ភ្នំពេញ ៖ អាមេរិកបានផ្តល់ជំនួយឥតសំណងចំនួន៤លានដុល្លារអាមេរិកសម្រាប់បោសសំអាតគ្រប់បែកចង្កោមដែលបានទម្លាក់នៅលើទឹកដីកម្ពុជាដើម្បីធានាដល់សុវត្ថិភាពដល់ប្រជាពលរដ្ឋ។
ជំនួយឥតសំណងនេះ ត្រូវបានចុះហត្ថលេខាកិច្ចព្រមព្រៀងកិច្ចសហប្រតិបត្តិការជាដៃគូរវាង អង្គការជាដៃគូជំនួយនៃប្រជាជនន័រវេស្ស NPA និងស៊ីម៉ាក់កាលពី រសៀលថ្ងៃទី៣១ ខែឧសភា នៅមជ្ឈមណ្ឌលសកម្មភាពកំចាត់មីនកម្ពុជា។
លោក ហេង រតនា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៅមជ្ឈមណ្ឌលសកម្មភាពកំចាត់មីន បានមានប្រសាសន៍នៅក្នុងទំព័រហ្វេប៊ុករបស់លោកថា ថវិកា៤លានដុល្លានេះ សម្រាប់យកទៅអនុវត្តន៍ គម្រោងស្រាវជ្រាវព័ត៌មាននិងកិច្ចប្រតិបត្តិការបោសសម្អាតសំណល់ គ្រាប់បែកចង្កោមនៅតំបន់ខាងកើត នៃប្រទេសកម្ពុជា ក្នុងរយៈពេល២ឆ្នាំ ដោយចាប់ផ្តើមពីដើមឆ្នាំ ២០១៨ដល់ដើមឆ្នាំ ២០១៩។
លោកបាន បន្តថា ថវិកានេះ បានបែងចែកមកដល់ស៊ីម៉ាក់ផ្ទាល់ក្នុងមួយឆ្នាំៗមានទឹកប្រាក់១លាន៦សែនដុល្លារ ខណៈ អង្គការNPA ទទួលបានថវិកាប្រមាណ៨សែនដុល្លារសម្រាប់ធ្វើការជាមួយគម្រោងនេះដែរ។
លោកបានបន្តទៀតថា សម្រាប់គម្រោងឆ្នាំទី១នេះ ស៊ីម៉ាក់មានភារកិច្ច ស្រាវជ្រាវតំបន់សង្ស័យថាមានគ្រប់បែកចង្កោមដែលមានផ្ទៃដីប្រមាណ៣ពាន់ហិកតា និង ធ្វើការរំដោះផ្ទៃដីដែលមានគ្រាប់ បែកចង្កោមចំនួន២២០០ហិកតានៅក្នុងភូមិចំនួន៦៧៨ភូមិ ក្នុង ខេត្តកំពង់ចាម ក្រចេះ ត្បូងឃ្មុំ ព្រៃវែង ស្វាយរៀង និងខេត្តស្ទឹងត្រែង ដោយ ប្រើកម្លាំងជំនាញចំនួនជិត២០០នាក់។
លោកហេងរតនាបានបញ្ជាក់ថា កន្លងមកសហរដ្ឋអាមេរិកធ្លាប់ផ្តល់ជំនួយបោសសំអាតគ្រាប់យុទ្ធភណ្ឌ មិនទាន់ផ្ទុះនៅភាគខាងលិច និងខាងកើតនៃប្រទេសកម្ពុជាមានរយៈពេល១០ឆ្នាំមកហើយ ដោយសម្រេចលទ្ធផលបោសសំអាតកាកសំណល់ជាតិផ្ទុះគ្រប់ប្រភេទប្រមាណ២សែន២ម៉ឺនគ្រាប់។
សូមរម្លឹកថា ក្នុងអំឡុងសង្គ្រាមអាមេរិក និងវៀតណាម ចាប់តាំងពីដើមឆ្នាំ១៩៦៣ ដល់ឆ្នាំដើមឆ្នាំ១៩៧៥ សហរដ្ឋអាមេរិកបានទម្លាក់គ្រប់បែកចង្កោមមកដល់ទឹកដីកម្ពុជាមានប្រមាណ២៨លានហ្វូងគ្រាប់លើផ្ទៃដីជាង៦៥០គីឡូម៉ែត្រក្រឡា ដែលត្រូវការពេលវេលាពី៣០ទៅ៤០ឆ្នាំសម្រាប់បោសសម្អាតគ្រាប់បែកចង្កោមនេះ។
លោកអគ្គនាយកស៊ីម៉ាក់បានឲ្យដឹងទៀតថា ក្នុងការបោសសំអាតគ្រាប់បែកចង្កោមនេះដែរ អង្គការNPAគឺជាដៃគូដ៏សំខាន់របស់ស៊ីម៉ាក់ដែលមានតួនាទីត្រួតពិនិត្យ ទៅលើគុណភាពនៃការបោសសំអាតគ្រាប់បែកចង្កោមនេះ ដោយដាក់ក្រុមត្រួតពិនិត្យនៅតាមតំបន់នីមួយៗ។ ក្រៅពីនេះការងារត្រួតពិនិត្យនេះស៊ីម៉ាក់ក៏បានសហការជាមួយគ្នាទៅលើការសិក្សាស្រាវជ្រាវបច្ចេកទេសផងដែរព្រោះថាអង្គការនេះ បានធ្វើការនៅលើប្រទេសជាង៣០នៅលើសកលលោក ដែលមានបទពិសោធន៍ជាច្រើនតាមរយៈការធ្វើសិក្ខាសាលារួមគ្នាដើម្បីស្វែងរកយុទ្ធសាស្ត្រ និងមធ្យោបាយនានាដើម្បីបោសសំអាតគ្រាប់មីននិងគ្រាប់មិនទាន់ផ្ទុះឲ្យបានលឿននិងមានប្រសិទ្ធភាព៕
Source: Kampuchea Thmey Daily
0 Comments