តាកែវ ៖ បុរសម្នាក់ បានស្លាប់ភ្លាមៗនៅនឹងកន្លែង កើតហេតុ បន្ទាប់ពីបើកម៉ូតូរ៉ឺម៉កដឹកបន្លែយកទៅលក់ ហើយបានបុកជាមួយរថយន្ត។
ហេតុការណ៍គ្រោះថ្នាក់ចរាចរណ៍នេះ បានកើតឡើង ក្នុងអំឡុងម៉ោង០៣និង៤០នាទីទៀបភ្លឺថ្ងៃទី២០ ខែមិថុនា ឆ្នាំ២០១៨ ស្ថិតនៅតាមបណ្ដោយផ្លូវជាតិលេខ២ ត្រង់ចន្លោះគីឡូម៉ែត្រលេខ១០៣-១០៤ នៅក្នុងភូមិដំណាក់ ឃុំពេជសារ ស្រុកកោះអណ្តែត ខេត្តតាកែវ។ ប្រភពពីសមត្ថកិច្ច ដែលបានចុះទៅដល់កន្លែងកើតហេតុ បានឲ្យដឹងថា ជនរងគ្រោះក្នុងករណីនេះ មានឈ្មោះ ណី សុខ ភេទប្រុស អាយុ២៩ឆ្នាំ មានទីលំនៅភូមិពោធិ៍ ឃុំព្រះបាទជាន់ជុំ ស្រុកគីរីវង់ ខេត្តតាកែវ។
សមត្ថកិច្ចបន្តថា ជនរងគ្រោះ បានបើកម៉ូតូរ៉ឺម៉កមានដឹកបន្លែពេញយកទៅលក់នៅផ្សារ ដោយធ្វើដំណើរក្នុងទិសដៅពីត្បូងទៅជើង ស្រាប់តែមកដល់កន្លែងកើតហេតុ ទំនងជាជនរងគ្រោះងងុយដេកងោកមួយភាំង ក៏ជ្រុលម៉ូតូរ៉ឺម៉កទៅបុកនឹងរថយន្តធុនធំពីក្រោយ ទើបឃើញតែជនរងគ្រោះស្លាប់នៅនឹងកន្លែងតែម្នាក់ឯង ចំណែកម៉ូតូរ៉ឺម៉ករងការខូចខាតយ៉ាងដំណំ ក្រៅពីនោះពុំមានឃើញវត្ថុតាងអ្វីផ្សេងទេ។
ក្រោយកើតហេតុ សពជនរងគ្រោះ ត្រូវបានក្រុមគ្រួសារយកទៅធ្វើបុណ្យនៅគេហដ្ឋានតាមប្រពៃណី ចំណែករ៉ឺម៉កម៉ូតូ ត្រូវបានសមត្ថកិច្ចប្រគល់ជូនក្រុមគ្រួសារយកទៅវិញ ក្រោយពេលធ្វើកំណត់ហេតុចប់សព្វគ្រប់។ ដោយឡែករថយន្ត ដែលប៉ះនឹងម៉ូតូរ៉ឺម៉កជនរងគ្រោះមិនត្រូវបានស្គាល់ភិនភាគនោះទេ៕
Source: Kampuchea Thmey Daily
0 Comments