ភ្នំពេញ ៖ នៅទីស្តីការក្រសួងសាធារណការ និងដឹកជញ្ជូន កាលពីថ្ងៃពុធ ៨រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៦ ខែមិថុនា ឆ្នាំ២០១៨ ទេសរដ្ឋមន្ត្រី ស៊ុន ចាន់ថុល បានទទួល ជួបសំណេះសំណាលជាមួយក្រុមនិស្សិត ជ័យលាភីអាហារូបករណ៍ ដែលជាមន្ត្រីរាជការ និងបុគ្គលិក បម្រើការងារនៅតាមក្រសួង ស្ថាប័ន និងវិស័យឯកជន ដែលត្រូវទៅសិក្សានៅប្រទេសណូវែលហ្សេឡង់។
ការជួបសំណេះសំណាលនេះ មានគោលបំណងដើម្បីទទួលបានអនុសាសន៍ណែនាំ ក៏ដូចជាការចែករំលែកបទពិសោធន៍ល្អៗ ពីទេសរដ្ឋមន្ត្រី មុនពេលធ្វើដំណើរទៅសិក្សានៅក្រៅប្រទេស។ ក្រុមនិស្សិតចំនួនប្រាំបួនរូបនេះ នឹងត្រូវចេញដំណើរទៅសិក្សាលើមុខវិជ្ជាមួយចំនួន រួមមាន៖ គោលនយោបាយសាធារណៈ ការអប់រំ ចំណីអាហារ ការគ្រប់គ្រងធុរកិច្ច និងសុខភាពសាធារណៈ ក្រោមកម្មវិធីអាហារូបករណ៍អាស៊ាន-ណូវែលហ្សេឡង់។
ឆ្លៀតក្នុងឱកាសនោះដែរ ទេសរដ្ឋមន្ត្រី ស៊ុន ចាន់ថុល បានផ្តាំផ្ញើឱ្យក្មួយៗនិស្សិត ធ្វើអំពើល្អជួយផ្សព្វផ្សាយអំពីការរីកចម្រើនរបស់កម្ពុជា ខិតខំរៀនសូត្របន្ថែម ដើម្បីត្រឡប់មកវិញបម្រើប្រទេសជាតិយើងអោយកាន់តែរីកចម្រើនមួយកម្រិតទៀត។
ជាមួយគ្នានេះ ទេសរដ្ឋមន្ត្រី ស៊ុន ចាន់ថុល ក៏បានគូសបញ្ជាក់ផងដែរអំពី ៖ ការខិតខំប្រឹងប្រែងរបស់ក្រសួង ក្នុងការអភិវឌ្ឍ និងធ្វើកំណែទម្រង់លើសេវាសាធារណៈកាត់បន្ថយពេលវេលាផ្តល់សេវា កាត់បន្ថយចំណាយ បង្ខិតសេវាទៅជិតប្រជាពលរដ្ឋ ពង្រឹងប្រសិទ្ធភាពក្នុងការអភិវឌ្ឍថែទាំហេដ្ឋារចនាសម្ព័ន្ធ ប្រកបដោយសុវត្ថិភាពនិងតម្លាភាពផងដែរ៕
Source: Kampuchea Thmey Daily
0 Comments