ក្រសួង​អប់រំ​ ណែនាំ​ដល់​និស្សិត​អំពី​ការអភិវឌ្ឍ​សមត្ថភាព​ជំនាញ សម្រាប់​ទីផ្សារការងារ

ភ្នំពេញ ​៖​ ក្រសួង​អប់រំ​យុវជន ​និង​កីឡា​ សហការ​ជាមួយ​សហភាព​សហព័ន្ធ​យុវជន​កម្ពុជា​ បាន​រៀប​ចំ​សិក្ខាសាលា​ស្តី​ពី​យុវជន​ និង​ភាពជា​អ្នកដឹកនាំ​ «​យុវជន​ការ​អភិវឌ្ឍ​សមត្ថភាព​ជំនាញ​សម្រាប់​ទីផ្សារ​ការងារ​» ​ដើម្បី​ឲ្យ​និស្សិត​ត្រៀមខ្លួន​ចាប់​យក​ជំនាញ​សិក្សា​និង​អភិវឌ្ឍន៍​ជំនាញ​ផ្សេងៗ​ឆ្លើយតប​ទៅតាម​តម្រូវការ​ទី ផ្សារ​ការងារ​ទៅ​ថ្ងៃ​អនាគត​នៅពេល​ចប់​ការសិក្សា​។

លោក រស់ សា​លីន អ្នកនាំពាក្យ​ក្រសួង​អប់រំ​យុវជន​និង​កីឡា​និង​ជា​វាគ្មិន​នៅក្នុង​សិក្ខាសាលា​បាន​ណែនាំ​ដល់​និស្សិត​ត្រូវ​ខិតខំ​សិក្សា​ជំនាញ​ឲ្យ​បាន​ច្បាស់លាស់ រៀបចំ​ឥរិយាបថ​ឲ្យ​បាន​សមរម្យ​និង​ត្រូវ​មាន​ភាពរឹងមាំ​ខាងក្នុង​ចិត្ត​ដើម្បី​ឈានទៅរក​ភាពជោគជ័យ​ទាំង​ការសិក្សា​និង​ការងារ​ទៅ​ថ្ងៃ​អនាគត​។



លោក​រស់ សា​លីន​ បាន​មានប្រសាសន៍ថា​ ដើម្បី​ទទួល​បាន​ជោគជ័យ​ក្នុង​អាជីព​អ្វីមួយ​ប្អូនៗ​និស្សិត​មិនត្រូវ​ត្រៀមខ្លួន​តែ​ទៅលើ​ចំណេះដឹង​និង​ជំនាញ​តែមួយ​មុខ​គឺ​មិន​គ្រប់គ្រាន់​ទេ​គឺ​ត្រូវ​ត្រៀម​រៀបចំ​ឥរិយាបថ អត្តចរិត​ ឬ​ អាកប្បកិរិយា​ឲ្យ​បាន​ល្អ​ផងដែរ​។

តែ​យ៉ាងណាក៏ដោយ​លោក រស់ សា​លីន​ បាន​ជំរុញ​ឲ្យ​និស្សិត​មុននឹង​ចាប់​យក​ជំនាញ​អ្វីមួយ​សិក្សា​ត្រូវ​មើល​ពី​ទេពកោសល្យ​ធម្មជាតិ​របស់ខ្លួន ​និង ​ពិនិត្យមើល​តម្រូវការ​ទីផ្សារ​ជាក់ស្តែង​ខណៈ​បច្ចុប្បន្ន​នេះ​ជំនា​ញ​ឧស្សាហកម្ម​ធន់​ធ្ងន់ ​និង ​ផ្នែក​សេវាកម្ម​កំពុង​មាន​សន្ទុះ​យ៉ាង​ខ្លាំង​ដោយសារតែ​សេដ្ឋកិច្ច​កម្ពុជា​រីកចម្រើន។



ប្អូនស្រី ឈុន ស៊ី​លាង និស្សិត​សាកលវិទ្យាល័យ​ភូមិន្ទ​នីតិសាស្ត្រ​និង​វិទ្យាសាស្ត្រ​សេដ្ឋកិច្ច​បានចាត់ទុក​សិក្ខាសាលា​នេះ​មាន​សារៈសំខាន់​ខ្លាំង​ណាស់ ​ព្រោះ​វា​បាន​ជួយ​ធ្វើ​ឲ្យ​ប្អូន​ក៏ដូចជា​និស្សិត​ដែល​ចូលរួម​នៅក្នុង​សិក្ខាសាលា​នេះ​ទទួលបាន​នូវ​ចំណេះដឹង​ថ្មីៗ​ពី​វាគ្មិន​ដែល​មាន​បទពិសោធន៍​ខ្ពស់ៗ​។

ប្អូនស្រី​បាន​ស្នើ​ឲ្យ​ក្រសួង​អប់រំ​យុវជន​និង​កីឡា​គួរ​រៀបចំ​សិក្ខាសាលា​របៀប​នេះ​ឲ្យ​បាន​ច្រើន​បន្ថែម​ទៀត​ ដើម្បី​បង្កើន​ចំណេះដឹង​ថ្មីៗ​ដល់​និស្សិត​ទាក់ទិន​នឹង​ការសិក្សា​និង​ទីផ្សារ​ការងារ​បច្ចុប្បន្ន។

ជា​មួយ​គ្នា​នេះ​ ប្អូនស្រី​ក៏បាន​អំពាវនាវ​ដល់​និស្សិត​ចូលរួម​កម្មវិធី​និង​សិក្ខាសាលា​ឲ្យ​បាន​ច្រើន​កុះករ​ដើម្បី​ត្រៀម​រៀបចំខ្លួន​ឲ្យ​បាន​ល្អ​ទាំង​ការសិក្សា​ជំនាញ​និង​ស្វែងរក​ការងារ​ពេល​ចប់​ការសិក្សា​។



លោក សុះ មុះ​សិន អនុប្រធាន​សហភាព​ស​ព័ន្ធ​យុវជន​កម្ពុជា​បាន​ណែនាំ​ដល់​និស្សិត​ត្រងត្រាប់​ស្តាប់​នូវ​ការ​ធ្វើ​បទ​បង្ហាញ​ពី​វាគ្មិន​របស់​យើង​ ដោយ​យកចិត្តទុកដាក់​ខ្ពស់​និង​កត់ត្រា​នូវ​ចំណុច​សំខាន់ៗ​ទុកជា​មេរៀន​ ឬ​ បទពិសោធន៍​សម្រាប់​សិក្សា​ខ្លួនឯង​ផង​ និង​សម្រាប់​មិត្ត​ភ័​ក្ត​ផង។

លោក​សង្ឃឹមថា ​ប្អូនៗ​និស្សិត​ដែល​ចូលរួម​នៅក្នុង​សិក្ខាសាលា​នាពេល​នេះ​នឹង​អាច​ទទួល​បាន​នូវ​ចំណេះដឹង​ថ្មីៗ​និង​បទពិសោធន៍​ល្អៗ​ពី​វាគ្មិន​ ដើម្បី​ជា​វិថី​មួយ​ដ៏​ល្អ​ប្រសើរ​សម្រាប់​ទៅ​ថ្ងៃ​អនាគត៕

 

Source: Kampuchea Thmey Daily