ភ្នំពេញ ៖ អគ្គនាយកដ្ឋានពន្ធដារ បានប្រកាសចាប់ផ្ដើមប្រមូលពន្ធ លើមធ្យោបាយដឹកជញ្ជូន និងយានជំនិះគ្រប់ប្រភេទ ចាប់ពីថ្ងៃទី១ ខែមិថុនា ដល់ដំណាច់ខែវិច្ឆិកាឆ្នាំ២០១៨នេះ។
បើតាមសេចក្តីជូនដំណឹងរបស់អគ្គនាយកដ្ឋានពន្ធដារបានឲ្យដឹងថា នៅពេលដាក់លិខិតប្រកាស និងបង់ពន្ធ ម្ចាស់មធ្យោបាយដឹកជញ្ជូន និងយានជំនិះគ្រប់ប្រភេទ ត្រូវភ្ជាប់មកជាមួយនូវឯកសារច្បាប់ថតចម្លង រួមមាន៖ ប័ណ្ណសម្គាល់យានយន្ត ឬវិញ្ញាបនបត្រត្រួតពិនិត្យលក្ខណបច្ចេកទេសយានយន្ត (សម្រាប់យានយន្តក្រៅពីប្រភេទ Pick up) ដែលចេញដោយអគ្គនាយកដ្ឋានដឹកជញ្ជូន នៃក្រសួងសាធារណការ និងដឹកជញ្ជូន ឬបង្កាន់ដៃបង់ពន្ធនាំចូល ឬលិខិតបញ្ជាក់ការប្រើប្រាស់យានយន្តចេញដោយ ឃុំ-សង្កាត់ ចំពោះយានយន្តកែច្នៃក្នុងស្រុក និងច្បាប់ថតចម្លងអត្តសញ្ញាណប័ណ្ណ ឬលិខិតឆ្លងដែន ឬលិខិតបញ្ជាក់សំបុត្រកំណើតរបស់ម្ចាស់យានយន្តចេញ ដោយមន្ត្រីអត្រានុកូលដ្ឋាន។
អគ្គនាយកដ្ឋានពន្ធដារបានបន្តទៀតថា ចំពោះយានយន្តដែលទទួលបានប័ណ្ណសម្គាល់ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទហើយនោះ គឺពុំចាំបាច់បំពេញលិខិតប្រកាសបង់ពន្ធទៀតទេ។
សេចក្តីប្រកាសដដែលនេះបានបញ្ជាក់ថា ចំពោះមធ្យោបាយដឹកជញ្ជូន និងយានជំនិះ ដែលពុំទាន់បានបង់ប្រាក់ពន្ធ នៅឆ្នាំកន្លងមក គឺតម្រូវឲ្យបង់ប្រាក់ពន្ធ និងប្រាក់ពិន័យជាមុនសិន ទើបអនុញ្ញាតឲ្យប្រកាសបង់ពន្ធ ឆ្នាំបច្ចុប្បន្នបាន។
ការបង់ពន្ធលើ មធ្យោបាយដឹកជញ្ជូន និងយានជំនិះ ត្រូវបានកំណត់ទៅតាមប្រភេទនីមួយៗ ដោយមិនគិត ថា ជាកម្មសិទ្ធិរបស់រដ្ឋ ឬឯកជនទេ លើកលែងតែ រថយន្តគិលានសង្គ្រោះបន្ទាន់ រថយន្តពន្លត់អគ្គីភ័យ, យានយន្តអង្គភាពកងយោធាពលខេមរភូមិន្ទ, យានយន្តពាក់ស្លាកលេខ ខ.ម ឬ ន.បដែលបម្រើការលើកិច្ចការងារការពារជាតិជាមធ្យោបាយសម្រាប់ដឹកជញ្ជូនសម្ភារៈទ័ពឬដឹកជញ្ជូនកងទ័ពក៏ដូចជាការពារសន្តិសុខ និងសណ្ដាប់ធ្នាប់សង្គម, យានយន្តកម្មសិទ្ធិស្ថានទូត ឬស្ថានកុងស៊ុលបរទេស អង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានា។
ម្ចាស់មធ្យោបាយដឹកជញ្ជូន និងយានជំនិះ អាចបង់ពន្ធបាន នៅតាមសាខាពន្ធដារខេត្ត-ខណ្ឌ ឬតាមប្រព័ន្ធធនាគារ ដូចជា ធនាគារអេស៊ីលីដា, ធនាគារកាណាឌីយ៉ា, ធនាគារកម្ពុជាសាធារណៈ, ធនាគារវឌ្ឍនៈ និងធនាគារ ANZ Royal។
សេចក្តីជូនដំណឹងខាងលើបានបញ្ជាក់ថា ចាប់ពីខែមករានៃឆ្នាំ២០១៩តទៅ អគ្គនាយកដ្ឋានពន្ធដារ នឹងចុះត្រួតពិនិត្យការបង់ពន្ធ និងផាកពិន័យ ចំពោះមធ្យោបាយដឹកជញ្ជូន និងយានជំនិះទាំងឡាយណាដែលមិនបានបង់ពន្ធតាមការកំណត់៕
Source: Kampuchea Thmey Daily
0 Comments