ក្រុម​តា​លី​បង់​ បដិសេធ​ពង្រីក​បទ​ឈប់​បាញ់​នៅ​អា​ហ្វ​ហ្គា​នី​ស្ថាន​ ខណៈ​ការវាយប្រហារ​អត្តឃាត​សម្លាប់​មនុស្ស​១៨​នាក់

ក្រុម​តា​លី​បង់​បាន​បដិសេធ​បន្ត​បទ​ឈប់​បាញ់​របស់​ពួកគេ​ហួស​ពីថ្ងៃ​អាទិត្យ​ដែលជា​ហេតុ​បន្ថយ​ក្តីសង្ឃឹម​សម្រាប់​សន្តិភាព ​បន្ទាប់ពី​បរិយាកាស​រីករាយ​អំឡុង​ពិធីបុណ្យ Eid នៅក្នុង​ប្រទេស​អា​ហ្វ​ហ្គា​នី​ស្ថាន​។​
​
ការប្រកាស​នេះ​បាន​កើតឡើង​បន្ទាប់ពី​ការវាយប្រហារ​អត្តឃាត​មួយ​នៅ​ភាគ​ខាងកើត​ប្រទេស​កាលពី​ថ្ងៃអាទិត្យ​បានសម្លាប់​មនុស្ស​យ៉ាងតិច​១៨​នាក់​នៅក្នុង​ហ្វូងមនុស្ស​ដែល​កំពុង​ប្រារព្ធ​ពិធីបុណ្យ​មូស្លីម​ដែល​វា​ជាការ​វាយប្រហារ​លើក​ទី​ពីរ​ក្នុង​រយៈពេល​ជាច្រើន​ថ្ងៃ​ដែល​ធ្វើ​ឲ្យ​អន្តរាយ​ដល់​បទ​ឈប់​បាញ់​គ្នា​មិន​ធ្លាប់មាន​ពីមុនមក​។​
​
អ្នកនាំពាក្យ​របស់លោក​ប្រធានាធិបតី Ashraf Ghani បាន​បង្ហោះ Twitter ថា រដ្ឋាភិបាល​ក្រុង​កា​ប៊ុល​បាន​ពង្រីក​បទ​ឈប់​បាញ់​របស់ខ្លួន​ជាមួយ​ពួក​តា​លី​បង់​ក្នុង​រយៈពេល​១០​ថ្ងៃ​ទៀត​ប៉ុន្តែ​បាន​និយាយថា កងកម្លាំង​សន្តិសុខ​នឹង​ការពារ​ខ្លួន​ប្រសិនបើ​រង​ការវាយប្រហារ​។​
​
មេដឹកនាំ​អា​ហ្វ​ហ្គា​នី​ស្ថាន​រូបនេះ​ក៏បាន​ស្នើសុំ​ឲ្យ​ក្រុម​សកម្មប្រយុទ្ធ​បញ្ឈប់​ការឈ្លានពាន​ផងដែរ​ប៉ុន្តែ​ពួក​តា​លី​បង់​បាន​និយាយថា ការប្រយុទ្ធ​គ្នា​នឹង​ចាប់ផ្តើម​ឡើងវិញ​។​
​
លោក Zabihullah Mujahid អ្នកនាំពាក្យ​របស់​ក្រុម​នេះ​បាន​ប្រាប់ AFP ក្នុង​សារ WhatsApp ថា “​បទ​ឈប់​បាញ់​បានបញ្ចប់​នៅ​យប់​នេះហើយ​ប្រតិបត្តិការ​របស់​យើង​នឹង​ចាប់ផ្តើម​។ យើង​គ្មាន​បំណង​ពង្រីក​បទ​ឈប់​បាញ់​ទេ​”​។​
​
ការប្រកាស​នេះ​បានលើកឡើង​ពី​ក្តី​ព្រួយបារម្ភ​ក្នុងចំណោម​ប្រជាជន​អា​ហ្វ​ហ្គា​នី​ស្ថាន​មួយចំនួន​អំពី​ចំនួន​ពួក​តា​លី​បង់​ដែល​បាន​ទាញយក​ប្រយោជន៍​ពីបទ​ឈប់​បាញ់​នេះ​ដើម្បី​ចូលទៅក្នុង​ទីក្រុង​នានា​នៅ​ទូទាំងប្រទេស​រួមទាំង​រដ្ឋធានី​កា​ប៊ុល​ផងដែរ​ហើយ​អាច​នៅ​ទីនោះ​ជា​បន្តទៀត​នៅពេល​បទ​ឈប់​បាញ់​បញ្ចប់​។​
​
ក្រុម​រដ្ឋ​ឥស្លាម​ដែល​មិនមែនជា​ផ្នែក​នៃ​បទ​ឈប់​បាញ់​នោះបាន​អះអាងថា ខ្លួន​បានធ្វើការ​វាយប្រហារ​អត្តឃាត​លើក​ទី​ពីរ​របស់ខ្លួន​ក្នុង​រយៈពេល​ពីរ​ថ្ងៃ​នៅក្នុង​ខេត្ត Nangarhar​។​
​
ប្រធាន​សុខភាព​ខេត្ត​លោក Najibullah Kamawal បានដាក់​ចំនួន​អ្នកស្លាប់​ពី​ការផ្ទុះ​កាលពី​ថ្ងៃអាទិត្យ​ក្នុង​ទីក្រុង Jalalabad នៅ​ខាងក្រៅ​ការិយាល័យ​របស់​អភិបាលខេត្ត Nangarhar ថា​មាន​ចំនួន​១៨​នាក់​និង​៤៩​នាក់​ទៀត​រងរបួស​។​
​
លោក Kamawal បាន​បន្ថែមថា “​អ្នករងរបួស​ខ្លះ​ស្ថិតក្នុង​ស្ថានភាព​ធ្ងន់ធ្ងរ​” ហើយ​ចំនួន​អ្នកស្លាប់​អាច​កើនឡើង​។​
​
លោក Kamawal បាន​ប្រាប់ AFP ថា កាលពី​ថ្ងៃ​សៅរ៍ ការវាយប្រហារ​អត្តឃាត​ទៅលើ​ក្រុម​តា​លី​បង់ កងកម្លាំង​សន្តិសុខ​និង​ជន​ស៊ីវិល​នៅក្នុង​ខេត្ត​បានសម្លាប់​មនុស្ស​យ៉ាងតិច​៣៦​នាក់​និង​រងរបួស​៦៥​នាក់​។​
​
បក្សពួក​នៅ​អា​ហ្វ​ហ្គា​នី​ស្ថាន​របស់​ក្រុម​រដ្ឋ​ឥស្លាម​ជាពិសេស​នៅ​ភាគ​ខាងកើត​បាន​អះអាង​ទទួលខុសត្រូវ​ចំពោះ​ការវាយប្រហារ​នោះ​៕ AFP

​

Source: Kampuchea Thmey Daily