ភ្នំពេញ ៖ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ លើកឡើងបែបនេះ នៅក្នុងជំនួបជាមួយលោក William Longhurst ឯកអគ្គរាជទូតចក្រភពអង់គ្លេសប្រចាំកម្ពុជា កាលពីថ្ងៃ ទី២៩ ខែឧសភា ឆ្នាំ២០១៨។
នៅក្នុងជំនួបនោះ លោកទេសរដ្ឋមន្ត្រី ក៏បានថ្លែងអំណរគុណចំពោះរដ្ឋាភិបាលចក្រភពអង់គ្លេស សម្រាប់ការគាំទ្រ និងការជួយឧបត្ថម្ភកន្លងមកដល់កម្ពុជា ពិសេសក្នុងសកម្មភាពបោសសម្អាតមីន តុលាការខ្មែរក្រហម និងការផ្តល់អាហារូបករណ៍ដល់និស្សិតកម្ពុជាទៅបន្តការសិក្សានៅចក្រភពអង់គ្លេស។
លោកទេសរដ្ឋមន្ត្រីបានរំលឹកអំពីការជួបពិភាក្សាការងាររវាងលោកផ្ទាល់ ជាមួយលោក Simon McDonald អនុរដ្ឋមន្ត្រីប្រចាំការនៃក្រសួងការបរទេសចក្រភពអង់គ្លេស ក្នុងអំឡុងទស្សនកិច្ចរបស់លោកនៅកម្ពុជា កាលពីថ្ងៃទី១៨-១៩ ខែឧសភាថ្មីៗនេះ និងបានវាយតម្លៃខ្ពស់ចំពោះការចែករំលែកបទពិសោធន៍របស់លោក Simon McDonald ដល់អ្នកការទូតកម្ពុជា នៅវិទ្យាស្ថានជាតិការទូត និងទំនាក់ទំនងអន្តរជាតិនៃក្រសួងការបរទេសកម្ពុជា។
លោកទេសរដ្ឋមន្ត្រីក៏បានលើកឡើងផងដែរ ពីជំនួបរវាងលោកផ្ទាល់ជាមួយលោក Edward Vaizey បេសកជនពាណិជ្ជកម្មរបស់នាយករដ្ឋមន្ត្រីអង់គ្លេស ក្នុងឱកាសទស្សនកិច្ចនៅកម្ពុជានាខែកុម្ភៈ ឆ្នាំ២០១៨ ដើម្បីពិភាក្សាពីការលើកស្ទួយការផ្លាស់ប្តូរពាណិជ្ជកម្មរវាងប្រទេសទាំងពីរ។
នៅក្នុងការពិភាក្សាផ្លាស់ប្តូរយោបល់លើទំនាក់ទំនងសហប្រតិបត្តិការទ្វេភាគី លោកទេសរដ្ឋមន្ត្រី និងលោកឯកអគ្គរាជទូត បានវាយតម្លៃខ្ពស់ដោយការពេញចិត្តចំពោះការកើនឡើងយ៉ាងឆាប់រហ័សនូវបរិមាណនៃការផ្លាស់ប្តូរពាណិជ្ជកម្មរវាងប្រទេសទាំងពីរ រហូតដល់ជាង១០០០លានដុល្លារ និងចំពោះការកើនឡើងនូវចំនួនអ្នកទេសចរអង់គ្លេសមកកាន់កម្ពុជា រហូតដល់ចំនួន១៧១.០០០នាក់ ក្នុងឆ្នាំ២០១៧។
លោកឯកអគ្គរាជទូត បានគូសបញ្ជាក់ថា ចក្រភពអង់គ្លេស និងលោកផ្ទាល់ គឺជាមិត្តភ័ក្រដ៏ល្អរបស់កម្ពុជា ហើយបានបង្ហាញការចាប់អារម្មណ៍ខ្លាំងចំពោះការរីកចម្រើនលើគ្រប់វិស័យនៅកម្ពុជា ពិសេសផ្នែកសេដ្ឋកិច្ច។ លោកក៏បានជម្រាបជូនលោកទេសរដ្ឋមន្ត្រីអំពីជំហររបស់រដ្ឋាភិបាលចក្រភពអង់គ្លេសក្នុងការបន្តផ្តល់ជំនួយដល់កម្ពុជា លើផ្នែកបោសសំអាតមីន និងការបន្តជំរុញកិច្ចសហប្រតិបត្តិការលើផ្នែកសេដ្ឋកិច្ច និងវិនិយោគ។
លោកក៏បានលើកឡើងថា នឹងមានដំណើរទស្សនកិច្ចរបស់មន្ត្រីជាន់ខ្ពស់ក្រសួងការបរទេសចក្រភពអង់គ្លេសមកកាន់កម្ពុជា ក្នុងអនាគតខាងមុខនេះផងដែរ។
នៅក្នុងជំនួបនេះដែរ លោកទេសរដ្ឋមន្ត្រីក៏បានជំរាបលោកឯកអគ្គរាជទូតអំពីការខិតខំរបស់ គណៈកម្មាធិការជាតិរៀបចំការបោះឆ្នោត ក៏ដូចជារបស់អាជ្ញាធរពាក់ព័ន្ធទាំងអស់ក្នុងការត្រៀមរៀបចំការបោះឆ្នោតខែកក្កដាខាងមុខនេះ ដើម្បីធានាឲ្យការបោះឆ្នោតប្រព្រឹត្តទៅដោយសេរី ត្រឹមត្រូវ យុត្តិធម៌ គ្មានអំពើហិង្សា និងមានតម្លាភាព។
លោកក៏បានគូសបញ្ជាក់ថា តាមការប្រកាសរបស់គណៈកម្មាធិការជាតិរៀបចំការបោះឆ្នោត មានគណបក្សចំនួន២០ បានចូលរួមប្រកួតប្រជែងនៅក្នុងការបោះឆ្នោតនាខែកក្កដា ហើយក្នុងនោះក៏មានគណបក្សមួយចំនួនដែលមានជំហរប្រឆាំង បានធ្វើសកម្មភាពយ៉ាងសកម្ម និងបានបង្ហាញភាពខ្លាំងគួរឲ្យចាប់អារម្មណ៍ ដែលប្រការនេះបានបញ្ជាក់ថា កម្ពុជានៅតែស្ថិតលើមាគ៌ាប្រជាធិបតេយ្យ សេរី ពហុបក្ស។
លោកឯកអគ្គរាជទូត បានអះអាងថា ចក្រភពអង់គ្លេសកំពុងតាមដានដោយយកចិត្តទុកដាក់ចំពោះការបោះឆ្នោតនៅកម្ពុជា ហើយបានបង្ហាញក្តីសង្ឃឹមថា ក្រោយការបោះឆ្នោត អ្វីៗនឹងមានការប្រែប្រួលល្អ៕
Source: Kampuchea Thmey Daily
0 Comments