លួច​គោ វា​គ្រាន់ គេ​ទាន់​អស់លក្ខណ៍

កំពង់ចាម​ ៖​ កម្លាំង​អធិការដ្ឋាន​នគរបាល​ស្រុក​កំពង់សៀម​ សហការ​ជាមួយ​ជំនាញ​នគរបាល​ព្រហ្មទណ្ឌ​ខេត្តកំពង់ចាម ​តាម​ចាប់ខ្លួន ​ជនសង្ស័យ ​ដែល​បាន​លួច​គោ ពី​ប្រជាពលរដ្ឋ​ដឹក​តាម​រថយន្ត បម្រុង​យក​ទៅលក់ ​និង​រៀបចំ​បញ្ជូន​ទៅ​ព្រះរាជអាជ្ញា។

ប្រភព​ព័ត៌មាន​នៅ​កន្លែង​កើតហេតុ បាន​ឲ្យ​ដឹង​ថា នៅ​ថ្ងៃទី​២៧ ​ខែមិថុនា ​ឆ្នាំ​២០១៨​ វេលា​ម៉ោង១០​ និង​០០​នាទី ​ នៅ​ភូមិ​ខែល​ជ័យ ឃុំ​អូរ​ស្វាយ ស្រុក​កំពង់សៀម ខេត្ត កំពង់ចាម មាន​ចោរលួច​គោ​ចំនួន ២​ក្បាល​ ដែល​ម្ចាស់​ចង​ឲ្យ​ស៊ី​ស្មៅ ហើយ​ដឹក​តាម​រថយន្ត​ចេញទៅ​បាត់។

ប៉ូលិស​បាន​អោយ​ដឹងថា ក្រោម​ការ​ដឹកនាំ បញ្ជា​ផ្ទាល់​របស់ លោក​ឧ​ត្ត​ម​សេនីយ៍​ទោ ឯម កុសល ស្នងការ​នគរបាល​ខេត្តកំពង់ចាម បាន​បញ្ជា​ដល់​កម្លាំង​ជំនាញ​ផែន​ការងារ​នគរបាល​ព្រហ្មទណ្ឌ សហការ​ជាមួយ​កម្លាំង​របស់​អធិការដ្ឋាន​នគរបាល​ស្រុក​កំពង់សៀម បើក​កិច្ចប្រតិបត្តិការ តាម​ប្រមាញ់ រហូតដល់​ចំណុច​ស្ពាន​ត្រស់ ស្ថិត​ក្នុង​ភូមិ​បាធាយ ឃុំ​បាធាយ ស្រុក​បាធាយ ខេត្តកំពង់ចាម ទើប​សមត្ថកិច្ច ចាប់​ឃាត់ខ្លួន​បាន​ជនសង្ស័យ​ចំនួន​២​នាក់ ​៖ 1-​ឈ្មោះ ឡេះ រ៉ូ​សេត ភេទ​ប្រុស​អាយុ​41 ឆ្នាំ ជាតិខ្មែរ​ឥស្លាម មានមុខ​របរ​លក់​-​ទិញ​គោ និង​កាប់​គោ​យកសា​ច់លក់ មាន​ស្រុកកំណើត ភូមិ​ព្រែក​តាន​ង់​ក្រៅ ឃុំ​ព្រែក​តាន​ង់ ស្រុក​កោះសូទិន ខេត្តកំពង់ចាម បច្ចុប្បន្ន​មាន​ទីលំនៅ​ផ្ទះ​លេខ​55 ក្រុមទី​2 គីឡូ​លេខ​9 សង្កាត់​ច្រាំង​ចំរេះ​ទី​1 ខណ្ឌ​ឬ​ស្សី​កែវ រាជធានី​ភ្នំពេញ។ 2-​ឈ្មោះ យ៉ា សា​កី ភេទ​ប្រុស ​អាយុ​41​ឆ្នាំ ជាតិខ្មែរ​ឥស្លាម មុខរបរ​មិន​ពិតប្រាកដ មាន​ទីលំនៅ​ភូមិ​ពង្រ ឃុំ​រកា​គយ ស្រុក​កងមាស ខេត្តកំពង់ចាម។

ប៉ូលិស​បាន​បន្ត​ថា ​ក្នុង​កិច្ច​ប្រតិបត្តិការ​នេះ ​សមត្ថកិច្ច​ បាន​ដកហូត​បាន​វត្ថុ​តាង​រួមមាន ​៖ 1-​រថយន្ត​01​គ្រឿង​ម៉ាក​នីសា​ន់ ហ្វ្រូ​ន ធា ពណ៌​ត្រីអ៊ី ពាក់​ស្លាក​លេខ​ ភ្នំពេញ 2AA-6730។ 2-​ដាវ​ចំនួន​01 3-​លិខិត​សុំ​អនុញ្ញាត​លក់​គោក្របី 06​សន្លឹក 4-​លិខិត​លក់ រថយន្ត​01​សន្លឹក​ 5-​កិច្ចសន្យាជួល​រថយន្ត​01​សន្លឹក 6-​កិច្ចសន្យាលក់​រថយន្ត ជូន​ម្ចាស់​ដើម​វិញ 01​សន្លឹក។

ប៉ូលិស​បាន​បញ្ជាក់​ថា ​បច្ចុប្បន្ន​វត្ថុតាង និង​ជនសង្ស័យ​ខាងលើ ត្រូវ​បាន​នាំមក​កាន់​អធិការដ្ឋាន​នគរបាល​ស្រុក​កំពង់សៀម ដើម្បី​សាកសួរ និង​កសាង​សំណុំរឿង​តាម​នីតិវិធី និ​ង​បញ្ជូនទៅ ព្រះរាជអាជ្ញា​អម​សាលាដំបូង​ខេត្តកំពង់ចាម ចាត់ការ​បន្ត៕



Source: Kampuchea Thmey Daily