ខឹង​រថយន្ត​មិន​ជៀស​ផ្លូវ ត្រូវ​ក្មេង​ទំនើង​គប់​បែក​កញ្ចក់

កំពង់ចាម ​៖ ​​កម្លាំង​សមត្ថកិច្ច នគរបាល​ក្រុង កំពង់ចាម បាន​ឃាត់ខ្លួន​ក្មេង​ទំនើង​ម្នាក់​ក្នុងចំណោម​បក្សពួក​៣​នាក់ បន្ទាប់ពី​បានធ្វើ​សកម្មភាព គប់​កញ្ចក់​រថយន្តក្រុង​ដោយសារ ខឹង រថយន្ត​មិន​ជៀវ​ផ្លូវ​អោយ។

ប៉ូលិស បានអោយដឹងថា ករណី​បំផ្លិចបំផ្លាញ​ទ្រព្យសម្បត្តិ នេះ ​បានកើត​ទ្បើង​នៅ ថ្ងៃទី​៣១ ខែឧសភា ឆ្នាំ​២០១៨ វេលា​ម៉ោង​២១ និង​២០ នាទី នៅ​ចំណុច​មុខ​ប៉ុស្តិ៍នគរបាល​រដ្ឋបាល​ស​ង្កា​ត់​កំពង់ចាម ស្ថិតក្នុង​ភូមិ​ទី​១៥ សង្កាត់​កំពង់ចាម ក្រុង​កំពង់ចាម ខេត្តកំពង់ចាម។​

ករណីនេះ​បង្កឡើង​ដោយ​ក្មេងស្ទាវ ១ក្រុម មាន​គ្នា​៣​នាក់ ជិះ​ម៉ូតូ ២​គ្រឿង ម៉ាក​វ៉េ​វ ពណ៌​ខ្មៅ និង ១​គ្រឿង​ទៀត​ម៉ាក​វ៉េវ​ពណ៌​ខៀវ បាន​ធ្វើ​សកម្មភាព​យក​ដុំ​ថ្ម​គប់​ទៅលើ​រថយន្តក្រុង​មួយ​គ្រឿង​ទៀត​ពាក់​ស្លាក​លេខ កំពង់ចាម ៣A៦២៩៧ ជា​កម្ម​សិទ្ធិ​របស់​ឈ្មោះ ហូ ប៉ាច ភេទ​ប្រុស អាយុ ៤៨​ឆ្នាំ ជាតិខ្មែរ មុខរបរ​បើកបរ មាន​ទីលំនៅ ភូមិ​ចុង​ថ្នល់​១ សង្កាត់​បឹង​កុក ក្រុង​កំពង់ចាម ខេត្តកំពង់ចាម បណ្ដាលអោយ​បែក​កញ្ចក់​មុខ​ខាងឆ្វេង ខណៈ​ពេលដែល​កំពុង​ធ្វើ​ចរាចរណ៍​តាម​ដងផ្លូវ​។​

ប៉ូលិស​បានអោយដឹងថា ភ្លាមៗ​នោះ​កម្លាំង​ប៉ុស្តិ៍​នគរបាល​រដ្ឋបាល​កំ​ពង់​ចាម បាន​ដេញតាម​ធ្វើការ​បង្ក្រាប និង​ឃាត់ខ្លួន​ជនសង្ស័យ​១​នាក់​ឈ្មោះ វ៉ាន់ ដារ​ត្ន័ ភេទ​ប្រុស អាយុ​២៣​ឆ្នាំ នៅ​ភូមិ​ទួល​រកា​ ឃុំ​រអាង ស្រុក​កំពង់សៀម ខេត្តកំពង់ចាម​។​

ចំណែក​បក្ខពួក២​នាក់​ទៀត​បាន​រត់គេច​ខ្លួន​បាត់​1.​ឈ្មោះ តួ អាយុ 23 ឆ្នាំ រស់នៅ​ភូមិ​ទួល​រកា ឃុំ​រអាង ស្រុក​កំពង់សៀម ខេត្តកំពង់ចាម។ 2.​ឈ្មោះ ឃ្លី ភេទ ប្រុស អាយុ​២៣​ឆ្នាំ នៅ​ភូមិ​ថ្មគោល ស្រុក​កំពង់សៀម ខេត្តកំពង់ចាម។

ប៉ូលិស​បានអោយដឹងថា ​ជនសង្ស័យ​ឈ្មោះ​វ៉ាន់ដារ​ត្ន័​ ត្រូវ​បាន ឃាត់​ខ្លួន​បញ្ជូន​មកកាន់​អធិការដ្ឋាន​នគរបាល​ក្រុង​កំពង់ចាម ដើម្បី​សាកសួរ និង​កសាង​សំណុំរឿង​តាម​នីតិវិធី៕



Source: Kampuchea Thmey Daily