ភ្នំពេញ ៖ ស្ត្រីពោះធំម្នាក់ រងរបួសធ្ងន់ និង៤នាក់ទៀតរងរបួសស្រាល បន្ទាប់ពីជិះម៉ូតូបុកគ្នាពេញទំហឹង ហើយត្រូវបានបញ្ជូនទៅកាន់មន្ទីរពេទ្យភ្លាមៗ កាលពីវេលាម៉ោង០៧ព្រឹក ថ្ងៃទី០៤ ខែមិថុនា ឆ្នាំ២០១៨ ស្ថិតនៅតាមបណ្តោយផ្លូវបេតុង ភូមិព្រៃល្ង សង្កាត់ចោមចៅ២ ខណ្ឌពោធិ៍សែនជ័យ។
ភាគីម៉ូតូម៉ាក ហុងដាឌ្រីមសេ១២៥ស៊េរី២០១៨ពណ៌ខ្មៅពាក់ស្លាកលេខស្វាយរៀង 1L-8495 ជិះគ្នា៣នាក់បងប្អូនបើកបរដោយឈ្មោះតឿ សុភាព ភេទ ប្រុស អាយុ២៦ឆ្នាំ មុខរបរកម្មកររោងចក្ររងរបួសស្រាល រួមដំណើរជាមួយបងស្រីរងរបួសស្រាលនិងប្អូនប្រុសម្នាក់ទៀតឈ្មោះ គង់ ក្រូច អាយុ១៨ឆ្នាំមុខរបរកម្មករ រងរបួសធ្ងន់បាក់ស្មាខាងឆ្វេង។ ជនរងគ្រោះទាំង៣នាក់ស្នាក់នៅភូមិទួលពង្រ សង្កាត់ចោមចៅ១ មានស្រុកកំណើត ខេត្តស្វាយរៀង។
ចំណែកភាគីម្ខាងទៀតជិះម៉ូតូម៉ាកហុងដាឌ្រីមដូចគ្នាស៊េរី២០១៨ ពណ៌ខ្មៅ ពាក់ស្លាកលេខកំពង់ចាម1S-7633 ជិះគ្នា២នាក់ប្តីប្រពន្ធបើកបរដោយឈ្មោះ លាង ជូ ភេទប្រុស អាយុ២៦ឆ្នាំមុខរបរកម្មកររោងចក្ររងរបួសស្រាល ចំណែកប្រពន្ធរងរបួសធ្ងន់ បាក់ជើងស្តាំ ខណៈដែលកំពុងមានផ្ទៃពោះ៦ខែផងនោះ មុខរបរកម្មកររោងចក្រស្នាក់នៅភូមិ ព្រៃល្ង សង្កាត់ចោមចៅ២មានស្រុកកំណើត ស្រុកមេសាង ខេត្តព្រៃវែង។
តាមប្រភពនៅកន្លែងបានឲ្យដឹងថា មុនកើតហេតុភាគីខាងម៉ូតូជិះ២នាក់ប្តីប្រពន្ធបើកលើផ្លូវបញ្ច្រាសទិសដៅចរាចរណ៍មិនប្រកាន់ស្ដាំពីលិចទៅកើត លុះដល់ចំណុចបានស៊ីញ៉ូបត់ឆ្លងផ្លូវ ស្រាប់តែភាគីម៉ូតូជិះគ្នា៣នាក់បងប្អូនជិះលើផ្លូវអាទិភាពពីកើតទៅលិច ជ្រុលបុកពេញទំហឹងបណ្តាលឲ្យដួលរងរបួសធ្ងន់២នាក់ស្រាល៣នាក់។
ក្រោយកើតហេតុ ស្ដ្រីពោះធំរបួសធ្ងន់ ត្រូវបានរថយន្តសង្គ្រោះបន្ទាន់ដឹកបញ្ជូនយកទៅព្យាបាលនៅមន្ទីរពេទ្យ ចំណែកយុវជនម្នាក់របួសបាក់ស្មា ត្រូវបានសាច់ញាតិដឹកតាមម៉ូតូទៅពេទ្យដោយខ្លួនឯង។ ដោយឡែកម៉ូតូទាំង២គ្រឿងត្រូវបានសមត្ថកិច្ចវាស់វែងរួចយកទៅរក្សាទុកដើម្បីរង់ចាំដោះស្រាយគ្នានៅពេលក្រោយ៕
Source: Kampuchea Thmey Daily
0 Comments