រាមដៃ ដើម្បី​បន្លំ​ថា ខ្លួន​បាន​ទៅ​បោះឆ្នោត​។

​លោក គឹម សន្តិភាព បានបញ្ជាក់​យ៉ាងនេះ​ថា “​ម្រាមដៃ​ខ្មៅ​ក្រោយ​ការបោះឆ្នោត គឺជា​ការកំណត់​សំគាល់​អត្តសញ្ញាណ​អ្នក​ដែល​បាន​ទៅ​បោះឆ្នោត ដែល​មានតែ គ​.​ជ​.​ប ប៉ុណ្ណោះ មាន​សមត្ថកិច្ច​ក្នុងការ​ចាត់ចែង​ជ្រលក់​ម្រាមដៃ​អ្នក​ដែល​បាន​ទៅ​បោះឆ្នោត​។ អ្នក​ដែល​ប្រឡាក់​ម្រាមដៃ​ខ្មៅ​នេះ មានន័យថា បាន​បោះឆ្នោត​រួចហើយ ហើយ​ចំនួន​អ្នក​ប្រឡាក់​ម្រាមដៃ​ខ្មៅ​ត្រូវ​ស្មើនឹង​ចំនួន​អ្នក​ដែល​បាន​ទៅ​បោះឆ្នោត ហើយក៏​ស្មើនឹង​ចំនួន​សន្លឹកឆ្នោត ដែល​បាន​បោះ​ផងដែរ​។ ហេតុនេះ​ការបន្លំ​ថា ខ្លួន​បាន​ទៅ​បោះឆ្នោត ដោយ​ជ្រលក់​ទឹកខ្មៅ​ផ្សេង​នោះ គឺជា​ចេតនា​ទុច្ចរិត​ដើម្បី​បង្ក​ការ​ភ័ន្ត​ច្រ​លំ​ទៅលើ​ចំនួន​ពិតប្រាកដ​អ្នក​ដែល​បាន​បោះឆ្នោត ដែលនាំអោយ​ចំនួន​អ្នកបោះឆ្នោត​ច្រើនជាង​ចំនួន​សន្លឹកឆ្នោត​ដែល​បាន​បោះ​ពិតប្រាកដ​”​។

តាម​លោក គឹម សន្តិភាព “​ទង្វើរ​នេះ​នឹង​បង្កើត​នូវ​ការយល់ច្រលំ​ថា ការបោះឆ្នោត​មានភាពមិនប្រក្រតី ដែល​នឹង​បង្កអោយមាន​ភាពវឹកវ​រ​ក្នុងសង្គម​មួយ​កើតឡើង​បាន​។ អំពើ​ខាងលើនេះ ជា​អំពើ​ល្មើសច្បាប់ ប្រឈម​នឹង​ការផ្តន្ទាទោស​ដាក់ពន្ធនាគា​រ​តាមច្បាប់​ព្រហ្មទណ្ឌ​”​។

ទាក់ទង​បញ្ហា​នេះដែរ លោក ស៊ិ​ក ប៊ុន​ហុក ប្រធាន​គណៈកម្មាធិការ​ជាតិ​រៀបចំ​ការបោះឆ្នោត​បាន​ថ្លែងប្រាប់​អ្នកសារព័ត៌មាន ក្រោយ​ពិធី​ចាប់ឆ្នោត​លំដាប់​លេខ​រៀង​គណបក្សនយោបាយ នៅលើ​សន្លឹកឆ្នោត​នោះ កាលពី​ព្រឹក​ថ្ងៃទី​២៩ ខែឧសភា ឆ្នាំ​២០១៨​ថា មាត្រា​១៤២ នៃ​ច្បាប់បោះឆ្នោត បានបញ្ជាក់​យ៉ាងច្បាស់ គឺ​ហាម​មិនអោយ​មានការ​រារាំង​ណាមួយ ដល់​អ្នក​ដែលមាន​សិទ្ធិ​បោះឆ្នោត​នោះទេ ហើយ​បើ​នៅតែ​ល្មើស ទៅ​រារាំង​ទៀត នឹងត្រូវ​ពិន័យ ពី​៥​លាន​ទៅ​២០ លាន​រៀល ដែល​មិនទាន់​គិតពី​ទោស​ព្រហ្មទណ្ឌ​។ តាម​លោក ស៊ិ​ក ប៊ុន​ហុក “​មាន​អ្នកខ្លះ​លើកឡើងថា ការអំពាវនាវ​នោះ គឺ​គ្រាន់តែ​ជាការ​បញ្ចេញមតិ នេះ​មិនមែន​ទេ យើង​បញ្ចេញមតិ​មែន តែ​ការបញ្ចេញមតិ​នេះ វា​ទៅ​រារាំង​ដល់​អ្នកបោះឆ្នោត បានជា​ច្បាប់បោះឆ្នោត​មាត្រា​១៤២ បាន​ហាមឃាត់​មិនអោយ​បញ្ចេញមតិ​បែបនេះ​...​។​ការបោះឆ្នោត គឺជា​សិទ្ធិ​របស់គេ ប៉ុន្តែ​អ្នក​រារាំង​គេ​ទេ ដែល​ត្រូវ​មានទោស​”​។

​ចំណែក​សម្ដេច​ក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រី​ក្រសួងមហាផ្ទៃ និង​ជា​ប្រធាន​គណៈបញ្ជាការ​សន្ដិសុខ​អចិន្ដ្រៃយ៍ សម្រាប់​ការបោះឆ្នោត ធ្លាប់បាន​ប្រកាសថា ការអំពាវនាវ​មិន​ឲ្យ​ប្រជាពលរដ្ឋ​ទៅ​ចូលរួម​បោះឆ្នោត គឺជា​ការរារាំង​ដល់​ដំណើរការ​បោះឆ្នោត ដូច្នេះ​អ្នក​ដែល​រារាំង​ដល់​ដំណើរការ​បោះឆ្នោត គឺ​ត្រូវ​ចាត់វិធានការ​តាមច្បាប់​។ សម្ដេច​ក្រឡាហោម ស ខេង បានបញ្ជាក់​យ៉ាង​ដូច្នេះ​ថា “​យើង​ពន្យល់​ប្រជាពលរដ្ឋ​ឲ្យ​យល់ ពីព្រោះ​វា​ជា​សិទ្ធិ​របស់​ប្រជាពលរដ្ឋ ប៉ុន្តែ​អ្នក​ដែល​រារាំង​មាន​កំហុស មានកំ​ហុង​។ អាហ្នឹង​ច្បាប់​បានចែង​ច្បាស់ ប៉ុន្តែ​ការសំរេច​ទៅ ឬ​មិន​ទៅជា​ការសំរេច​របស់​ប្រជាពលរដ្ឋ តាម​រដ្ឋធម្មនុញ្ញ និង​ច្បាប់បោះឆ្នោត​របស់​យើង​។ ជាពិសេស​អ្នក​រារាំង ហើយ​បើសិនជា​គេ​មើលឃើញ​មាន​រារាំង មាន​ភស្តុតាង​ជាក់ស្តែង អាហ្នឹង​ទទួលទោស​ហើយ​”​។

​សម្ដេច​ក្រឡាហោម ស ខេង ពន្យល់ថា “​ដែល​ហៅថា ការរារាំង​នោះ រារាំង​យ៉ាងម៉េច យក​របង​ទៅ​រារាំង ឬ​យក​ឧ​បករ​ណ៏​អី​ផ្សេងទៀត ជា​វត្ថុ​រឹង​ទៅ​រារាំង ឬក៏​ការអំពាវនាវ​ជា​សំដី​នេះ ថា​អាហ្នឹង​វា​អត់​ខុស​ទេ វា​គ្រាន់តែ​ជាការ​អំពាវនាវ​។ បើ​ចឹ​ង​យើង​មិនដឹង​អនុវត្ត​ច្បាប់​ហ្នឹង​យ៉ាងម៉េច​ទេ បើ​អ្នក​ហ្នឹង​អត់​យក​របង​ទៅ​រារាំង​ផង ដូច្នេះ​ខ្ញុំ​យល់ថា សំដី​ហ្នឹងហើយ ដែលជា​ការរារាំង​”​។

​ជាមួយគ្នា​នោះ សម្ដេច​ក្រឡាហោម ស ខេង ក៏បាន​បញ្ជា​កម្លាំង​សមត្ថកិច្ច​ទាំងអស់ ត្រូវតែ​បង្ក្រាប​រាល់​សកម្មភាព​ទាំងឡាយណា ដែល​រារាំង និង​ចង់​បំផ្លិចបំផ្លាញ​ដំណើរការ​បោះឆ្នោត​ជ្រើសតាំង​តំណាងរាស្ដ្រ នីតិកាល​ទី​៦ ឆ្នាំ​២០១៨ ដែល​ប្រព្រឹត្តទៅ​នៅ​ចុងខែ​កក្កដា ឆ្នាំ​២០១៨ ខាងមុខនេះ​។ សម្ដេច​សង្កត់ធ្ងន់ថា គ្រប់​សមត្ថកិច្ច​ពាក់ព័ន្ធ ត្រូវ​ធានា​ឲ្យ​បាន​នូវ​សមភាព​ចំពោះមុខ​ច្បាប់ និង​ការ​ផ្ដល់នូវ​សេវា​សន្ដិសុខ​ជូន​ប្រជាពលរដ្ឋ ដែលមាន​សិទ្ធិ​បោះឆ្នោត វាគ្មិន តំណាង ឬ​ភ្នាក់ងារ និង​បេក្ខជន​គណបក្សនយោបាយ ដែល​ឈរឈ្មោះ​បោះឆ្នោត និង​អ្នកសង្កេតការណ៍​ជាតិ​-​អន្ដរជាតិ​។

​ដំណើរការ​បោះឆ្នោត​ជ្រើសតាំង​តំណាងរាស្ដ្រ​នីតិកាល​ទី​៦ ឆ្នាំ​២០១៨ នឹង​ប្រព្រឹត្តិ​ទៅ​នៅ​ថ្ងៃទី​២៩ ខែកក្កដា ឆ្នាំ​២០១៨ ខាងមុខ ហើយ​គណបក្សនយោបាយ ដែល​បាន​ចូលរួម​ប្រកួ​ត​ប្រជែង​មាន​ចំនួន​២០ រួមមាន គណបក្ស “​គណបក្ស​ខ្មែរ​រួបរួម​ជាតិ​” លេខ​រៀង​ទី​១, គណបក្ស “​គណបក្ស​មាតុភូមិ​យើង​” លេខ​រៀង​ទី​២, គណបក្ស “​គណបក្ស​ពន្លឺ​ថ្មី​” លេខ​រៀង​ទី​៣, គណបក្ស “​សញ្ជាតិ​កម្ពុជា​” លេខ​រៀង​ទី​៤, គណបក្ស “​ខ្មែរ​ក្រោក​” លេខ​រៀង​ទី​៥, គណបក្ស “​សំបុក​ឃ្មុំ​សង្គម​ប្រជាធិបតេយ្យ​” លេខ​រៀង​ទី​៦, គណបក្ស “​ប្រជាធិបតេយ្យ​មូលដ្ឋាន​” លេខ​រៀង​ទី​៧, គណបក្ស “​ខ្មែរ​សាធារណរដ្ឋ​ប្រជាធិបតេយ្យ​” លេខ​រៀង​ទី​៨, គណបក្ស “​រស្មី​ខេមរា​” លេខ​រៀង​ទី​៩, គណបក្ស “​សម្ព័ន្ធ​ដើម្បី​ប្រជាធិបតេយ្យ​” លេខ​រៀង​ទី​១០, គណបក្ស “​ខ្មែរ​សាធារណរដ្ឋ​” លេខ​រៀង​ទី​១១, គណបក្ស “​ខ្មែរ​ឈប់​ក្រ​” លេខ​រៀង​ទី​១២, គណបក្ស “​ហ្វ៊ុនស៊ិនប៉ិច​” លេខ​រៀង​ទី​១៣, គណបក្ស “​ខ្មែរ​អភិវឌ្ឍន៍​សេដ្ឋកិច្ច​” លេខ​រៀង​ទី​១៤, គណបក្ស “​យុវជន​កម្ពុជា​” លេខ​រៀង​ទី​១៥, គណបក្ស “​ធម្មាធិបតេយ្យ​” លេខ​រៀង​ទី​១៦, គណបក្ស “​ឆ​ន្ទះ​ខ្មែរ​” លេខ​រៀង​ទី​១៧, គណបក្ស “​ជនជាតិដើម​ប្រជាធិបតេយ្យ​កម្ពុជា​” លេខ​រៀង​ទី​១៨, គណបក្ស “​ខ្មែរ​តែមួយ​” លេខ​រៀង​ទី​១៩ និង​គណបក្ស “​ប្រជាជន​កម្ពុជា​” លេខ​រៀង​ទី​២០៕ ​


Source: Kampuchea Thmey Daily

Post a Comment

0 Comments

Close Menu