វ៉ែន សុវណ្ណ អ្នកប្រដាល់ជើងចាស់ក្លិបកងកេងមានរិទ្ធ មកពីខេត្តបាត់ដំបង នឹងត្រូវជួបប្រកួតសាកកណ្តាប់ដៃជាមួយអ្នកប្រដាល់ជប៉ុនTakaya នាព្រឹកថ្ងៃអាទិត្យទី១០ ខែមិថុនា ឆ្នាំ២០១៨នេះ នៅលើសង្វៀនBoostrong Fighter On Fire របស់SEATV ។ វ៉ែន សុវណ្ណ និង Takaya នឹងប្រកួតគ្នាក្នុងប្រភេទទម្ងន់៧១គីឡូក្រាម។
អ្នកប្រដាល់ជប៉ុន Takaya នេះ ជាអ្នកប្រដាល់ម្នាក់ដែលហ្វឹកហាត់នៅប្រទេសថៃហើយគេមិនធ្លាប់ដែលមកប្រកួតនៅកម្ពុជានោះទេកន្លងមក ។ ជើងថ្មីជប៉ុនរូបនេះ មានប្រវត្តិលើរេញ តែ៤៣លើកប៉ុណ្ណោះ ក្នុងនោះវាយឈ្នះ៣៤លើក ចាញ់០៩លើក មិនដែលស្មើ។
ឆ្លងកាត់ការប្រកួតប៉ុននេះ Takaya ប្រហែលជាទប់ជាមួយវ៉ែន សុវណ្ណ មិនបាននោះឡើយ ព្រោះសុវណ្ណ ជាអ្នកប្រដាល់ជើងខ្លាំងជើងចាស់ ។ គេមានស្នៀតប្រដាល់ល្អ ហើយទិចនិចប្រកួតរបស់គេ ក៏ខ្ពស់និងមានកលល្បិចច្រើនដែរ ដែលមិនអាចអោយTakayaយកឈ្នះបាននោះឡើយ។
តែយ៉ាងណា វ៉ែន សុវណ្ណ គេមានវ័យច្រើន ហើយកម្លាំងស៊ុហ្វ ក៏មិនជាខ្លាំងនិងរឹងមាំដូចពីមុននោះដែរ ។ គេធ្លាប់វាយឈ្នះថៃដោយពិន្ទុK.Nongsiklek កាលពីពេលកន្លងមកនៅសង្វៀនអាស៊ីអាគ្នេយ៍នេះ ។ ប៉ុន្តែ ប្រកួតចុងក្រោយនេះជាមួយអ្នកប្រដាល់រួមជាតិ តូច ទូ សមាគមកីឡាប្រដាល់ក្រសួងការពារជាតិ គឺចាញ់ដោយពិន្ទុ។
ទោះជាយ៉ាងណា វ៉ែន សុវណ្ណ មិនទាន់ប្រាកដថាឈ្នះTakaya នោះទេ ត្បិតសុវណ្ណអាចចាញ់កម្លាំងស៊ុហ្វជប៉ុន។ ប៉ុន្តែរឿងឈ្នះចាញ់ មិនអាចកំនត់មុនបាននោះឡើយ។ ចាំមើលរវាងវ៉ែន សុវណ្ណ និង Takaya តើនរណាឈ្នះ ?។
នីម នន អ្នកប្រដាល់ក្លិបកងពលតូចទ័ពឆ័ត្រយោង៩១១ ត្រូវជួបប្រកួតជាមួយផាត សូដា អ្នកប្រដាល់ក្លិបអេភូថងកីឡា។ ពីរនាក់នេះ ប្រកួតគ្នាក្នុងប្រភេទទម្ងន់៥៧គីឡូក្រាម ។ពីរនាក់នេះ ពុំធ្លាប់ដែលជួបគ្នាទេកន្លងមក។
នីម នន ជាជើងខ្លាំងស្រករក្រោយ នៅក្នុងប្រភេទទម្ងន់នេះ។ គេឡើងប្រកួតជាងដប់ប្រកួតចុងក្រោយនេះ គឺវាយចាញ់តែ២ប្រកួតប៉ុណ្ណោះ។ ការប្រកួតចុងក្រោយនេះ វាយឈ្នះថាន់ ប៊ុនរ៉ុង អ្នកប្រដាល់សមាគមកីឡាប្រដាល់ក្រសួងការពារជាតិដោយពិន្ទុ។
ចាំមើល រវាងនីន នន និង ផាត់ សូដា តើនរណាជាអ្នកឈ្នះក្នុងការជួបគ្នានេះ ?។ ផាត់ សូដា ប្រកួតលើកចុងក្រោយនេះ វាយចាញ់លាភ រដ្ឋា អ្នកប្រដាល់ក្លិបអង្គរមានជ័យ ខេត្តសៀមរាប ដោយពិន្ទុ។
ចំណែក អ្នកប្រដាល់ជើងថ្មីធន់ អៀងឡៃ សមាគមកីឡាប្រដាល់ក្រសួងការពារជាតិ ត្រូវគេផ្គូអោយជួបប្រកួតជាមួយអ្នកប្រដាល់ជើងថ្មីដូចគ្នា គឺអាន ទាវ ក្លិបយុវវាលស្បូវខណ្ឌច្បារអំពៅ ដោយជួបក្នុងទម្ងន់៥៤គីឡូក្រាម។ អ្នកប្រដាល់ទាំងពីរនាក់នេះ ក៏មិនធ្លាប់ប៉ះគ្នាដែរកន្លងមក។ រវាងអ្នកប្រដាល់ទាំងពីរនេះ មានសមត្ថភាពប្រហាក់ប្រហែលគ្នាទេ គ្រាន់តែអាន ទាវ គេមានកាយវិការរហ័សរហួនជាងធន់ អៀងឡៃ។ ប៉ុន្តែមិនប្រាកដថា ឈ្នះនោះទេ ព្រោះអៀងឡៃ គេក៏មានផ្លែល្អ និងកម្លាំងខ្លាំងជាងដែរ ។ ចាំមើល តើនរណារវាងធន់ អៀងឡៃ និង អាន ទាវនេះ ?៕
Source: Kampuchea Thmey Daily
0 Comments