ក្រុមបាល់ទាត់ជម្រើសជាតិនារីកម្ពុជា ក្រោមការដឹកនាំពីសំណាក់លោក មាស សំអឿន ជាគ្រូបង្វឹក នៅព្រឹកថ្ងៃព្រហស្បតិ៍ ទី២៨ ខែមិថុនា ឆ្នាំ២០១៨នេះ បានធ្វើដំណើរចេញទៅប្រកួតជើងឯកប្រចាំតំបន់អាស៊ាន AFF Women's Championship 2018 ដែលនឹងធ្វើឡើងនៅប្រទេសឥណ្ឌូណេស៊ី។
មុនចេញដំណើរលោក មាស សំអឿន បានលើកឡើងថា កូនក្រុមរបស់លោកបានប្រមូលផ្តុំគ្នាជាផ្លូវការបានប្រហែល២សប្ដាហ៍មកហើយ ដោយលោកបានឃើញកូនក្រុមមានការរីកចម្រើនខ្លាំងគួរអោយកត់សម្គាល់។ អ្វីដែលលោកត្រូវពង្រឹងបន្ថែមទៅលើក្រុមទាំងមូលនោះគឺបច្ចេកទេសនៃការលេងបាល់ម្នាក់ៗ មុនមានការសហការជាក្រុមបានល្អ។ សម្រាប់ប្រកួតក្នុងវគ្គជម្រុះតាមពូលលោក មាស សំអឿន បានសម្លឹងឃើញថាក្រុមខ្លះជាគូប្រកួតតានតឹង ហើយក្រុមខ្លះអាចប្រដុំត្រសងគ្នា។
យោងតាមការបង្ហាញបញ្ជីឈ្មោះរបស់សហព័ន្ធកីឡាបាល់ទាត់កម្ពុជា នៅព្រឹកដំណាលគ្នាឃើញថាកីឡាការិនីទាំង២៣ដែលបានធ្វើដំណើរទៅប្រកួតនៅអន្តរជាតិលើកនេះមាន ពឿន គន្ធា, ហួត គឹមហុង, បាន ជាវៃ, សេនដ្រា ហៀល, មូល រស្មីផែ, កែប ទាន់សម័យ, លឹម សុជា, ហ៊ិន ស្រីអូន, ឆន ស្រីនិត, ជា សម្ឆស្ស, យ៉ិន យើន, ភឺន ស្រីល័ក្ខ, ស៊ិន ស្រីនាត, ឌី សុធា, កយ មួយកញ្ញា, ពេជ្រ យូឈុនអ៊ី, សំរ៉ិត និមល, ហ៊ា ស្រី ឡាស់, នន មិនា, ភឿ ធូ, គឹម ចាន់ថេត, តាំង មករា, ចាយ ស្រីលាប។
សូមបញ្ជាក់ថាពានរង្វាន់ AFF Women's Championship 2018 នឹងធ្វើឡើងនៅប្រទេសឥណ្ឌូណេស៊ី ខណៈក្រុមកម្ពុជា ស្ថិតក្នុងពូល A ជាមួយថៃ អូស្ត្រាលី ម៉ាឡេស៊ី ទីម័រខាងកើត ហើយពូល B មានវៀតណាម មីយ៉ាន់ម៉ា ហ្វីលីពីន សិង្ហបុរី និងម្ចាស់ផ្ទះឥណ្ឌូណេស៊ី។ តាមគម្រោងការប្រកួតធ្វើឡើងចាប់ពីថ្ងៃទី៣០ ខែមិថុនា ដល់ថ្ងៃទី ១៣ ខែកក្កដា ២០១៨លើទីលានកីឡដ្ឋាន Jakabaring Stadium ក្នុងទីក្រុងPalembang។
សម្រាប់គម្រោងប្រកួតនៅក្នុងវគ្គជម្រុះតាមពូលវិញ កម្ពុជា ត្រូវប៉ះទីម័រខាងកើត នៅវេលាម៉ោង៤ល្ងាចថ្ងៃទី៣០ ខែ មិថុនា ឆ្នាំ២០១៨ ហើយបន្តប៉ះក្រុមម៉ាឡេស៊ី នៅវេលាម៉ោង៧យប់ថ្ងៃទី២ ខែកក្កដា ឆ្នាំ២០១៨ ខណៈនៅថ្ងៃទី៤ ខែកក្កដា ឆ្នាំ២០១៨ ក្រុមកម្ពុជា ប៉ះថៃ នៅម៉ោង៤ល្ងាច និងចុងក្រោយកម្ពុជា ត្រូវប៉ះអូស្ត្រាលី នៅម៉ោង៤ល្ងាច ថ្ងៃទី៦ ខែកក្កដា ឆ្នាំ២០១៨៕
Source: Kampuchea Thmey Daily
0 Comments