កំពត ៖ លោកបណ្ឌិត ហ៊ុន ម៉ាណែត តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី០២ ខែមិថុនា ឆ្នាំ២០១៨ បានអញ្ជើញជាគណៈអធិបតី ក្នុងពិធី បុណ្យបញ្ចុះខណ្ឌសីមាព្រះវិហារ និងសម្ពោធសមិទ្ធផលនានានៅវត្តបរិវាស ស្ថិតក្នុងភូមិបរិវាស ឃុំសំរោងលើ ស្រុកបន្ទាយមាស ខេត្តកំពត។
មានមតិស្វាគមន៍ លោក ជាវ តាវអភិបាលនៃគណៈអភិបាលខេត្តកំពត បានឱ្យដឹងពីសមិទ្ធផលរីកចម្រើននានានៅក្នុងខេត្តកំពតនាបច្ចុប្បន្ន ពិសេសវិស័យព្រះពុទ្ធសាសនាដែលជាសាសនារបស់រដ្ឋ ដែលជាទូទៅប្រជាពលរដ្ឋតែងតែនាំគ្នាគោរពសក្ការបូជា។
ទន្ទឹមនឹងនេះ លោក ជាវ តាយ ក៏បានថ្លែងអំណរគុណកោតសរសើរនិងបានចាត់ទុកកិច្ចសំណេះសំណាលនាពេលនេះ ពិតជាមានតម្លៃឆ្លុះបញ្ចាំងពីការយកចិត្តទុកដាក់ខ្ពស់ផ្សារភ្ជាប់មនោសញ្ចេតនាស្វែងយល់នូវសុខទុក្ខរវាង ថ្នាក់ដឹកនាំ ក៏ដូចជាមន្ត្រីរាជការ ព្រះសង្ឃនិងប្រជាពលរដ្ឋក្នុងស្រុកបន្ទាយមាសទាំងមូល ដោយផ្ទាល់ពីសំណាក់ លោកហ៊ុន ម៉ាណែត ផងដែរ។
ថ្លែងសំណេះសំណាលក្នុងឱកាសនោះ លោកបណ្ឌិត ហ៊ុន ម៉ាណែត បានថ្លែងការកោតសរសើរចំពោះសប្បុរសជន ថ្នាក់ដឹកនាំគ្រប់លំដាប់ថ្នាក់ ដែលបានចូលរួមចំណែកក្នុងការកសាងបាននូវសមិទ្ធផលជាច្រើនរាប់មិនអស់ ពិសេសទីអារាមនានាដែលជាការផ្តួចផ្តើមពីសំណាក់សប្បុរសជនជិតឆ្ងាយ ព្រមទាំងអាជ្ញាធរដែនដីគ្រប់ស្រទាប់ និងប្រជាពលរដ្ឋផងដែរ។
ជាមួយគ្នានេះ លោក ហ៊ុន ម៉ាណែត ក៏បានបញ្ជាក់ថា ៖ លទ្ធិប្រជាធិបតេយ្យស្តែងចេញដំបូងបង្អស់ តាមរយៈការប្រើសិទ្ធិរបស់ប្រជាពលរដ្ឋ ទៅបោះឆ្នោត ជ្រើសរើសមេដឹកនាំ ដែលខ្លួនស្រលាញ់ពេញចិត្ត មិនមែនតាមរយៈការបង្កចលាចល ការបះបោរ ការធ្វើបដិវត្តន៍ពណ៌ និងការធ្វើបាតុកម្មនោះទេ ហើយថាទង្វើទាំងនោះផ្ទុយទាំងស្រុងទៅនឹងគោលការណ៍លទ្ធិប្រជាធិបតេយ្យ ជាពិសេសជាទង្វើខុសច្បាប់ត្រូវទទួលទោសទណ្ឌ។
លោក ហ៊ុន ម៉ាណែត បានលើកឡើងទៀតថា ការបង្កចលាចល ការបះបោរ ការផ្លាស់ប្តូរអំណាចតាមរយៈការធ្វើបដិវត្តពណ៌និងការធ្វើបាតុកម្មទាមទារទម្លាក់ រដ្ឋាភិបាលពីមុខតំណែងពីសំណាក់មេដឹកនាំគណបក្សប្រឆាំង គឺ មិនមែនជាមធ្យោបាយល្អប្រសើរ ក្នុងការអនុវត្តសិទ្ធិរបស់ពលរដ្ឋទេ ហើយចលនាទាំងអស់ហ្នឹង គឺរបៀបចង់បានអំណាច ដោយមិនគោរពគោលការណ៍ប្រជាធិបតេយ្យ ដែលវានាំទៅដល់ការបាត់បង់សុខសន្តិភាព កើតចលាចលនៅក្នុងសង្គម ហើយនាំទៅដល់ការផ្ទុះសង្គ្រាម នាំមកនូវជម្លោះផ្ទៃក្នុង ធ្វើឲ្យប្រជាពលរដ្ឋក្លាយជាអ្នករងទុក្ខ ជាអ្នករងគ្រោះនៅទីបំផុត ដោយសារសង្គ្រាម និងភាពចលាចលទាំងឡាយនៅក្នុងសង្គមនេះឯង។
លោក បន្តថា ការចូលរួមកិច្ចដំណើរការប្រជាធិបតេយ្យ គឺយើងទាំងអស់គ្នាត្រូវទៅបោះឆ្នោត ជ្រើសរើសអ្នកដឹកនាំដែលយើងស្រលាញ់ ដែលយើងចង់បាន ដោយគោរពតាមគោលការណ៍ច្បាប់ និងគោលការណ៍នៃលទ្ធិប្រជាធិបតេយ្យ។ការបោះឆ្នោតជាការងារដែលសំខាន់សម្រាប់យើងគ្រប់ៗរូប សម្រាប់សង្គមជាតិទាំងមូល ហើយជាការចូលរួមចំណែក ក្នុងការការពារ រក្សាសុខសន្តិភាព ស្ថិរភាពនយោបាយ និងការធានានូវលក្ខខណ្ឌ ចាំបាច់ដើម្បីការអភិវឌ្ឍន៍ប្រទេសជាតិយើង តទៅទៀត។
លោកហ៊ុន ម៉ាណែតក្រើនរំលឹកដល់ លោកយាយ លោកតា ប្រជាពលរដ្ឋក្នុងស្រុកបន្ទាយមាស ទាំងមូល សូមអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ ដែលប្រព្រឹត្តទៅ នៅថ្ងៃអាទិត្យទី ២៩ ខែកក្កដា ឆ្នាំ ២០១៨ ខាងមុខ ឲ្យបានគ្រប់ៗគ្នា ហើយបោះឆ្នោតជ្រើសរើសអ្នកដឹកនាំ ឬបក្សដែលយើងស្រលាញ់ ពិសេសត្រូវចេះជ្រើសរើសអ្នកដឹកនាំណា ដែលផ្តល់ សុខសន្តិភាព ស្ថិរភាព និងការអភិវឌ្ឍន៍ រីកចម្រើនដល់ប្រទេសជាតិដូចសព្វថ្ងៃនេះ។
លោកក៏បានផ្តាំផ្ញើដែរថា ៖ បើអ្នកទាមទារទាំងឡាយណាស្រែកថាដូរ ប៉ុន្តែដូរតាមរយៈបាតុកម្ម ប្រព្រឹត្តអំពើខុសច្បាប់ ហើយបែរមកប្រកាសខ្លួនឯង ថាស្រលាញ់លទ្ធិប្រជាធិបតេយ្យ ចង់បាននូវប្រជាធិបតេយ្យ ចង់ផ្តល់នូវសិទ្ធិដល់ប្រជាពលរដ្ឋ ហើយអំពាវនាវថា កុំឲ្យទៅបោះឆ្នោតនោះ សូមលោកយាយ លោកតា កុំស្តាប់ឲ្យសោះ ព្រោះពួកនោះសុទ្ធតែពួកល្មោភអំណាច គិតតែពីផលប្រយោជន៍ផ្ទាល់ខ្លួន ហើយជាទង្វើផ្ទុយទាំងស្រុងទៅនឹងគោលការណ៍ប្រជាធិបតេយ្យ។
សរុបឲ្យខ្លីយើងត្រូវប្រើសប្រាស់សិទ្ធិ លើកតម្កើងលទ្ធិប្រជាធិបតេយ្យ ប៉ុន្តែទន្ទឹមនេះការពារ សុខសន្តិភាព ធានាបាននូវលក្ខខណ្ឌល្អប្រសើរក្នុងការអភិវឌ្ឍ និងការរីកចម្រើនតទៅទៀត ដើម្បីយើងនិងកូនចៅយើងទាំងអស់គ្នាទទួលបាន ភាពសុខដុមរមនា រស់នៅក្នុងការជួបជុំគ្នា ដោយសុខសប្បាយ និងទទួលបានការរីកចម្រើនទាំងអស់គ្នាតរៀងទៅ។
ក្នុងឱកាសនោះ លោក ហ៊ុន ម៉ាណែត ក៏បានឧបត្ថម្ភនូវសម្ភារៈ និងថវិកាដល់លោកយាយ លោកតា លោកគ្រូ អ្នកគ្រូ សិស្សានុសិស្ស និងប្រគេនថវិកាដល់ព្រះចៅអធិការវត្តបរិវាស សម្រាប់ចាត់ចែងក្នុងកម្មវិធីផ្សេងៗ និងកាត់ខ្សែបូដាក់ឱ្យប្រើប្រាស់នូវសមិទ្ធផលក្នុងវត្តបរិវាស ឃុំសំរោងលើ ស្រុកបន្ទាយមាស ខេត្តកំពត ចាប់ពីពេលនេះតទៅ៕
Source: Kampuchea Thmey Daily
0 Comments