ស្ទឹងត្រែង ៖ ក្នុងសកម្មភាពចុះពិនិត្យទំនិញ នៅសាលាបឋមសិក្សាខេត្តស្ទឹងត្រែងថ្ងៃទី២៧ ខែមិថុនា ឆ្នាំ២០១៨ សាខាកាំកុងត្រូលខេត្តស្ទឹងត្រែង បានណែនាំ ក្រុមអាជីវករ អ្នកលក់ចំណីអាហារនៅតាមសាលារៀនត្រូវ ចេះជ្រើសរើសទំនិញល្អៗមកលក់ ដើម្បីជួយការពារសុខភាពដល់កុមារ។
លោកគឹម ប្រុស ប្រធានសាខាកាំកុងត្រូលខេត្តបានបញ្ជាក់ថា សកម្មភាពនេះ គឺចង់ឲ្យក្រុមអាជីវករភ្ញាក់រលឹកចូលរួមលើកកម្ពស់សុខភាពដល់អ្នកប្រើប្រាស់ជាពិសេស គឺកុមារដែលមករៀនទិញចំណីអាហារបរិភោគនិងជៀសវាងកុំឲ្យ ប៉ះពាល់សុខភាព និង កើតមាន ជំងឺផ្សេងៗ។
ជាមួយនេះ លោកបានធ្វើការពន្យល់និងហាមប្រាមដល់អាជីវករត្រូវចេះមើលកាលបរិច្ឆេទប្រើប្រាស់មកដាក់តាំងលក់ឲ្យត្រូវកម្ដៅថ្ងៃ ឬ ដាក់លាយឡំគ្នាវាធ្វើឲ្យទំនិញនោះខូចគុណភាព។
លោកស្រីហោ លក្ខិណា អាជីវការលក់ដូរនៅសាលារៀននេះបានសំដែងការ គាំទ្រដល់មន្ត្រីសាខាកាំកុងត្រូលដែលបានចុះមកពិនិត្យមើលទំនិញនេះវាមានប្រយោជន៍ ប្រៀបបានទៅនឹងការដាស់ស្មារតីទាំងអ្នកលក់និងអ្នកទិញឲ្យប្រុងប្រយ័ត្នថែរក្សាសុខភាពដល់កូនចៅយើង។
លោកស្រីសំណូមពរដល់មន្ត្រីសាខាកាំកុងត្រូលចុះទៅពិនិត្យឲ្យបានគ្រប់ទីកន្លែងនៅតាមសាលារៀន ព្រោះជាកន្លែងមួយប្រឈម ហើយកុមារចៀសមិនផុតពីការទិញយកទៅបរិភោគនោះទេ។
សូមបញ្ជាក់ថា ការចុះត្រួតពិនិត្យនេះមន្ត្រីសាខាកាំកុងត្រូលបានដកហូតចំណីអាហារមួយចំនួនដែលខូចគុណភាពយកទៅទុកកម្ទេចចោលផងដែរ៕
Source: Kampuchea Thmey Daily
0 Comments