ក្រុមចម្រុះបាននិយាយថា កងកម្លាំងរដ្ឋាភិបាលយេមែន បានរឹបអូសយកព្រលានយន្តហោះ Hodeida ពីពួកឧទ្ទាម Huthiហើយ កាលពីថ្ងៃពុធ ដែលនេះជាជំហានដ៏សំខាន់មួយឆ្ពោះទៅរកការដណ្តើមមកវិញនូវទីក្រុងកំពង់ផែសមុទ្រក្រហមនេះ។
មេបញ្ជាការក្រុមចម្រុះសម្រាប់ឆ្នេរសមុទ្រក្រហមលោក Abdul Salaam al-Shehi បាននិយាយនៅក្នុងវីដេអូមួយ ដែលបង្ហោះដោយភ្នាក់ងារព័ត៌មាន WAM របស់ប្រទេសអារ៉ាប់រួមថា “ព្រលានយន្តហោះត្រូវបានបោសសម្អាតទាំងស្រុងហើយស្ថិតនៅក្រោមការគ្រប់គ្រង”។
កាលពីសប្តាហ៍មុន កងកម្លាំងរដ្ឋាភិបាលបានបើកការវាយលុកមួយដើម្បីបោសសម្អាតអ្នកប្រយុទ្ធក្រុមឧទ្ទាមចេញពីទីក្រុង Hodeida ដែលបានកាន់កាប់វាចាប់តាំងពីឆ្នាំ២០១៤មកម្ល៉េះដែលជាហេតុបង្កើនការព្រួយបារម្ភដល់អង្គការសហប្រជាជាតិចំពោះការដឹកជញ្ជូនជំនួយសំខាន់ៗនិងការនាំចូលចំណីអាហារពាណិជ្ជកម្មតាមរយៈច្រករបស់ទីក្រុងនេះ។
ព្រលានយន្តហោះនេះត្រូវបានគេបោះបង់ចោលប៉ុន្តែវាជាមូលដ្ឋានឧទ្ទាមដ៏ធំមួយដែលជាដីគោកមកពីផ្លូវឆ្នេរសមុទ្រចូលទៅកាន់ទីក្រុងពីភាគខាងត្បូង។
វាស្ថិតនៅចម្ងាយត្រឹមតែ៨គីឡូម៉ែត្រប៉ុណ្ណោះពីកំពង់ផែរបស់ទីក្រុងនេះដែលទ្រទ្រង់ការនាំចូលបីភាគបួនរបស់យេមែននិងផ្តល់ជាជំនួយដល់ជីវិតសម្រាប់មនុស្សប្រហែល២២លាននាក់។
បេសកជនអង្គការសហប្រជាជាតិលោក Martin Griffiths បានរៀបចំកិច្ចចរចារយៈពេល៤ថ្ងៃនៅក្នុងរដ្ឋធានី Sanaa ដែលកាន់កាប់ដោយពួកឧទ្ទាមក្នុងគោលបំណងបញ្ចៀសការប្រយុទ្ធគ្នាទាំងស្រុងសម្រាប់ទីក្រុងនេះប៉ុន្តែបានចាកចេញកាលពីថ្ងៃអង្គារដោយពុំបានប្រកាសអំពីការទម្លាយភាពទាល់ច្រកណាមួយឡើយ៕ AFP
Source: Kampuchea Thmey Daily
0 Comments