កណ្តាល ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ជាប្រធានគណបក្សប្រជាជនកម្ពុជាបានអញ្ជើញជួបសំណេះសំណាលជាមួយមន្ត្រីថ្នាក់ដឹកនាំ គណបក្ស,គណពង្រឹងមូលដ្ឋាន ខេត្ត ក្រុង ស្រុក ឃុំ ភូមិ នៅទូទាំងខេត្តកណ្តាលប្រមាណ ៣.១៦៧នាក់ផងដែរ នាព្រឹកថ្ងៃទី២១ ខែមិថុនា នេះនៅ ទួលក្រសាំង ខេត្តកណ្តាល។
ប្រមុខគណបក្សប្រជាជនកម្ពុជា បានថ្លែងដោយការសំដែងនូវការរីករាយចំពោះវត្តមានសមាជិក សមាជិកាគណបក្សប្រជាជនកម្ពុជាទូទាំងខេត្តកណ្តាល។ សម្តេចតេជោបានវាយតម្លៃខ្ពស់ចំពោះកិច្ចខិតខំ ប្រឹងប្រែងរបស់សមាជិក សមាជិកា ទាំងអស់នាពេលកន្លងមក ដើម្បីនាំមកនូវជោគជ័យថ្មីៗសម្រាប់គណបក្ស និង ប្រទេសជាតិយើងទាំងមូល។
បើយោងតាមខ្លឹមសារដែលត្រូវបានបង្ហោះដោយផេកហ្វេសប៊ុករបស់សម្តេចតេជោ ហ៊ុន សែន នៅថ្ងៃនេះបានឲ្យដឹងថា សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា បច្ចុប្បន្នរាជរដ្ឋាភិបាលកម្ពុជាបានខិតខំលើការធ្វើការកំណែទម្រង់នៃបញ្ហាសំខាន់ជាច្រើន ដើម្បីឲ្យការរស់នៅរបស់ប្រជាពលរដ្ឋកម្ពុជាយើងកាន់តែសុខស្រួល និងមានជីវភាពល្អប្រសើរដូចជាថ្មីៗនេះដែលរាជរដ្ឋាភិបាលបានធ្វើការដំឡើងប្រាក់ខែដល់មន្ត្រីរាជការជាបន្តបន្ទាប់។ ចាប់ពីឆ្នាំ២០១៩ទៅប្រាក់ខែមន្ត្រីរាជការមិនតិចជាង១លានរៀលនោះទេ។ ស្របពេលជាមួយគ្នានេះ រាជរដ្ឋាភិបាលក៏បានខិតខំធ្វើការកំណែទម្រង់ទាំថ្នាក់ក្រោម និងថ្នាក់លើ ទាក់ទងទៅនឹងបញ្ហាសំខាន់ៗមួយចំនួនទៀតដូចជាប្រព័ន្ធហិរញ្ញវត្ថុ, កំណែទម្រង់សេវាសាធារណៈ និងកំណែទម្រង់លើវិស័យផ្សេងៗជាច្រើនទៀត។ លើសពីនេះទៅទៀតសម្ដេចតេជោ បានសង្កត់ធ្ងន់ចំពោះ សមាជិក សមាជិកា គណបក្សប្រជាជនកម្ពុជាទាំងអស់ ត្រូវយកចិត្តទុកដាក់បម្រើប្រជាពលរដ្ឋឲ្យបានល្អ ត្រូវដោះស្រាយបញ្ហាប្រឈមនានា ដែលកើតមានឲ្យបានលឿន និងមានប្រសិទ្ធភាព។
សម្តេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅចំពោះសមាជិក សមាជិកា គណបក្សប្រជាជនកម្ពុជាទាំងអស់ ដែលកន្លងមកតែងតែគោរពស្រលាញ់ចំពោះសម្តេចផ្ទាល់ និងតែងតែបោះឆ្នោតជូនគណបក្សប្រជាជនកម្ពុជាជាបន្តបន្ទាប់រហូតមក។ សម្តេចតេជោក៏បានជូនពរដល់សមាជិក សមាជិកាទាំងអស់ សូមជួបតែសេចក្តីសុខសេចក្តី សេចក្តីចម្រើនគ្រប់ៗគ្នា។ ដើម្បីធានានូវសន្តិភាព និងនិរន្តរភាពនៃការអភិវឌ្ឍ សូមបងប្អូនបន្តបោះឆ្នោតជូនគណបក្សប្រជាជនកម្ពុជាដែលមានលេខរៀងទី ២០ នៅថ្ងៃទី ២៩ ខែកក្កដា ឆ្នាំ ២០១៨ ខាងមុខនេះ។
លោក ម៉ៅ ភិរុណ ប្រធានគណៈកម្មាធិការបក្សខេត្តកណ្តាលបានមានប្រសាសន៍ឲ្យដឹងថា បច្ចុប្បន្ននេះខេត្តកណ្តាលគណៈកម្មការគណបក្សគ្រប់ថ្នាក់មានចំនួន ១៤៦ ,សាខាបក្សចំនួន ១៨៤៣ ,គណកម្មការសាខាគណបក្សមានចំនួន១២៣៤ , អនុសាខាគណបក្សចំនួន ៦៧៧៦។ ខេត្តមានសមាជិកបក្សចំនួន ៥០៨ ៦៨៨ នាក់ ស្មើនឹងជាង ៧០ ភាគរយនៃប្រជាជនគ្រប់អាយុបោះឆ្នោតទូទាំងខេត្តកណ្តាលឆ្នាំ ២០១៧ និង គ្រួសារគណបក្សសរុបមានចំនួន ១៩២ ៦៦៥ គ្រួសារ និង ក្រុមបក្សមានចំនួន៦២.៨៧៦ ក្រុម។
លោក ម៉ៅ ភិរណ បានឲ្យដឹងទៀតថា សមាជិកបក្សនិង មន្ត្រីគណពង្រឹងមូលដ្ឋានខេត្តកណ្តាល បានខិតខំចុះជួយប្រជាជន និង ដោះស្រាយបញ្ហាប្រឈមនានា និង ជំរុញការអភិវឌ្ឍលើគ្រប់វិស័យនិង កសាងសមិទ្ធផលនានានៅមូលដ្ឋានក្នុងខេត្តដោយបានចំណាយអស់ថវិកាអស់ជាច្រើនលានដុល្លារ។ ជាក់ស្តែងក្នុងត្រីមាសទី១ឆ្នាំ២០១៨បានចំណាយថវិកាអស់ ៣.១៩៦. ០០៤ដុល្លារ ដែលជាថវិការបស់គណបក្សខេត្ត , គណពង្រឹងមូលដ្ឋាន និង ថវិកាជួយឧបត្ថម្ភរបស់សប្បុរសជននានា៕
Source: Kampuchea Thmey Daily
0 Comments