ក្មេងអាយុ១២ឆ្នាំ ជិះម៉ូតូ ទៅបុកម៉ូតូមួយគ្រឿងទៀត បណ្ដាលឲ្យរងរបួសធ្ងន់ស្រាល៤នាក់

ប៉ៃលិន ៖ កាលពីវេលាម៉ោង១២និង៣០នាទីរសៀលថ្ងៃទី២០ ខែមិថុនា ឆ្នាំ២០១៨ មានករណីគ្រោះថ្នាក់ចរាចរណ៍មួយ រវាងម៉ូតូ បុកជាម៉ូតូ ក្នុងស្ថានភាពបញ្ច្រាសទិសគ្នា បណ្តាលឲ្យមនុស្ស០៤នាក់ រងរបួសធ្ងន់/ស្រាល ត្រូវបានគេដឹកបញ្ជូនតាមរថយន្តទៅសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅភូមិសួនអំពៅកើត (ចំណុចទឹកផុស) ក្នុងសង្កាត់ប៉ៃលិន ក្រុងប៉ៃលិន ខេត្តប៉ៃលិន។

ប្រភពព័ត៌មាន ពីអាជ្ញាធរមូលដ្ឋាន បានឲ្យដឹងថា ៖ គ្រោះថ្នាក់ចរាចរណ៍ខាងលើ ជាការធ្វេសប្រហែសមួយ ដែលបណ្ដែតបណ្ដោយឲ្យក្មេងមិនទាន់គ្រប់អាយុបើកបរយានជំនិះ ដោយខ្វះការប្រុងប្រយ័ត្ន បង្កទៅជាគ្រោះថ្នាក់ចរាចរណ៍តែម្តង តើនរណាជាអ្នកទទួលខុសត្រូវ ចំពោះករណីនេះ។ ប្រភពព័ត៌មាន បានបន្តថា ៖ មុនពេលកើតហេតុ គេឃើញម៉ូតូមួយគ្រឿងម៉ាកHONDA dream ស៊េរីឆ្នាំ ២០០៩ ពណ៌ខ្មៅ ពាក់ស្លាកលេខ ប៉ៃលិន 1A-7631 ដោយជិះឌុបគ្នា០៣នាក់ ក្នុងទិសដៅពីលិចទៅកើត លុះដល់ចំណុចកើតហេតុ ក៏ស្រាប់ឃើញក្មេងប្រុសម្នាក់ ទំនងមិនទាន់គ្រប់អាយុ បានជិះម៉ូតូមួយគ្រឿង ម៉ាកHONDA Dream ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ប៉ៃលិន 1A-6352 ក្នុងទិសដៅបញ្ច្រាសទិសគ្នា ហើយបានបុកម៉ូតូ ដែលឌុបគ្នា០៣នាក់ ពេញទំហឹងត្រង់ចំហៀង បណ្តាលឲ្យដួលរងរបួសធ្ងន់/ស្រាលទាំងសងខាង។

ក្រោយពេលកើតហេតុអ្នករងរបួស ត្រូវបានរថយន្តរបស់មន្ទីរពេទ្យបង្អែកខេត្ត ដឹកទៅព្យាបាល ចំណែកសមត្ថកិច្ចចរាចរណ៍ នៃស្នងការនគរបាលខេត្ត បានចុះមកវាស់វែង ព្រមទាំងយកវត្ថុតាងម៉ូតូទាំងពីរ ទៅរក្សាទុកនៅស្នងការដ្ឋាននគរបាលខេត្តផងដែរ។

បើតាមប្រភពព័ត៌មាន ពីសមត្ថកិច្ចចរាចរណ៍ នៃស្នងការនគរបាលខេត្តប៉ៃលិន បានឲ្យដឹងដែរថា ៖ ករណីគ្រោះថ្នាក់ចរាចរណ៍ខាងលើ គឺបណ្តាលមកកត្តាមនុស្សបើកបរមិនប្រកាន់ស្ដាំ និងបើកលើសល្បឿនកំណត់ ដែលបង្កឡើងដោយក្មេងមិនទាន់គ្រប់អាយុ បើកបរលើផ្លូវសាធារណៈ បណ្ដាលឲ្យមានអ្នករងរបួសរហូតដល់០៤នាក់។ ប្រភពព័ត៌មាន បានបន្តថា ៖ អ្នកបើកបរម៉ូតូបង្កឈ្មោះ ឆាង នឿន ភេទប្រុស អាយុ១២ឆ្នាំ ជនជាតិខ្មែរ សញ្ជាតិខ្មែរ រស់នៅភូមិផ្ទះស្បូវ ឃុំស្ទឹងត្រង់ ស្រុកសាលាក្រៅ របួសធ្ងន់ ដោយជិះម៉ូតូម៉ាក HONDA Dream ស៊េរីឆ្នាំ២០១១ ពណ៌ខ្មៅ ពាក់ស្លាកលេខ ប៉ៃលិន 1A-6352 ម៉ូតូខូចខាតធ្ងន់ធ្ងរ។ ចំណែកជនរងគ្រោះទី១ឈ្មោះ វិន ភេទប្រុស អាយុ២២ ឆ្នាំ ជនជាតិខ្មែរ រស់នៅភូមិ/ឃុំកើតហេតុខាងលើ របួសស្រាល ដោយបើកបរម៉ូតូម៉ាក HONDA dream ស៊េរីឆ្នាំ ២០០៩ ពណ៌ខ្មៅ ពាក់ស្លាកលេខ ប៉ៃលិន 1A-7631 ខូចខាតធ្ងន់។ ទី២-ឈ្មោះ សំណាក់ ភេទស្រី អាយុ១៩ឆ្នាំ ជនជាតិខ្មែរ រស់នៅភូមិអាឡាំ ស្រុកកណ្តៀង ខេត្តពោធិ៍សាត់ អ្នករួមដំណើរ រស់នៅភូមិ/ឃុំជាមួយគ្នា របួសធ្ងន់។

បច្ចុប្បន្នវត្ថុតាង ត្រូវបានកម្លាំងជំនាញការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត យកមករក្សាទុកនៅស្នងការដ្ឋាននគរបាលខេត្តប៉ៃលិន ដើម្បីរង់ចាំធ្វើការដោះស្រាយ៕