ភ្នំពេញ ៖ អ្នកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា នឹងចូលខ្លួនឆ្លើយបំភ្លឺជាសាក្សីក្នុងសំណុំរឿងលោក កឹម សុខា អតីតប្រធានអតីតគណបក្សសង្គ្រោះជាតិ ដែលរងការចោទពីបទសន្ទិដ្ឋភាពជាមួយបរទេស នេះបើយោងតាមសេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ដែលបានចេញផ្សាយកាលពីថ្ងៃទី៣១ ខែឧសភា។
ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី កាលពីថ្មីៗនេះ បានចេញដីកាកោះហៅសាក្សី៨រូប ឱ្យចូលខ្លួនឆ្លើយបំភ្លឺករណីលោក កឹម សុខា ហើយអ្នកទាំង៨នោះ រួមមាននាយិកាមជ្ឈមណ្ឌលសិទ្ធិមនុស្សកម្ពុជា គឺអ្នកស្រី ចក់ សុភាព ផងដែរ ហើយតាមដីកាកោះ នឹងតម្រូវឱ្យអ្នកស្រីចូលខ្លួនឆើ្លយបំភ្លឺនៅចំពោះមុខតុលាការរាជធានីភ្នំពេញនៅថ្ងៃទី៧ ខែមិថុនា ខាងមុខ វេលាម៉ោង៨ និង៣០នាទីព្រឹក។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCRH) បានអះអាងថា ដោយសារឯករាជ្យដាច់ខាតរបស់មជ្ឈមណ្ឌលសិទ្ធិមនុស្សកម្ពុជា ពីគណបក្សនយោបាយទាំងអស់ ហើយដោយសារមានការបញ្ជាក់យ៉ាងច្បាស់ថា មជ្ឈមណ្ឌលនេះ ពុំបានប្រព្រឹត្តកំហុស លោកស្រីជឿជាក់ថា ការស៊ើបអង្កេតនេះនឹងមិនប៉ះពាល់ដល់ប្រតិបត្តិការរបស់មជ្ឈមណ្ឌលសិទ្ធិមនុស្សកម្ពុជានោះទេ។ លោកស្រីអះអាងថា គោរពតាមដីកាកោះរបស់តុលាការ នឹងចូលខ្លួនឆ្លើយបំភ្លឺ ពាក់ព័ន្ធនឹងសំណុំរឿងក្តីរបស់លោក កឹម សុខ ប្រធានអតីតគណបក្សសង្គ្រោះជាតិ។
សូមបញ្ជាក់ថា សាលាដំបូងរាជធានីភ្នំពេញ កាលពីថ្ងៃទី១៧ ខែឧសភា ឆ្នាំ២០១៨ បានចេញដីការផ្សេងៗគ្នា កោះហៅសាក្សីចំនួន៨នាក់ទៀត ដើម្បីសាកសួរពាក់ព័ន្ធពាក់ព័ន្ធសំណុំរឿងព្រហ្មទណ្ឌលេខ៥៦៤២ ចុះថ្ងៃទី៣ ខែកញ្ញា ឆ្នាំ២០១៧ របស់ជនត្រូវចោទ កឹម សុខា អតីតប្រធានគណបក្សសង្គ្រោះជាតិ ជាប់ចោទពីបទសន្ទិដ្ឋភាពជាមួយបរទេស ចាប់ពីថ្ងៃទី៥ ខែមិថុនា ឆ្នាំ២០១៨ ខាងមុខ ហើយតាមដីកាចេញដោយរបស់លោក គី ឫទ្ធី គឺបានកោះហៅសាក្សីចំនួន៨នាក់ ឲ្យចូលតាមពេលវេលាផ្សេងៗគ្នា រួមមាន ទី១, អ្នកស្រី ចក់ សុភាព ចូលខ្លួននៅថ្ងៃទី៧ ខែមិថុនា ទី២, លោក ប៉ា ងួនទៀង ចូលខ្លួននៅថ្ងៃទី៩ ខែមិថុនា ទី៣, លោក គ្រី សុង ចូលខ្លួននៅថ្ងៃទី៥ ខែមិថុនា ទី៤, លោក សៀ ភារម្យ ចូលខ្លួននៅថ្ងៃទី១២ ខែមិថុនា ទី៥, លោក កែវ រតនា ចូលខ្លួននៅថ្ងៃទី១៥ ខែមិថុនា ទី៦, លោក ខឿន វីរ៉ាត់ ចូលខ្លួននៅថ្ងៃទី១៣ ខែមិថុនា ទី៧, លោក មាស គឹមសេង ចូលខ្លួននៅថ្ងៃទី៧ ខែមិថុនា ទី៨, លោក ហេង ពិសិដ្ឋ ចូលខ្លួននៅថ្ងៃទី១៣ ខែមិថុនា។
បើតាមដីកាបានបញ្ជាក់ទៀតថា សាមីខ្លួនត្រូវអញ្ជើញ តាមដីកាកោះនេះឲ្យទាន់ពេលវេលា និងយកលិខិតផ្សេងៗ ដែលទាក់ទិននឹងរឿងខាងលើទៅជាមួយប្រសិនមាន។ ជាមួយគ្នានេះ អគ្គស្នងការដ្ឋាននគរបាលជាតិ បានចុះអនុវត្តន៍ប្រគល់ដីកាកោះហៅ ដល់សាក្សីទាំង៨នាក់ រួចហើយ។
លោក កឹម សុខា ត្រូវបានចោទប្រកាន់ពីបទ សន្ទិដ្ឋភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ។ បទសន្ទិដ្ឋភាពជាមួយបរទេស គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូសរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី ១៥ឆ្នាំដល់៣០ឆ្នាំ។ លោកត្រូវបានសមត្ថកិច្ចចាប់ខ្លួន នៅពាក់កណ្តាលអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ ក្រោយឃាត់ខ្លួន សមត្ថកិច្ចបានបញ្ជូនលោក កឹម សុខា ទៅឃុំបណ្ដោះអាសន្ននៅពន្ធនាគារត្រពាំងផ្លុង ខេត្តត្បូងឃ្មុំ នៅថ្ងៃទី៤ ខែកញ្ញា ឆ្នាំ២០១៧៕
Source: Kampuchea Thmey Daily
0 Comments