បន្ទាយមានជ័យ ៖ ព្រឹកថ្ងៃទី៨ ខែមិថុនា ឆ្នាំ២០១៨ នេះនៅក្នុងមន្ទីរពេទ្យខេត្តមិត្តភាពកម្ពុជា ជប៉ុនស្រុកមង្គលបួរី មានក្រុមសាស្ត្រាចារ្យវេជ្ជបណ្ឌិតឯកទេសវះកាត់ ឆែបមាត់ ត្រចៀក ច្រមុះ បំពង់ក សន្លាក់ឆ្អឹង ស្នាក់ស្នាម រលាកភ្លើង ទឹកក្រៅនៃមន្ទីរពេទ្យកុមារជាតិបានសហការជាមួយក្រុមវេជ្ជបណ្ឌិតមន្ទីរពេទ្យខេត្តមិត្តភាពកម្ពុជា ជប៉ុនស្រុកមង្គលបូរី និង ចូលរួមពីក្រុមសម្ព័ន្ធគ្រូពេទ្យ សហភាពសហព័ន្ធយុវជនកម្ពុជា ក្រោមការឧបត្ថម្ភដោយអង្គការnextstepsមកធ្វើការវះកាត់កុមារដោយឥតគិតថ្លៃចំនួន៣ថ្ងៃ ចាប់ពីថ្ងៃទី៨ដល់ ថ្ងៃទី១០។
ពិធីនេះមានការចូលរួម លោកលី សារី អភិបាលរងខេត្តបន្ទាយមានជ័យ លោកវេជ្ជបណ្ឌិតកែវសុភ័ត្រាប្រធានមន្ទីរសុខាភិបាលខេត្តបន្ទាយមានជ័យ លោកវេជ្ជបណ្ឌិត ច័ន្ទវិឌ្ឍីណាវុឌ្ឍ ប្រធានមន្ទីរពេទ្យខេត្តមិត្តភាពកម្ពុជា ជប៉ុនស្រុកមង្គលបូរី លោកវេជ្ជបណ្ឌិតកែវវណ្ណាផ្នែកវះកាត់ត្រចៀក ច្រមុះ លោកសាស្ត្រាចារ្យ ឈឿន វឌ្ឍី ផ្នែកខាងវះកាត់មកពីមន្ទីរពេទ្យកុមារជាតិវេជ្ជបណ្ឌិត គ្រូពេទ្យនិងប្រជាពលរដ្ឋជាច្រើននាក់ បានចូលរួមផងដែរ។
លោក លី សារី បានមានប្រសាសន៍ថា អនុវត្តតាមកម្មវិធីនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជាដំណាក់កាលទី៣ បានកំណត់ថា វិស័យសុខាភិបាលជាវិស័យអាទិភាពសំដៅធ្វើឲ្យកាន់តែប្រសើរឡើងនូវសុខុមាលភាពរបស់ប្រជាពលរដ្ឋរបស់កុមារកម្ពុជាធ្វើជាមូលដ្ឋានគន្លឹះនៃការអភិវឌ្ឍន៍ធនធានមនុស្ស។
លោក លី សារី បានបញ្ជាក់ឲ្យដឹងទៀតថា តាមរយៈផ្តល់សេវាសុខាភិបាល ប្រកបដោយប្រសិទ្ធភាព គុណភាព សមធម៌ និងមានចីរភាពដល់ប្រជាពលរដ្ឋទូទៅ ពិសេសប្រជាពលរដ្ឋក្រីក្រងាយរងគ្រោះ មានស្ត្រី កុមារនៅតាមជនបទព្យាបាលប្រកបដោយត្រឹមត្រូវច្បាស់លាស់ដោយសមធម៌ស្មើភាព មិនមានការរើសអើងនិងមិនមានការប្រកាន់និន្នាការនយោបាយ អ្វីឡើយ។
លោក លី សារី បានបញ្ជាក់ឲ្យដឹងទៀតថា បងប្អូនទាំងអស់ក្រោយពីទទួលបាននូវសេវាព្យាបាលកូន ចៅរួចហើយពេលត្រឡប់ទៅលំនៅឋានវិញ ត្រូវខិតខំយកចិត្តទុកដាក់ថែរក្សាកូនចៅឲ្យបានជាប្រចាំដើម្បីឲ្យកូនចៅបានរហ័សជាសះស្បើយ។
ក្នុងនោះ លោកវេជ្ជបណ្ឌិតកែវសុភ័ត្រាបានធ្វើការផ្តាំផ្ញើដល់លោកវេជ្ជបណ្ឌិត លោកគ្រូពេទ្យទាំងអស់ត្រូវបំពេញកិច្ចការក្រមសីលធម៌វិជ្ជាជីវៈ និង អាកប្បកិរិយាឲ្យបានសមរម្យចំពោះអ្នកជំងឺមិនត្រូវប្រើអាកប្បកិរិយាអសុរោះដល់អ្នកជំងឺឡើយជាហេតុធ្វើឲ្យជះឥទ្ធិពលមិនល្អដល់សេវាសាធារណៈហើយលោកបានធ្វើការកោតសរសើរដល់លោកវេជ្ជបណ្ឌិត និង លោកគ្រូពេទ្យទាំងអស់ដែលខិតខំប្រឹងប្រែងប្រកបដោយឆន្ទៈទទួលខុសត្រូវខ្ពស់ក្នុងការបំពេញភារកិច្ចសម្រេចបានជោគជ័យស្របតាមផែនការយុទ្ធសាស្ត្រសុខាភិបាលកត្តាជោគជ័យទាំងអស់នេះហើយ បានឆ្លុះបញ្ចាំងនូវសាមគ្គីភាពយ៉ាងល្អប្រសើររឹងមាំក្នុងថ្នាក់ដឹកនាំរបស់មន្ទីរពេទ្យខេត្តមិត្តភាពកម្ពុជា ជប៉ុនស្រុកមង្គលបូរីយើងនេះ៕
Source: Kampuchea Thmey Daily
0 Comments