កីឡាករ ង៉ែត លីទី ម្ចាស់អាវលេខ២៦ ប្រចាំក្លិបបាល់ទាត់ចន្ទបុរី (Chanthaburi FC) សមាជិកពានរង្វាន់បាល់ទាត់លីគលំដាប់ទី៤របស់ប្រទេសថៃ (Thai League 4) ក្នុងរដូវកាលថ្មី២០១៨ ពេលនេះរូបគេ បានធ្វើដំណើរត្រឡប់មកកាន់មាតុភូមិដើម្បីធ្វើតេស្តជាមួយក្លិបឆ្នើមមួយនៅក្នុងលីគកំពូលកម្ពុជា Metfone Cambodian League 2018។
យោងតាមប្រភពស្និទ្ធស្នាលមួយបានបញ្ជាក់ថា ង៉ែត លីទី បានធ្វើតេស្តជាផ្លូវការជាមួយក្លិបបាល់ទាត់ក្រសួងការពារជាតិ មួយរយៈហើយ ដែលក្លិបនេះក្រោមការដឹកនាំពីសំណាក់លោក ភា សុភត្រា ជាអតីតគ្រូបង្វឹកផ្ទាល់របស់គេកាលពីពេលកន្លងទៅផងដែរ។ នៅមិនទាន់មានដំណឹងច្បាស់ការបន្ថែមណាមួយពីក្លិបក្រសួងការពារជាតិ ចំពោះកីឡាករមកពីខេត្តប៉ៃលិន រូបនេះនៅក្នុងបញ្ជីនោះទេ ខណៈនៅសល់ជិត១០ថ្ងៃទៀតទីផ្សារដោះដូរកីឡាករក្នុងស្រុកជើងទី២នឹងបិទទ្វារទៅហើយ។
សូមរំលឹកថា ខ្សែប្រយុទ្ធរួបនេះធ្លាប់ហ្វឹកហាត់នៅក្លិបបឹងកេតអំឡុងឆ្នាំ២០១៦ ហើយនៅឆ្នាំ២០១៧ រូបគេក៏ចាកចេញពីបាល់ទាត់អាជីព និង បានចំណាយពេលជួយលេងឲ្យក្រុមពាក់កណ្ដាលអាជីពអាណាចក្របៃតងមួយរយៈទាំងទីលានបាល់ទាត់ធំមានស្មៅ និងក្នុងពានរង្វាន់បាល់ទាត់ហ្វូតសាល។ កាលពីដើមឆ្នាំ២០១៨ រូបគេបានធ្វើដំណើរទៅធ្វើតេស្តជាមួយក្លិបមួយចំនួននៅប្រទេសថៃ ហើយក៏ជាប់ឈ្មោះជាផ្លូវការជាមួយក្លិបចន្ទបុរី នេះតែម្តង។
ក្លិបចន្ទបុរី ជាក្លិបបាល់ទាត់នៅលីគលំដាប់ទី៤របស់ថៃ បង្កើតឡើងតាំងពីឆ្នាំ២០០៤មកម្ល៉េះដោយប្រើប្រាស់កីឡដ្ឋានខេត្តរបស់ខ្លួនធ្វើជាទឹកដីសម្រាប់ប្រកួត។ ក្លិបនេះធ្លាប់មានប្រវត្តិជោគជ័យបំផុតគឺចាប់ពីឆ្នាំ២០០៦ដល់២០១២ ជាសមាជិកក្នុងពានរង្វាន់លីគកំពូលរបស់ប្រទេសថៃ ប៉ុន្តែក្រោយៗមកក៏ធ្លាក់រហូតដល់លីគលំដាប់ទី៤នេះតែម្តង។ ក្រុមនេះមានលោក Jirachai Khainongbua ជាប្រធានក្លិបហើយលោក Arthit Onkam ជាគ្រូបង្វឹក។
ជាផ្លូវការកីឡាករ ង៉ែត លីទី ជាកីឡាករកម្ពុជា ទី១ដំបូងគេដែលទៅប្រកួតអាជីពនៅប្រទេសថៃ ក្នុងរដូវកាលនេះ ខណៈថ្មីៗនេះកីឡាករ ឃួន ឡាបូរ៉ាវី ជាកីឡាករទី២ ដែលចេញទៅលេងនៅក្លិប Sarat Thuni សមាជិកពានរង្វាន់លីគលំដាប់ទី៣ប្រទេសថៃ ក្នុងជើងទី២ប៉ុណ្ណោះ៕
Source: Kampuchea Thmey Daily
0 Comments