ព្រឹទ្ធសភាកាណាដា បានអនុម័តច្បាប់មួយកាលពីថ្ងៃព្រហស្បតិ៍ដើម្បីធ្វើឲ្យការប្រើប្រាស់កញ្ឆាក្លាយទៅជារឿងស្របច្បាប់ ដែលជាហេតុធ្វើឲ្យខ្លួនកាន់តែខិតទៅជិតក្លាយទៅជាសមាជិកដំបូងគេនៃក្រុមប្រទេសទាំងប្រាំពីរ ដែលប្រែក្លាយផលិតកម្ម ការលក់ និងការប្រើប្រាស់គ្រឿងញៀនក្លាយទៅជារឿងស្របច្បាប់។
សេចក្តីព្រាងច្បាប់ C-45 ឬច្បាប់កញ្ឆាបានឆ្លងកាត់ព្រឹទ្ធសភាដោយសំឡេងគាំទ្រ៥២ទល់នឹង៣០ខណៈដែលមាន១អនុបវាទបន្ទាប់ពីការពិភាក្សាលើការធ្វើឲ្យស្របច្បាប់រយៈពេលរាប់ខែ។
ច្បាប់កញ្ឆានឹងវិលត្រឡប់ទៅសភាវិញដែលធ្លាប់បានអនុម័តច្បាប់នេះកាលពីខែវិច្ឆិកាឆ្នាំ២០១៧ប៉ុន្តែចាំបាច់ត្រូវមានការចុះហត្ថលេខាលើការផ្លាស់ប្តូរដែលធ្វើឡើងដោយព្រឹទ្ធសភា។
ច្បាប់នេះគឺជាការសន្យាអំឡុងពេលយុទ្ធនាការឃោសនាឆ្នាំ២០១៥របស់លោកនាយករដ្ឋមន្ត្រី Justin Trudeau ដែលបានសារភាពថា ធ្លាប់បានជក់កញ្ឆាជាមួយមិត្តភក្តិ “ប្រាំទៅប្រាំមួយដង”។
កាលវិភាគដំបូងសម្រាប់ការលក់កញ្ឆាដាក់ក្នុងកែវគឺនៅទិវាជាតិកាណាដាថ្ងៃទី១ខែកក្កដា។
ការលក់កញ្ឆាសម្រាប់ផ្នែកវេជ្ជសាស្ត្រគឺស្របច្បាប់នៅក្នុងប្រទេសកាណាដាចាប់តាំងពីឆ្នាំ២០០១មកម្ល៉េះ។
សេចក្តីព្រាងច្បាប់ C-45 នឹងអនុញ្ញាតឲ្យបុគ្គលអាយុលើសពី១៨ឆ្នាំអាចកាន់កាប់កញ្ឆារហូតដល់ទៅ៣០ក្រាមសម្រាប់ការប្រើប្រាស់ផ្ទាល់ខ្លួន។
ការលក់ទៅឲ្យអ្នកដែលមានអាយុក្រោម១៨ឆ្នាំនឹងត្រូវបានហាមឃាត់នៅក្រោមច្បាប់សហព័ន្ធប៉ុន្តែខេត្តនិងដែនដីទាំងឡាយអាចដាក់កំណត់អាយុផ្ទាល់ខ្លួនរបស់ពួកគេបាន។
ស្ថិតិកាណាដាបានប៉ាន់ប្រមាណថា ទីផ្សារនេះនឹងមានតម្លៃ៥.៧ពាន់លានដុល្លារកាណាដា (៤.៥ពាន់លានដុល្លារអាមេរិក) ដោយផ្អែកលើទិន្នន័យប្រើប្រាស់កាលពីឆ្នាំមុន។
គួរបញ្ជាក់ថា ប្រទេសអ៊ុយរ៉ាហ្គាយបានអនុម័តការប្រើប្រាស់កញ្ឆាកាលពី៥ឆ្នាំមុនហើយរដ្ឋចំនួន៩របស់អាមេរិកក៏អនុវត្តដូចនេះដែរប៉ុន្តែកាណាដានឹងក្លាយជាប្រទេសដំបូងគេក្នុងចំណោមប្រទេស G-7 ដែលបានធ្វើដូច្នេះ៕ AFP
Source: Kampuchea Thmey Daily
0 Comments