ភ្នំពេញ ៖ កម្លាំងនគរបាលខណ្ឌទួលគោក បានឃាត់ខ្លួនជនសង្ស័យ២នាក់ ខណៈដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍ផ្លូវគោក ហើយនៅពេលជនសង្ស័យ២នាក់នេះជិះម៉ូតូឆ្លងកាត់ មានថ្នាំញៀននៅជាប់ខ្លួននោះ ទើបប៉ូលិសធ្វើការឃាត់ខ្លួនតែម្តង។
ជនសង្ស័យទាំង២នាក់ ត្រូវបានឃាត់ខ្លួនកាលពីវេលាម៉ោង១០យប់ ថ្ងៃអាទិត្យ ទី៣ ខែមិថុនា ឆ្នាំ២០១៨ តាមបណ្ដោយផ្លូវ២៧១ មុខវិទ្យាល័យ ជាស៊ីម សាមគ្គី ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
សមត្ថកិច្ចឲ្យដឹងថា ជនសង្ស័យទី១ មានឈ្មោះ មៀន មាឌ ភេទប្រុស អាយុ២១ឆ្នាំ មុខរបរកម្មករសំណង់ ស្នាក់នៅផ្សារព្រៃទា ខណ្ឌពោធិ៍សែនជ័យ មានស្រុកកំណើតនៅខេត្តព្រៃវែង។ ចំណែកជនសង្ស័យទី២ មានឈ្មោះ យាន អុល ភេទប្រុស អាយុ២៥ឆ្នាំ មុខរបររោងចក្រ ស្នាក់នៅទួលសង្កែ ខណ្ឌឫស្សីកែវ មានស្រុកកំណើតនៅខេត្តព្រៃវែង។
សមត្ថកិច្ចបន្តថា នៅមុនពេលឃាត់ខ្លួន គឺកម្លាំងនគរបាលខណ្ឌទួលគោក បានដាក់គោលដៅត្រួតពិនិត្យអាវុធជាតិផ្ទុះ និងរឹតបន្តឹងច្បាប់ចរាចរណ៍ផ្លូវគោក ស្រាប់តែលេចជនសង្ស័យមានគ្នាពីរនាក់ ជិះម៉ូតូមួយគ្រឿងម៉ាក ហុងដាឌ្រីមសង់ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 2GG-3101 ឆ្លងកាត់គោលដៅ ហើយត្រូវបានកម្លាំងសមត្ថកិច្ចហៅឲ្យឈប់ និងបានឆែកឆេរទៅលើខ្លួនប្រាណ ស្រាប់តែរកឃើញថ្នាំញៀន១កញ្ចប់តូច លាក់នៅក្នុងលុយក្រដាស៥០០រៀល ទើបធ្វើការឃាត់ខ្លួនតែម្ដង។
បច្ចុប្បន្នជនសង្ស័យទាំងពីរនាក់ រួមទាំងវត្ថុតាង ត្រូវបាននាំខ្លួនមកសួរនាំបន្តនៅអធិការដ្ឋាននគរបាលខណ្ឌទួលគោក ដើម្បីចាត់ទៅតាមនីតិវិធីច្បាប់៕
Source: Kampuchea Thmey Daily
0 Comments