នាយ ពែកមី បដិសេធAccount Facebook ដែលជនអនាមិកយកទៅប្រើប្រាស់ដើម្បីផលប្រយោជន៍

Cambodia News June 18, 2018

ភ្នំពេញ ៖ តារាកំប្លែងនាយ ពែកមី ថ្មីៗត្រូវជនអនាមិកលួចយករូបភាពនិងឈ្មោះទៅប្រើប្រាស់ក្នុងន័យបង្កភាពក្តៅក្រហាយ និងកេងចំណេញយកផលប្រយោជន៍រៀងៗខ្លួន។ ប៉ុន្តែសាមីខ្លួនបានចេញមុខប្រកាសថា នេះគ្រាន់តែជាការក្លែងបន្លំAccount Facebook តែប៉ុណ្ណោះ។

តារាកំប្លែងនាយ ពែកមី បាននិយាយថា សូមជួយស៊ែផងបងប្អូន ! សូមគោរពជម្រាបពុកម៉ែបងប្អូន ប្រិយមិត្ត មហាជន ជាទីគោរព ពិសេសប្រិយមិត្តក្នុងបណ្តាញសង្គម Facebook ទាំងអស់គ្នាជាទីស្រលាញ់ ថ្មីៗនេះមានសារពីមហាជនផ្ញើចូលមកជាច្រើនពាក់ព័ន្ធករណីគេយករូប និង ឈ្មោះរបស់ខ្ញុំបាទទៅបង្កើតផេក ហើយផុសរឿងមិនគប្បី ក្លែងបន្លំក្នុងគោលបំណងទុច្ចរិតណាមួយ។

តារាកំប្លែងមានដើមកំណើតមកពីខេត្តស្វាយរៀងនាយ ពែកមី បានបន្តថា ហេតុដូចនេះខ្ញុំបាទសូមបញ្ជាក់ជាថ្មីថា រាល់សកម្មភាពផុសទាំងឡាយណាដែលមិនចេញពីទំព័រផ្លូវការរបស់ខ្ញុំបាទមិនជាចេតនា ឬ ទង្វើរបស់ខ្ញុំទេ ហើយក៏គ្មានអ្វីពាក់ព័ន្ធគ្នាដែរ ពិសេសខ្ញុំសូមសំណូមពរអោយគ្រប់បណ្តាអាខោន និង ផេក ក្លែងក្លាយទាំងនោះ មេត្តាដករូបខ្ញុំបាទចេញផង ហើយអាខោនក្លែងក្លាយដែលតែងតែដើរតួជាខ្ញុំបាទសូមមេត្តាបញ្ឃប់ទៅ សូមកុំប្រើហ្វេសប៊ុកក្នុងផ្លូវមិនល្អ បំភ្លៃ ក្លែងបន្លំអាចនាំទុកដាក់ខ្លួន។

សូមបញ្ជាក់ថា នេះពុំមែនជាលើកទី១នោះទេ ដែលកើតឡើងចំពោះតារាកំប្លែងនាយ ពែកមី នោះ។ខណៈកន្លងមកមានតារាស្រីឯទៀតក៏ធ្លាប់កើតឡើងជាច្រើនមកហើយ។ ម្យ៉ាងទៀតនេះក៏ជាមេរៀនសម្រាប់មហាជនផងដែរ៕