កំពង់ស្ពឺ ៖ មុខសញ្ញាជនសង្ស័យដែលប្រព្រឹត្តចាប់រំលោភសេពសន្ថវៈលើនារីរងគ្រោះបានសម្រេចរួចរត់គេចខ្លួនអស់រយៈពេលជាង ៧ឆ្នាំ ត្រូវបានសមត្ថកិច្ចនគរបាលព្រហ្មទណ្ឌ នៃស្នងការដ្ឋានខេត្តកំពង់ស្ពឺចាប់ខ្លួនតាមដីកា។
មន្ត្រីនគរបាលព្រហ្មទណ្ឌខេត្តកំពង់ស្ពឺ បានប្រាប់ឲ្យដឹង នៅថ្ងៃទី២៨ ខែមិថុនា ឆ្នាំ២០១៨នេះថា ជនជាប់ចោទឈ្មោះ ហេង សុភ័ក្រណា ហៅ សុភ័ក្រណា ភេទប្រុស អាយុ ២៧ឆ្នាំ មុខរបរ លក់ដូរ ត្រូវបានកម្លាំងនគរបាលប្រទះឃើញរួចចាប់ខ្លួនតាមដីកាបង្គាប់ឲ្យចាប់ខ្លួនលេខ ១៩៧ ចុះថ្ងៃទី០៧ ខែមិថុនា ឆ្នាំ២០១១ របស់លោក អ៊ីវ បូរិន្ទ ចៅក្រមស៊ើបសួរ នៃសាលាដំបូងខេត្តកំពង់ស្ពឺ ពីបទៈ រំលោភសេពសន្ថវៈ ត្រង់ចំណុច ភូមិញ សង្កាត់កណ្តោលដុំ ក្រុងច្បារមន ខេត្តកំពង់ស្ពឺ។
សមត្ថកិច្ចបានឲ្យដឹងថា កាលពីថ្ងៃទី២៦ ខែមករា ឆ្នាំ២០១០កន្លងទៅ ជនជាប់ចោទឈ្មោះ ហេង សុភ័ក្រណា ហៅភ័ក្រណា បានធ្វើសកម្មភាពចាប់រំលោភសេពសន្ថវៈ លើនារីរងគ្រោះបានសម្រេច ដែលបានប្រព្រឹត្តត្រង់ចំណុច រមណីយដ្ឋានអំពែភ្នំ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។ បន្ទាប់ពីប្រព្រឹត្តបទល្មើសរំលោភខាងលើជនល្មើស បានរត់គេចខ្លួនបាត់រហូតអស់រយៈជាង ៧ឆ្នាំលុះវិលត្រឡប់មកផ្ទះវិញត្រូវបានចាប់ខ្លួនតែម្តង។
មន្ត្រីនគរបាលបានបញ្ជាក់ថា ក្រៅពីជាប់ចោទពីបទៈចាប់រំលោភសេពសន្ថវៈលើនារីជនរងគ្រោះ ជនសង្ស័យរូបនេះ ក៏មានដីកាបង្គាប់ឲ្យនាំខ្លួនលេខ ២០៥ ចុះថ្ងៃទី២១ ខែមិថុនា ឆ្នាំ២០១៧ របស់លោក ពេជ្រ ចិន្តា ចៅក្រមស៊ើបសួរសាលាដំបូងខេត្តកំពង់ស្ពឺ ជាប់ពាក់ព័ន្ធពីបទ: លួចដោយស្ថានទម្ងន់ទោស ដែលបានប្រព្រឹត្ត នៅភូមិដំបងវិញ ឃុំសង្កែសាទប ស្រុកឱរ៉ាល់ កាលពីថ្ងៃទី២០ ខែមីនា ឆ្នាំ២០១៧ កន្លងមក គេចខ្លួនបាត់។ ជនសង្ស័យមានស្រុកកំណើតនៅភូមិក្រាំងពលទេព ឃុំរកាធំ ស្រុកច្បារមន ខេត្តកំពង់ស្ពឺ។
សមត្ថកិច្ចបញ្ជាក់ថា ជនជាប់ចោទឈ្មោះ ហេង សុភ័ក្រណា ហៅ សុភ័ក្រណា លំនៅបច្ចុប្បន្ន នៅភូមិឫស្សីជ្រុំ ឃុំគោកព្រីង ស្រុកស្វាយជ្រុំ ខេត្តស្វាយរៀង។
នៅព្រឹកថ្ងៃទី២៨ ខែមិថុនា ឆ្នាំ២០១៨នេះ ជនជាប់ចោទត្រូវបានកម្លាំងសមត្ថកិច្ចជំនាញបានសាកសួរ និងកសាងសំណុំរឿងបញ្ជូនបញ្ជូនទៅកាន់តុលាការដើម្បីចាត់ការតាមនីតិវិធី៕
Source: Kampuchea Thmey Daily
0 Comments