ភ្នំពេញ ៖ ក្រសួងសុខាភិបាល ក្រសួងទេសចរណ៍ អាជ្ញាធរជាតិប្រយុទ្ធនឹងជំងឺអេដស៍និងអង្គការក្រៅរដ្ឋាភិបាលបានអំពាវនាវឲ្យម្ចាស់គ្រឹះស្ថានសេវាកំសាន្តសប្បាយទាំងអស់បើកទូលាយអនុញ្ញាតឲ្យបុគ្គលិកអង្គការក្រៅរដ្ឋាភិបាលបានចូលផ្សព្វផ្សាយស្តីពីវិធីការពារនិងការចម្លងមេរោគអេដស៍ដល់បុគ្គលិកដែលជាស្ត្រីបម្រើការកំសាន្តឲ្យបានទូលំទូលាយថែមទៀតដើម្បីទប់ស្កាត់ការចម្លងជំងឺនេះ ក្នុងចំណោមពួកគេឲ្យកាន់តែថយចុះថែមទៀត។
ការអំពាវនាវនេះបានធ្វើឡើង ខណៈដែលក្រុមស្ត្រីធ្វើការនៅសេវាកំសាន្តសប្បាយមានអត្រាឆ្លងជំងឺអេដស៍ខ្ពស់រហូតដល់២,៣% នៃចំនួនអ្នកផ្ទុកមេរោគអេដស៍សរុបជិត៧ម៉ឺននាក់នៅទូទាំងប្រទេស។
លោកវេជ្ជបណ្ឌិត តែងគន្ធី អគ្គលេខាធិការនៃអាជ្ញាធរជាតិប្រយុទ្ធនឹងជំងឺអេដស៍បានថ្លែងក្រោយសិក្ខាសាលាស្តីពីការបញ្ចប់អេដស៍របស់ម្ចាស់សេវានិងអ្នកផ្តល់សេវាចំពោះស្ត្រីបម្រើសេវាកំសាន្តសប្បាយកាលពីព្រឹក ថ្ងៃទី២៧ ខែមិថុនា នៅភោជនីយដ្ឋានទន្លេបាសាក់២ ឲ្យដឹងថា ការចូលរួមទប់ស្កាត់ជំងឺអេដស៍ពីសំណាក់ម្ចាស់សេវាកម្សាន្តសប្បាយមិនត្រឹមតែអាចការពារការចម្លងជំងឺអេដស៍ប៉ុណ្ណោះទេ ថែមទាំងធ្វើឲ្យការធ្វើជំនួញមានការរីកចម្រើននិងជោគជ័យផងដែរដោយសារបុគ្គលិកមានសុខភាពល្អអាចបំពេញការងារបានល្អប្រសើរទៀតផង។
ជាមួយគ្នានេះលោកវេជ្ជបណ្ឌិត ក៏បានណែនាំដល់ស្ត្រីធ្វើការនៅសេវាកំសាន្តសប្បាយត្រូវប្រុងប្រយ័ត្ននិងការពារខ្លួនកុំឲ្យឆ្លងមេរោគអេដស៍ គឺត្រូវប្រើប្រាស់ស្រោមអនាម័យគ្រប់ពេលវេលានៅពេលរួមភេទជាមួយដៃគូព្រោះមិនអាចកំណត់បានថា ភ្ញៀវណាមាន ឬ មិនមានផ្ទុកមេរោគអេដស៍នោះទេ។
លោកវេជ្ជបណ្ឌិតស្រី វណ្ណធួន ប្រធានកម្មវិធីអង្គការមូលនិធិថែទាំសុខភាពអ្នកជំងឺអេដស៍ប្រចាំនៅកម្ពុជាបានគាំទ្រចំពោះវិធានការប្រើប្រាស់ស្រោមអនាម័យនេះ ព្រោះអាចជួយការពារមិនឲ្យឆ្លងជំងឺអេដស៍និងជំងឺឆ្លងផ្សេងៗដែលឆ្លងតាមរយៈការរួមភេទដទៃទៀតដូចជាជំងឺកាមរោគនិងការពារមិនឲ្យមានផ្ទៃពោះជាដើម។
លោកបានស្នើឲ្យម្ចាស់គ្រឹះស្ថានសេវាកម្សាន្តសប្បាយទាំងអស់ បើកទូលាយឲ្យបុគ្គលិកអង្គការដើម្បីបានចុះផ្សព្វផ្សាយស្តីពីវិធីការពារនិងការចម្លងមេរោគអេដស៍ ផ្តល់ស្រោមអនាម័យដោយឥតគិតថ្លៃដល់ស្ត្រីធ្វើការនៅសេវាកំសាន្តសប្បាយបានយល់ដឹងនិងការពារខ្លួនកុំឲ្យឆ្លងមេរោគអេដស៍។
ចំណែកស្រី គឹម សុវណ្ណា ប្រធានមន្ទីរទេសចរណ៍រាជធានីភ្នំពេញ បានស្នើម្ចាស់សេវាកម្សាន្តសប្បាយនៅរាជធានីភ្នំពេញ ដែលមានប្រមាណជិត៤០០កន្លែង សូមអនុញ្ញាតឲ្យបុគ្គលិករបស់អង្គការដែលបម្រើការងារលើវិស័យអេដស៍ចូលទៅផ្សព្វផ្សាយជំងឺអេដស៍នេះ ដល់ស្ត្រីដែលជាបុគ្គលិកដើម្បីឲ្យពួកគេទទួលបានសុខភាពល្អជៀសផុតពីការឆ្លងជំងឺអេដស៍។
លោកស្រីបានបន្តថា មន្ទីរទេសចរណ៍រាជធានីភ្នំពេញនឹងធ្វើការសហការជានិច្ចជាមួយក្រសួងពាក់ព័ន្ធនិងអង្គការក្រៅរដ្ឋាភិបាលដើម្បីរួមគ្នាបញ្ចប់ការចម្លងមេរោគអេដស៍ពីកម្ពុជាឲ្យអស់នៅឆ្នាំ២០២៥តាមការកំណត់របស់រាជរដ្ឋាភិបាល។
លោកវេជ្ជបណ្ឌិតតែង គន្ធី បានបញ្ជាក់ថា បច្ចុប្បន្ននេះមានស្ត្រីធ្វើការនៅសេវាកម្សាន្តប្រមាណ៤ម៉ឺននាក់ នៅទូទាំងប្រទេសក្នុងនោះមាន២ម៉ឺននាក់ នៅរាជធានីភ្នំពេញដែលពួកគេកំពុងប្រឈមនឹងជំងឺអេដស៍គួរឲ្យព្រួយបារម្ភ។
លោកវេជ្ជបណ្ឌិតបានលើកឡើងរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍សើរស្បែក និង កាមរោគឆ្នាំ២០១៧ ដែលបានផ្សព្វផ្សាយនៅឆ្នាំ២០១៨នេះបានឲ្យដឹងថា អត្រាប្រេវ៉ាឡង់អ្នកផ្ទុកជំងឺអេដស៍ក្នុងចំណោមមនុស្សពេញវ័យដែលមានអាយុចាប់ពី១៥ឆ្នាំដល់៤៩ឆ្នាំមានប្រមាណ៦៨០០០នាក់ ក្នុងនោះស្ត្រីធ្វើការនៅតាមសេវាកម្សាន្តសប្បាយចំនួន២,៣ភាគរយ។
លោកវេជ្ជបណ្ឌិតបានបន្តទៀតថា ក្នុងចំណោម៦៨០០០នាក់នោះ មានតែ៨៦ភាគរយបានដឹងថា ខ្លួនមានផ្ទុកមេរោគអេដស៍ចំណែក១៤ភាគរយទៀតស្មើនឹងជិត១ម៉ឺននាក់ នៅមិនទាន់ដឹងនៅឡើយទេ។ ក្នុងចំណោម៨៦ភាគរយដែលបានដឹងខ្លួនថាឆ្លងជំងឺអេដស៍នោះ អ្នកដែលបានទៅទទួលសេវាព្យាបាលដោយឱសថប្រឆាំងមេរោគអេដស៍ប្រមាណ៩៨ភាគរយរីឯ២ភាគរយទៀតមិនបានទៅទទួលឱសថទេ៕
Source: Kampuchea Thmey Daily
0 Comments