ភ្នំពេញ ៖ ព្រះបរមរាជវាំង បានចេញលិខិតមួយបញ្ជាក់ថា ព្រះរាជសាររបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលអំពាវនាវឲ្យប្រជាពលរដ្ឋទៅបោះឆ្នោតនោះ មិនមានការក្លែងក្លាយទេ ហើយក៏មិនបានធ្វើឡើងដោយមានការគំរាមកំហែងនោះដែរ នេះបើយោងតាមសេចក្តីប្រកាសព័ត៌មានរបស់ក្រសួងព្រះបរមរាជវាំង។
សេចក្តីប្រកាសព័ត៌មានរបស់ក្រសួងព្រះបរមរាជវាំង ចុះថ្ងៃទី០៨ ខែមិថុនា ឆ្នាំ២០១៨ បានឲ្យដឹងថា នៅប៉ុន្មានថ្ងៃចុងក្រោយនេះ មានជនអគតិបានចោទប្រកាន់ថា មានការក្លែងក្លាយលើ ព្រះរាជសាររបស់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ចុះថ្ងៃសុក្រ ទី៤កើត ខែជេស្ឋ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៨ ខែឧសភា ឆ្នាំ២០១៨ ដែលមានខ្លឹមសារអំពាវនាវដល់ជនរួមជាតិ អ្នកមានសិទ្ធិបោះឆ្នោតទាំងអស់ សូមអញ្ជើញទៅបោះឆ្នោតឲ្យបានគ្រប់ៗគ្នា ជ្រើសរើសតំណាងរាស្ត្រ នីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះសំដៅជ្រើសរើសអ្នកដឹកនាំប្រទេសជាតិថ្មី។
ក្រសួងព្រះបរមរាជវាំងបញ្ជាក់ថា “សូមប្រកាសជាព័ត៌មាន ជូនសាធារណជនជ្រាបថា ព្រះរាជសាររបស់ ព្រះករុណាព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុតខាងលើនេះ មិនមានការក្លែងក្លាយ និងមិនមានការគំរាមកំហែងឡើយ គឺជាព្រះរាជសារពិតប្រាកដ។ ក្រសួងព្រះបរមរាជវាំង សូមបដិសេធដាច់អហង្ការ និងច្រានចោលទាំងស្រុងនូវរាល់ការចោទប្រកាន់បំផ្លើស ប្រាសចាកការពិត”។
សូមបញ្ជាក់ថា ថ្មីៗនេះព្រះករុណាព្រះបាទ សម្ដេចព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជសារអំពាវនាវឱ្យប្រជាពលរដ្ឋគ្រប់រូបអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ដើម្បីជ្រើសរើសអ្នកដឹកនាំ អភិវឌ្ឍប្រទេសជាតិ ដោយកុំឲ្យមានការភ័យខ្លាច។
ព្រះរាជសារលើកឡើងថា “ការបោះឆ្នោតជ្រើសតាំងតំណាងរាស្ត្រនីតិកាលទី៦ និងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ មកនេះ។ ក្នុងឱកាសនេះ ខ្ញុំសូមអំពាវនាវជាឱឡារិកជូនជនរួមជាតិ អ្នកមានសិទ្ធបោះឆ្នោតទាំងអស់ សូមអញ្ជើញទៅបោះឆ្នោតឱ្យបានគ្រប់គ្រប់គ្នា ជ្រើសរើសអ្នកដឹកនាំប្រទេសជាតិ ដើម្បីអភិវឌ្ឍ និងការរីកចម្រើនរុងរឿងថ្កើងថ្កានលើគ្រប់វិស័យ”។
ព្រះរាជសាររបស់ព្រះមហាក្សត្របានលើកឡើងទៀតថា “ការបោះឆ្នោតនៅថ្ងៃអាទិត្យទី២៩ ខែកក្កដា ឆ្នាំ២០១៨ ខាងមុខ គឺជាការបោះឆ្នោតជាទូទៅ ជាសកលដោយសេរី ត្រឹមត្រូវ យុត្តិធម៌ តម្លាភាព និងដោយសម្ងាត់ ស្របតាមគោលការណ៍លទ្ធិប្រជាធិបតេយ្យសេរីពហុបក្ស។ ដូចនេះសូមកុំឲ្យមានការព្រួយបារម្ភពីការគាបសង្កត់ការគំរាមកំហែង ឬសម្លុតពីជនណាម្នាក់ឬបក្សនយោបាយណាមួយឲ្យសោះ។ ខ្ញុំសូមជនរួមជាតិទាំងអស់មេត្តាប្រើសិទ្ធិសេរីភាពបោះឆ្នោតទៅតាមសតិសម្បជញ្ញៈរបស់ខ្លួនម្នាក់ៗតើមានទំនុកចិត្តទៅលើបេក្ខជនណាម្នាក់គណបក្សនយោបាយណាមួយដោយសេរី”។
ក្រោយពីព្រះរាជសារនេះ ត្រូវបានផ្សព្វផ្សាយជាសាធារណៈ ស្រាប់តែលោក សម រង្ស៊ី ដែលកំពុងរស់នៅឯបរទេស គេចចេញពីការតាមចាប់ខ្លួនរបស់សមត្ថកិច្ចកម្ពុជានោះ ចេញមកអះអាងថា ជាព្រះរាជសារក្លែងក្លាយ និងធ្វើឡើងក្រោមការគំរាមកំហែង៕
Source: Kampuchea Thmey Daily
0 Comments