កម្មករ កម្មការិនីរោងចក្រកាត់ដេរហ្វឺសហ្គាវ័ន្ត ទទួលបានប្រាក់បុរេប្រទានពីរាជរដ្ឋាភិបាល ខណៈថៅកែរត់ចោលតាំងពីឆ្នាំ២០១៧

ភ្នំពេញ ៖ កម្មករនិងកម្មការិនី ដែលបម្រើការនៅរោងចក្រកាត់ដេរ ហ្វឺសហ្គាវ័ន មានទីតាំងនៅតាមបណ្តោយផ្លូវជាតិលេខ២ ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីព្រឹកថ្ងៃទី៨ ខែមិថុនានេះ បានទទួលប្រាក់បុរេប្រទានពីរាជរដ្ឋាភិបាលចំនួន២០០,០០០ដុល្លារសម្រាប់បើកយកទៅដោះស្រាយជីវភាព ខណៈពេលដែលថៅកែក្ស័យធនរួចរត់ចោលមិនទទួលខុសត្រូវលើប្រាក់ខែកម្មករ កម្មការិនីតាំងពីខែធ្នូ ឆ្នាំ២០១៧មកម្ល៉េះ។

ការនាំយកប្រាក់បុរេប្រទានពីរាជរដ្ឋាភិបាលចំនួន២០០,០០០ដុល្លារមកបើកជូនដល់ដៃកម្មករកម្មការិនី ចំនួន៣៥២នាក់នេះ គឺក្រោមអធិបតីភាពលោកប្រាក់ ចាន់ធឿន អគ្គលេខាធិការដ្ឋានក្រសួងការងារនិងជាប្រតិភូរាជរដ្ឋាភិបាលទទួលបន្ទុកដោះស្រាយកូដកម្ម បាតុកម្មតាមមុខសញ្ញារាជធានីភ្នំពេញព្រមទាំងថ្នាក់ដឹកនាំក្រសួងពាក់ព័ន្ធរួមទាំងអាជ្ញាធរតំណាងអាជ្ញាធរដែនដីទៀតផង។

យោងតាមប្រសាសន៍របស់លោក ពេជ្រ កែវមុនី អភិបាលនៃគណៈអភិបាលខណ្ឌមានជ័យបានឲ្យកម្ពុជាថ្មីដឹងថា កម្មករ និងកម្មការិនី រោងក្រកាត់ដេរ ហ្វឺសហ្គាវ័ន្ត ត្រូវបានថៅកែរត់ចោល មិនបើកប្រាក់ខែឲ្យតាំងពីខែធ្នូឆ្នាំ២០១៧មកម្ល៉េះ។ ចាប់តាំងពីពេលនោះមក បងប្អូនកម្មករ កម្មការិនីទាំង៣៥២នាក់ បាននាំគ្នាធ្វើកូដកម្ម ព្រមទាំងចងតង់សម្រាកមុខរោងចក្រទាំងថ្ងៃទាំងយប់ព្រោះខ្លាចខាងភាគីថៅកែមកដឹកសម្ភារៈចេញមុនពេលមិនទាន់ដោះស្រាយប្រាក់បៀវត្សរ៍ជូនដល់កម្មករកម្មការិនីទាំង៣៥២នាក់។ តែជាភ័ព្វសំណាងរបស់បងប្អូនកម្មករ កម្មការិនី គឺក្រសួងពាក់ព័ន្ធ និងអាជ្ញាធរដែនដីយើងខ្ញុំបានធ្វើសេចក្តីរាយការណ៍ទៅតាមថា នានានុក្រម ហើយជាងនេះគឺបានទៅដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសម្តេចបានផ្តល់ប្រាក់បុរេប្រទានចំនួន២០០,០០០ដុល្លារសម្រាប់បើកជូនដល់ដៃកម្មករនិងកម្មការិនីទាំង៣៥២នាក់មិនឲ្យបាត់បង់សូម្បីតែម្នាក់។

លោកពេជ្រ កែវមុនី តំណាងឲ្យបងប្អូនកម្មករកម្មការិនីទាំង៣៥២នាក់ក៏ដូចជាអាជ្ញាធរដែនដីសូមសំដែងនូវការដឹងគុណដល់សម្តេចអគ្គមហាសេនាបតីតេជោ ហ៊ុន សែន ដែលសម្តេចបានយកចិត្តទុកដាក់ជួយដល់បងប្អូនកម្មករកម្មការិនីឲ្យទទួលបានប្រាក់បៀវត្សរ៍ដើម្បីយកទៅប្រើប្រាស់ ខណៈពេលកម្មករទាំងអស់កំពុងអស់ក្តីសង្ឃឹមព្រោះតែថៅកែក្ស័យធន។ ប៉ុន្តែការក្ដីសង្ឃឹមរបស់កម្មករកម្មការិនីបានកើតឡើងវិញ បន្ទាប់ពីសម្តេចតេជោបានសម្រេចផ្តល់ប្រាក់បុរេប្រទានដើម្បីបើកជូនដល់ដៃកម្មករកម្មការិនីទាំង៣៥៣នាក់ ដោយគ្មានខ្វះម្នាក់ណាឡើយ។ បងប្អូនកម្មករកម្មការិនីដែលទទួលបានប្រាក់បុរេប្រទានគ្រប់ៗគ្នារួចមកពួកគេនាំគ្នាសប្បាយចិត្តមុខរីកដូចគ្រាប់ជី និងសន្យាបោះឆ្នោតជូនគណបក្សប្រជាជនកម្ពុជាឲ្យទទួលបានជ័យជំនះដើម្បីឲ្យសម្តេចតេជោដឹកនាំប្រទេសជាតិយើងទទួលបានសុខក្សេមក្សាន្តជារៀងរហូត៕