ភ្នំពេញ ៖ ជនសង្ស័យ២នាក់ ត្រូវបានកម្លាំងមានសមត្ថកិច្ចរបស់ប៉ូលិសខណ្ឌទួលគោកធ្វើការឃាត់ខ្លួនបានជាក់ស្តែង ខណៈដែល ជនសង្ស័យទាំង២នាក់នេះ កំពុងតែធ្វើសកម្មភាព ដោយឈរលក់គ្រឿងញៀនយ៉ាងនៅតាមផ្លូវសាធារណៈ។
ជនសង្ស័យទាំង២នាក់នេះ ត្រូវបានឃាត់ខ្លួនកាលពីរាត្រីថ្ងៃទី៣ ខែមិថុនាវេលាម៉ោង០៩និង១០ ត្រង់ចំណុចមុខផ្ទះលេខ៥៩ផ្លូវ២៣០ កែងផ្លូវ២២៧សង្កាត់ផ្សារដើមគរ ខណ្ឌទួលគោក រាជធានីភ្នំពេញ។
ជនសង្ស័យទី១ ឈ្មោះយ៉ុន សុខា ភេទប្រុស អាយុ៣៤ឆ្នាំ ជនជាតិខ្មែរ មុខរបរកម្មករអូសរទេះ ស្នាក់នៅផ្ទះជួល សង្កាត់ផ្សារដើមគរ ខណ្ឌទួលគោក រាជធានីភ្នំពេញ។ ជនសង្ស័យទី២ ឈ្មោះ អែម ដា ភេទ ប្រុស អាយុ២៧ឆ្នាំ មុខរបរកម្មករអូសបន្លែ ស្នាក់នៅមិនពិតប្រាកដ និងមានស្រុកកំណើត ស្រុកស្អាង ខេត្តកណ្តាល។
ក្នុងការឃាត់ខ្លួននេះ ប៉ូលិសដកហូតបាន ១-ក្រាមពណ៌សថ្លា(សង្ស័យជាគ្រឿងញៀន) ចំនួន០៤កញ្ចប់(០៣កញ្ចប់តូច និង០១កញ្ចប់ធំ) ថង់សម្រាប់ច្រកគ្រឿងញៀន ជញ្ជីងថ្លឹងគ្រឿងញៀន និងឧបករណ៍សម្រាប់ជក់គ្រឿងញៀនមួយចំនួនទៀត។
មន្ត្រីប៉ូលិសខណ្ឌទួលគោកបានអោយដឹងថា នៅមុនពេលកើតហេតុ គឺប៉ូលិសខណ្ឌទួលគោក បានជិះម៉ូតូល្បាតនៅក្នុងមូលដ្ឋាន ក្នុងខណៈនោះក៏បានឃើញជនសង្ស័យ២នាក់កំពុងធ្វើសកម្មភាពឈរលក់គ្រឿងញៀនយ៉ាងអនាធិបតេយ្យនៅតាមផ្លូវសាធារណៈ ទើបប៉ូលិសធ្វើការឃាត់ខ្លួនតែម្តង ដោយដកហូតបានគ្រឿងញៀនមួយចំនួនធំខាងលើ។
បច្ចុប្បន្នជនសង្ស័យទាំង២នាក់ខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅ សាលាដំបូងរាជធានីភ្នំពេញ ចាត់ការតាមផ្លូវច្បាប់៕
Source: Kampuchea Thmey Daily
0 Comments