កណ្តាល ៖ នគរបាលស្រុកអង្គស្នូល បានធ្វើការចាប់ឃាត់រថយន្តកូរ៉េ១គ្រឿង ដែលមានដឹកសត្វគោ២ក្បាលនិងមនុស្សប្រុស ស្រី២នាក់ បន្ទាប់ពីប្រជាកសិករបានរាយការណ៍ពីសកម្មភាពបាត់សត្វគោ។
ប្រតិបត្តិការនេះធ្វើឡើងនៅ ថ្ងៃទី០៨ ខែមិថុនា ឆ្នាំ២០១៨ វេលាម៉ោង០៨និង៤០នាទីនៅចំណុចវាលស្រែខាងជើងភូមិវែង ឃុំម្កាក់ ស្រុកអង្គស្នួល ខេត្តកណ្តាល។
លោកវរសេនីយ៍ឯក មាន សំណាងអធិការនគរបាលស្រុកអង្គស្នួលបានឲ្យដឹងថា ជនរងគ្រោះជាម្ចាស់គោ ឈ្មោះ អ៊ី អ៊ីច ភេទប្រុស អាយុ៣២ឆ្នាំ ជនជាតិខ្មែរ មុខរបរកសិករ នៅភូមិវែង ឃុំម្កាក់ ស្រុកអង្គស្នួល ខេត្តកណ្តាល។ ចំណែកជនសង្ស័យ០២នាក់ (ឃាត់ខ្លួន) ១-ឈ្មោះ ហេង ចាំ ភេទប្រុសអាយុ៣៧ឆ្នាំ ជនជាតិខ្មែរ មុខរបរបើកបរនៅភូមិស្លែង ឃុំជ្រៃលាស់ ស្រុកពញាឮ ខេត្តកណ្តាល។ ២-ឈ្មោះ រ៉េត ណាន ភេទស្រី អាយុ៣៥ឆ្នាំ ជនជាតិខ្មែរ មុខរបរកសិករ នៅភូមិស្លែង ឃុំជ្រៃលាស់ ស្រុកពញាឮ ខេត្តកណ្តាល។
វត្ថុតាងចាប់យក ទី១-រថយន្តម៉ាកហ៊ី យាន់ដាយ ពណ៌ស+បៃតង ពាក់ស្លាកលេខ ភ្នំពេញ2D-0484។ ទី២-សត្វគោ ០២ក្បាលសម្បុរ ស ញី០១ក្បាលនិងឈ្មោល ០១ក្បាល ទី៣-កាំបិតផ្គាក់០១។
លោកអធិការបញ្ជាក់ថា សត្វគោ០២ក្បាលខាងលើ ជំនាញបានប្រគល់ជូនរងគ្រោះបន្ទាប់ពីធ្វើកំណត់ហេតុរួចរាល់។ បើតាមសាក្សីថា នៅមុនពេលកើតហេតុ ជនរងគ្រោះបានដឹកសត្វគោរបស់ខ្លួន២ក្បាល មកចងឲ្យស៊ីស្មៅ នៅវាលស្រែខាងជើងភូមិកើតហេតុរួចដើរទៅផ្ទះវិញ។
ឈ្មោះសន សាន ភេទប្រុស អាយុ៣៩ឆ្នាំ បានបំភ្លឺថា ខ្លួនបានដើរទៅមើលស្រែរបស់ខ្លួន បានឃើញជនរងគ្រោះកំពុងតែចងសត្វគោ។ បានបន្តិចក្រោយមកស្រាប់ តែឃើញមានរថយន្តកូរ៉េ០១គ្រឿងមកដល់ហើយមនុស្សប្រុសម្នាក់ ស្រីម្នាក់មក ដឹកសត្វគោនោះឡើងរថយន្ត ទើបខ្លួនឆ្ងល់បានទូរស័ព្ទប្រាប់ ទៅប្រធានភូមិទើបនាំគ្នាជួយស្ទាក់ឃាត់បាននៅចំណុចភូមិត្រពាំងអណ្តែង ឃុំម្កាក់ ស្រុកអង្គស្នួល។
តាមចម្លើយសារភាពរបស់ជនសង្ស័យឈ្មោះហេង ចាំ បានសារភាពថា ខ្លួនបានលួចដឹកសត្វគោ២ក្បាលខាងលើឡើងលើរថយន្តរបស់ខ្លួនដើម្បីយកទៅលក់។
សូមបញ្ជាក់ថា ជនសង្ស័យបានសារភាពថា ក្នុងរយៈពេល០១ឆ្នាំនេះ ខ្លួនបានលួចសត្វគោ០៧ដងមកហើយ និង បានយកទៅលក់នៅប្រទេសវៀតណាមបានចំនួន០៦លើក។ ករណីនេះកម្លាំងជំនាញកំពុងស្រាវជ្រាវបន្ត និង ចាត់ការតាមនីតិវិធី៕
Source: Kampuchea Thmey Daily
0 Comments