អ្នកប្រដាល់កម្ពុជាចាន់ ស៊ីណាត ក្លិបនិរោធមានជ័យ និងនូវ ដារ៉ូ អ្នកប្រដាល់ក្លិបអាណាចក្រគុនខ្មែរ នឹងត្រូវជួបប្រកួតជាមួយអ្នកប្រដាល់ថៃ នាល្ងាចថ្ងៃទី១០ ខែមិថុនា ឆ្នាំ២០១៨នេះ នៅលើសង្វៀនបាយ័នស្ទឹងមានជ័យ។
ចាន់ ស៊ីណាត ត្រូវគេផ្តល់ឱកាសអោយជួបប្រកួតសងសឹកជាមួយអ្នកប្រដាល់ថៃBirkban klamuengpetch ក្នុងទម្ងន់៥៧គីឡូក្រាម។ ពួកគេទាំងពីរនេះ ធ្លាប់ជួបគ្នាម្តងហើយកាលពីថ្ងៃទី០៥វិច្ឆិកា២០១៧កន្លងមក ដោយស៊ីណាតចាញ់ពិន្ទុ Birkban។
ស៊ីណាត ជាអ្នកប្រដាល់ដែលចាត់ទុកថា ជាជើងចាស់ ព្រោះគេធ្លាប់ជួបប្រកួតជាមួយអ្នកប្រដាល់បរទេស៤៤លើកហើយ ហើយក៏ជាអ្នកប្រដាល់ដែលមានបទពិសោធន៍ច្រើនដែរ។
ចាន់ ស៊ីណាត មានប្រវត្តិប្រកួតប្រមាណ១១៧លើក ក្នុងនោះវាយឈ្នះ៩៥លើក ចាញ់ ១៥លើក និងស្មើ០៧លើក និងធ្លាប់ផ្តួលគូប្រកួតអោយសន្លប់បាន៣៥លើក។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថាស៊ីណាត អាចសងសឹកBirkban បានសម្រេចឬក៏អត់នោះទេ? ។ ស៊ីណាតប្រកួតចុងក្រោយនេះ បានផ្តួលអ្នកប្រដាល់ថៃHanhserklek ដោយពិន្ទុ។
Birkban ជាអ្នកប្រដាល់ថៃចំណូលថ្មី ទើបមកប្រកួតបានម្តងជាមួយចាន់ ស៊ីណាតលើកមុននេះទេ ។ អ្នកប្រដាល់ថៃរូបនេះ មានស្នៀតទាត់និងកណ្តាប់ដៃល្អ និងធ្លាប់យកឈ្នះអ្នកប្រដាល់រួមជាតិរបស់គេច្រើននាក់មកហើយ ហើយអ្នកដែលចាញ់Birkbanនោះ សុទ្ធតែខ្លាំងជាងចាន់ ស៊ីណាតទៅទៀត។ ទោះជាយ៉ាងណា Birkbanមិនប្រាកដថា ឈ្នះចាន់ ស៊ីណាត ទៀតនោះឡើយ។
បើតាមលក្ខណៈបច្ចេកទេសនោះ ស៊ីណាត អាចឈ្នះបាន គឺមានតែការវាយប្តូរកែងមួយមុខគត់ ដែលប្រថុយដូរជាមួយនឹងជ័យជំនះ។ ចាំមើល រវាងចាន់ស៊ីណាតនិង Birkbanតើនរណាជាអ្នកឈ្នះនៅក្នុងការជួបគ្នាលើកទី២នេះ ?។
ចំពោះ នូវ ដារ៉ូ អ្នកប្រដាល់ជើងខ្លាំងស្រករក្រោយ នឹងត្រូវជួបប្រកួតជាមួយអ្នកប្រដាល់ថៃ Yotpayak Kor.Adisorn ដោយជួបគ្នាក្នុងទម្ងន់៦៣,៥០០គីឡូក្រាម។ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ។ ដូច្នេះការជួបគ្នាលើកនេះ មិនដឹងថា នរណាជាអ្នកឈ្នះនោះឡើយ សម្រាប់ជំនួបលើកដំបូងនេះ។
បើតាមពិនិត្យកម្រិតសមត្ថភាពបច្ចេកទេសនិងកាយសម្បទារបស់ពួកគេទាំងពីរនេះ គេមិនរំពឹងថា Yotpayak អាចវាយឈ្នះនូវ ដារ៉ូ នោះទេ។ ទោះជាយ៉ាងនេះក្តី សម្រាប់ការជួបគ្នានេះ មិនទាន់ប្រាកដថា នូវ ដារ៉ូឈ្នះ Yotpayak នោះទេ ព្រោះថាអ្នកប្រដាល់ថៃ Yotpayak គេក៏ជាអ្នកប្រដាល់ដែលមានចិត្តធំ និងស៊ូចំពោះការប្រកួតដែរ។ នេះបើតាមអ្នកផ្គូផ្គងអោយដឹងនោះ។
នូវ ដារ៉ូ គេជាអ្នកប្រដាល់ជើងថ្មី ដែលមានកាយសម្បទារឹងមាំ និងវាយខ្លាំង និងធ្លាប់ផ្តួលជើងចាស់អស់ច្រើននាក់មកហើយ។ គេទើបតែឡើងសង្វៀនបានប្រមាណជាង៣០លើកប៉ុណ្ណោះ តែលទ្ធផលរបស់គេល្អ គឺឈ្នះច្រើនជាងចាញ់ ។ គេប្រកួតចុងក្រោយនេះ វាយឈ្នះអ្នកប្រដាល់រួមជាតិ ជ័យ ស៊ីនេត ក្លិបឃ្លាំងមឿងកីឡាដោយពិន្ទុ ។ តែយ៉ាងណា នូវ ដារ៉ូ មិនអាចមើលស្រាលចំពោះYotpayak នោះឡើយ។
ដោយឡែក សុខ វិរៈ អ្នកប្រដាល់ក្លិបសំរោងកោងខេត្តបាត់ដំបង នឹងជួបប្រកួតជាមួយមាឃ សុវណ្ណារ៉ា អ្នកប្រដាល់ក្លិបរាជសីហ៍ខេត្តរតនគិរី ។ ពីរនាក់នេះ ប្រកួតគ្នាក្នុងទម្ងន់៦០គីឡូក្រាម ។ សុខ វិរៈ ប្រហែលជាពិបាកយកឈ្នះមាឃ សុវណ្ណារ៉ា ហើយ ព្រោះសុវណ្ណារ៉ា ជាអ្នកប្រដាល់ដែលមានក្បាច់គុនល្អនិងខ្លាំង។
ឡៅ ផានាថ អ្នកប្រដាល់ក្លិបមកុដរាជសីហ៍ ត្រូវគេផ្គូអោយជួបប្រកួតជាមួយម៉ន វិចិត្រ អ្នកប្រដាល់ក្លិបការិយាល័យទី៥ កងទ័ពជើងគោក។ អ្នកទាំងពីរនាក់នេះ ជួបគ្នាក្នុងប្រភេទទម្ងន់៦៥គីឡូក្រាម ហើយសុខ ពិសិដ្ឋ អ្នកប្រដាល់ក្លិបអេលីតគុនខ្មែរ នឹងជួបប្រកួតជាមួយ សល់ សំណាង អ្នកប្រដាល់ក្លិបម៉ៃទីក្រាំងយ៉ូវ ដោយប្រកួតក្នុងទម្ងន់៥៤គីឡូក្រាម៕
Source: Kampuchea Thmey Daily
0 Comments