ភ្នំពេញ ៖ ជនសង្ស័យ២នាក់ ត្រូវបានកម្លាំងនគរបាលខណ្ឌទួលគោកធ្វើការឃាត់ខ្លួន ខណៈដែលជនសង្ស័យជិះម៉ូតូឆ្លងកាត់គោលដៅឆែកអាវុធជាតិផ្ទុះ និងរឹតបន្តឹងច្បាប់ចរាចរណ៍ផ្លូវគោក ហើយប៉ូលិសបានឆែករកឃើញសារធាតុញៀនដោយខុសច្បាប់នៅជាប់ខ្លួននោះ។
ជនសង្ស័យត្រូវបានឃាត់ខ្លួនកាលវេលាម៉ោង១០និង៣០នាទីយប់ ថ្ងៃសុក្រ ៣រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១ ខែមិថុនា ឆ្នាំ២០១៨ចំណុចមុខផ្សារហេងលី ផ្លូវ២៧១ ស្ថិតក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ។
ជនសង្ស័យទី១ មានឈ្មោះ សែ ឌី ភេទប្រុស អាយុ១៦ឆ្នាំ មុខរបរកម្មករសំណង់ ស្នាក់នៅផ្សារស្ទឹងមានជ័យ ខណ្ឌមានជ័យ មានស្រុកកំណើតនៅខេត្តកំពង់ធំ និងជនសង្ស័យទី២ មានឈ្មោះ ជុំ សីហៃ ភេទប្រុស អាយុ២៨ឆ្នាំ មុខរបរកម្មករសំណង់ ស្នាក់នៅភូមិឫស្សី ខណ្ឌមានជ័យ មានស្រុកកំណើតនៅខេត្តកំពង់ធំ។
មន្ត្រីប៉ូលិសខណ្ឌទួលគោក បានអោយឲ្យដឹងថា នៅមុនពេលកើតហេតុ កម្លាំងនគរបាលខណ្ឌទួលគោក បានដាក់គោលដៅរឹតបន្តឹងច្បាប់ចរាចរណ៍ផ្លូវគោក ស្រាប់តែលេចមុខជនសង្ស័យមានគ្នា៣នាក់ ជិះម៉ូតូមួយគ្រឿង មិនចាំម៉ាក ពីត្បូងទៅជើង។ ខណៈមកដល់ចំណុចកើតហេតុ ដោយអ្នកបើកម៉ូតូដឹងខ្លួនមុន បានបើកម៉ូតូគេចខ្លួនបាត់។ ចំណែក២នាក់ ដែលជិះខាងក្រោយ ត្រូវសមត្ថកិច្ចឃាត់ខ្លួនយកមកត្រួតពិនិត្យលើខ្លួនប្រាណ ស្រាប់តែរកឃើញថ្នាំញៀន១កញ្ចប់ ក៏ធ្វើការឃាត់ខ្លួនតែម្ដង។
បច្ចុប្បន្នជនសង្ស័យទាំងពីរនាក់ រួមទាំងវត្ថុតាង ត្រូវបាននាំខ្លួនមកអធិការដ្ឋានខណ្ឌទួលគោក ដើម្បីសាកសួរ និងធ្វើកំណត់ហេតុកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការបន្តទៀត៕
Source: Kampuchea Thmey Daily
0 Comments