ឡុង សុភី អ្នកប្រដាល់ជើងខ្លាំងនៃក្លិបសាលវ័ន្តកីឡា បានស្វាគមន៍ចំពោះអ្នកប្រដាល់ថៃPheach Aroun ដែលមកសុំសងសឹកវិញ នាល្ងាចថ្ងៃសៅរ៍ ទី៣០ ខែមិថុនា ឆ្នាំ២០១៨នេះ នៅលើសង្វៀនCarabao នៅ SEA-TV ។
ឡុង សុភី និង Pheach Aroun នឹងប្រកួតគ្នាក្នុងទម្ងន់៦៩គីឡូក្រាម ។ សុភីលើកនេះ ប៉ះចំជើងខ្លាំងហើយ ព្រោះអ្នកប្រដាល់ថៃរូបនេះ ថ្វីដ្បិតតែធ្លាប់ចាញ់ក្តី តែគេវាយខ្លាំងហើយ មានបច្ចេកទេស ប្រកួតល្អថែមទៀត។
Pheach Aroun នេះហើយ ដែលបានផ្តួលយកឈ្នះព្រំ សំណាង ក្លិបកងពលតូចទ័ពឆ័ត្រយោង៩១១ដោយពិន្ទុ ដល់ទីពីរលើក និងឈ្នះមាស ភារម្យ ក្លិបកងទ័ពជើងទឹកក្នុងទឹកទី២ផងដែរកន្លងមក ។ ប៉ុន្តែយ៉ាងណា អ្នកប្រដាល់ថៃរូបនេះ មកជួប ឡុងសុភី ៤លើក ឈ្នះ១ស្មើ១លើកនិងចាញ់សុភី២លើក ។ Pheach Aroun មានកំនត់ត្រាប្រកួតចំនួន៩៥លើក ឈ្នះ៨៣លើក ចាញ់១២លើក និងមិនដែលស្មើ ។
ទោះជាយ៉ាងណា ឡុង សុភី គេធ្លាប់ស្គាល់និងដឹងពីសមត្ថភាពរបស់ Pheach Aroun នេះអស់ហើយ រឿងអីដែលសុភីខ្លាចនោះ ។ សុភី ទើបតែផ្តួលអ្នកប្រដាល់ជើងខ្លាំងថៃSuper Chhai ដោយពិន្ទុ កាលពីថ្ងៃទី ២៤ មិថុនា ២០១៨កន្លងមកនេះ ។ គិតត្រឹមពេលនេះ សុភី គេជួបជាមួយបរទេសក្នុងការប្រកួតក្នុងប្រទេសជិត១០០លើកហើយ ដែលលទ្ធផលវាយឈ្នះច្រើនជាងចាញ់ ។
ឡុង សុភី គេមានផ្លែកណ្តាប់ដៃនិងជង្គង់ល្អ ហើយថែមទាំងមានកម្លាំងកាយសម្បទាល្អរឹងមាំ មិនចាញ់អ្នកប្រដាល់បរទេសឡើយ ។ ហើយបើប្រកួតជាមួយខ្មែរគ្នាឯងវិញ សុភីហាក់ដូចជារកដៃគូមិនបាននោះទេ ព្រោះគេឈ្នះរហូត ។
ឡុង សុភី មានចិត្តប្រដាល់ធំ មិនចេះខ្លាច មិនចេះញញើត គ្រាន់តែគេវាយរាងស្រាលៗ មួយៗដូចមាន់ចឹកស្រូវតែប៉ុណ្ណោះ ។ ទោះជាយ៉ាងនេះក្តី អ្នកប្រដាល់ថៃ Pheach Aroun មិនប្រាកដថា អាចសងសឹក ឡុង សុភីបានសម្រេចនោះឡើយ ។ ប៉ុន្តែយ៉ាងណា ឡុង សុភី ក៏មិនអាចមើលស្រាលអ្នកប្រដាល់ថៃនោះដែរ ។
សុភីមានប្រវត្តិប្រកួតប្រហែល១៥០លើក ដែលក្នុងចំនួននេះគេវាយឈ្នះ១១៤លើក ចាញ់២៧លើក និងស្មើ០៩លើក ហើយគេក៏ជាម្ចាស់ខ្សែក្រវាត់ច្រើនស្ថាប័ននៅក្នុងស្រុកខ្មែរនេះ ។ ចាំមើល តើ Pheach Aroun ឬ ឡុង សុភី ដែលឈ្នះក្នុងការជួបគ្នាលើកទី៥នេះ ។
ចំពោះខាំ ខ្លានាង អ្នកប្រដាល់ក្លិបរ៉ាហាប់ស្វាយប៉ាក ដែលត្រូវជួបជាមួយអ្នកប្រដាល់ថៃ Nok Krachieb នោះ មិនដឹងថាមានលទ្ធផលយ៉ាងណានោះទេ ? ។ ពីរនាក់នេះ ប្រកួតគ្នាក្នុងប្រភេទទម្ងន់៥១គ.ក្រ ។
អ្នកប្រដាល់ថៃ ដែលខាំ ខ្លានាង ត្រូវតស៊ូជាមួយនោះ ជាជើងខ្លាំងទម្ងន់៥១គ.ក្រនៅស្រុកថៃ ។ គេធ្លាប់មកប្រកួតនៅភ្នំពេញប៉ុន្មានលើកហើយកន្លងមក ។ Nok Krachib មានប្រវត្តិប្រកួត៨៥លើក ឈ្នះ៧៣លើក ចាញ់១២លើក និងមិនដែលស្មើ ។ សម្រាប់មកលើកនេះ មិនដឹងថា Nok Krachib អាចយកឈ្នះខាំ ខ្លានាង បានឬក៏អត់នោះដែរ? ។
ការប្រកួតជាមួយថៃលើកចុងក្រោយ ខាំ ខ្លានាង វាយឈ្នះKout Sakorn ដោយពិន្ទុ កាលពីថ្ងៃទី២៦ឧសភា២០១៨ ។ ខាំ ខ្លានាង មានប្រវត្តិប្រកួត៦៩លើក ក្នុងនោះវាយឈ្នះ៥៣លើក ចាញ់១៤លើក និងស្មើ០២លើក ។ ទោះជាយ៉ាងណា ការឈ្នះចាញ់រវាងខាំ ខ្លានាង និង Nok Krachib នេះ ពុំមាននរណាហ៊ានទាយមុនថាអ្នកណាឈ្នះនោះទេ ព្រោះថាខ្លានាង មិនស្គាល់ពីថ្វីដៃនិងប្រវត្តិរបស់អ្នកប្រដាល់ថៃនេះច្បាស់នៅឡើយ ។ហើយមួយទៀតអ្នកប្រដាល់ថៃរូបនេះ ជាជើងខ្លាំងនៅប្រទេសថៃផងនោះ ដូច្នេះមិនងាយស្រួលអោយ ខ្លានាង យកឈ្នះងាយៗនោះទេ ។
ចំពោះការប្រកួតរវាងអ្នកប្រដាល់រួមជាតិវិញ សេក គឹមសាន្ត អ្នកប្រដាល់ក្លិបអង្គរមានជ័យខេត្តសៀមរាប នឹងឡើងមកសងសឹក ង៉ែត វុធ អ្នកប្រដាល់ក្លិបកងពលតូចទ័ពឆ័ត្រយោង៩១១។ពួក គេពីរនាក់នេះ ជួបប្រកួតគ្នាក្នុងទម្ងន់៥៧គីឡូក្រាម ។សេក គឹមសាន្ត ធ្លាប់ចាញ់ង៉ែត វុធ ពីរដងហើយកន្លងមក ។ រីឯ សុខ វិរៈ អ្នកប្រដាល់ក្លិបសំរោងកោងខេត្តបាត់ដំបង ក៏នឹងឡើងមកសងសឹក ជាមួយ ផាន រះ អ្នកប្រដាល់ក្លិបតាព្រហ្មមានជ័យ ដោយប្រកួតគ្នាក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments