ភ្នំពេញ ៖ បុរសជនជាតិ បែលហ្ស៊ិកម្នាក់ ត្រូវបានបញ្ជូនមកសាលាដំបូងរាជធានីភ្នំពេញនាព្រឹកថ្ងៃទី ០៤ ខែមិថុនា ឆ្នាំ២០១៨ ដើម្បីកាត់ទោសពាក់ព័ន្ធនឹងការដឹកជញ្ជូនគ្រឿងញៀនកាកូអ៊ីន ពីប្រទេសប្រេស៊ីលចូលមកប្រទេសកម្ពុជា។
ជនជាប់ចោទឈ្មោះ CATRY DAVID NOEL ភេទប្រុស អាយុ ៣៤ឆ្នាំ ជនជាតិ បែលហ្ស៊ិក ត្រូវបានចោទប្រកាន់ពីបទដឹកជញ្ជូនដោយខុសច្បាប់នូវសារធាតុញៀន ប្រព្រឹត្តកាលពីថ្ងៃទី១០ ខែមករា ឆ្នាំ២០១៨ នៅចំណុចអាកាសយានដ្ឋានអន្តរជាតិភ្នំពេញ។ យ៉ាងហោចណាស់មានគ្រឿងញៀនប្រភេទកាកូអ៊ីនទម្ងន់១០០៣,២៤ក្រាម មានសារធាតុសុទ្ធចំនួន៨០ ,៤១ភាគរយត្រូវបានរឹបអូសពីវ៉ាលិសរបស់ជនជាប់ចោទពេលធ្វើដំណើរតាមយន្តហោះមកដល់កម្ពុជា។
នៅក្នុងសវនាការជនជាប់ចោទបានសារភាពថា ខ្លួនគេពិតជាបានស៊ីឈ្នួល ជនជាតិប្រេស៊ីលម្នាក់ក្នុងតម្លៃ៣ម៉ឺនដុល្លារដើម្បីយកកាកូអ៊ីនទាំងនោះមកដល់កម្ពុជា។
ជនជាប់ចោទបានសារភាពទៀតថា រូបគេបានស្គាល់ជនជាតិប្រេស៊ីលម្នាក់ឈ្មោះ តាំងហ្គី អេជីខូល័រ នៅក្នុងក្រុងភ្នំពេញ។ ក្រោយមកដោយសារបញ្ហាសេដ្ឋកិច្ចផ្ទាល់ខ្លួនដោះស្រាយមិនចេញ ខ្លួនក៏បានសុខចិត្តស៊ីឈ្នួលតាំងហ្គី ដើម្បីទៅប្រទេសប្រេស៊ីលយកគ្រឿងញៀនដែលគេបានរៀបចំរួចជាស្រេច ជិះយន្តហោះមកប្រទេសថៃឡង់ ហើយចុងក្រោយក៏ចូលមកដល់កម្ពុជាត្រូវសមត្ថកិច្ចចាប់ខ្លួនតែម្ដង។
អាជ្ញាធរកម្ពុជាបានស្វែងរកឈ្មោះតាំងហ្គី អេជីខូល័រ យ៉ាងតិច៤ដងនៅតាមសណ្ឋាគារនានាដែលគេធ្លាប់រស់នៅ តែរកមិនឃើញដានទាល់តែសោះ។
តំណាងអយ្យការលោក ស្រី ម៉ាកនី បានធ្វើសេចក្ដីសន្និដ្ឋានរក្សាបទចោទប្រកាន់លើបុរស បែលហ្ស៊ិកពីបទដឹកជញ្ជូន ដោយខុសច្បាប់នូវសារធាតុញៀន ហើយស្នើឲ្យក្រុមប្រឹក្សាតុលាការផ្ដន្ទាទោសជនត្រូវចោទតាមច្បាប់។
ចំណែកជនជាប់ចោទបានសុំអោយតុលាការបន្ធូរបន្ថយទោសដល់ខ្លួនផង។ លោកចៅក្រមម៉េង តូនី បានកំណត់យកថ្ងៃទី ២២ ខែមិថុនា ឆ្នាំ២០១៨ វេលាម៉ោង៩ព្រឹកដើម្បីប្រកាសសាលក្រម៕
Source: Kampuchea Thmey Daily
0 Comments