លី វ៉ា​ហេ​ទ​,​លី មី​ហ្សា​ន និង ស្លេះ ស៊េ​ន ត​កិច្ចសន្យា​ជាមួយ​បឹងកេត រហូតដល់​ឆ្នាំ​២០២០ ខាងមុខ​

ក្លិប​បឹងកេត​អែ​ហ្វ​ស៊ី ដែល​កំពុង​ឈរ​កំពូល​តារាង​ពានរង្វាន់​លី​គ​កំពូល​កម្ពុជា Metfone Cambodian League 2018 បណ្តោះអាសន្ន​បាន​ប្រកាស​ថា ​សម្រេច​បន្ត​កិច្ចសន្យា​រយៈពេល​២​ឆ្នាំ​ទៀត​ជាមួយ​កីឡាករ​សំខាន់ៗ​៣​នាក់​ ដោយ​ក្នុង​នោះ​មាន លី វ៉ា​ហេ​ទ​,​លី មី​ហ្សា​ន និង ស្លេះ ស៊េ​ន ដែលជា​កម្លាំង​ស្នូល​លើ​ទីលាន​នាពេល​បច្ចុប្បន្ន​នៅក្នុង​ក្រុម​។

​ក្រុម​ដែល​មាន​ប្រភព​មកពី​ខេត្តកំពង់ចាម មួយ​នេះ​បាន​ជូនដំណឹង​ដល់​អ្នកគាំទ្រ​ថា​ក្រុម​របស់ខ្លួន​បានសម្រេច​បន្ត​កិច្ចសន្យា​ជាមួយ​កីឡាករ​៣​នាក់​ខាងលើ​ រហូតដល់​ឆ្នាំ​២០២០ ខាងមុខ​។ លី វ៉ា​ហេ​ទ ជា​ខ្សែបម្រើ​សំខាន់​ក្រោយពី​សិស្ស​ច្បង ទូច បញ្ច​រ៉ុង ក៏ដូចជា សុខ សុវណ្ណ ចាកចេញ​ទៅកាន់​វិសាខា កាលពីពេល​ថ្មីៗ​។ ចំណែក​កីឡាករ លី មី​ហ្សា ជា​ខ្សែបម្រើ ដែល​លោក ហៅ សុជាតិ តែងតែ​ប្រើប្រាស់​ក្នុង​ប្រព័ន្ធ​ប្រយុទ្ធ​របស់ខ្លួន​យ៉ាង​មាន​ប្រសិទ្ធភាព​។ ចំពោះ​កីឡាករ ស្លេះ សេន ត្រូវបាន​ក្លិប​ជ្រើសរើស​ចេញពី​ឈុត​យុវជន​ហើយ​បង្ហាញ​សមត្ថភាព​គួរ​ឲ្យ​កត់សម្គាល់​ផងដែរ។



​និយាយ​រួម​កីឡាករ​ទាំង​៤ ត្រូវ​បាន​ក្លិប​ដាក់​ឲ្យ​ចូលលេង​ក្នុង​ជម្រើស​១១​នាក់​ដំបូង​ស្ទើរតែ​ទាំងស្រុង​ក្នុង​ប្រកួត​លី​គ​កំពូល​កម្ពុជា ឬ ពានរង្វាន់ AFC Cup នា​ពេល​កន្លងទៅ​ ខណៈ​កីឡាករ​ភាគច្រើន​ប្រចាំ​ក្រុម​យុវជន​ថ្នាល​របស់​ក្លិប​ ធ្លាប់​បាន​ចូល​លេង​ក្នុង​ពានរង្វាន់​សម្តេច​តេ​ជោ ហ៊ុន សែន កាលពី​ឆ្នាំ​២០១៦ ជាមួយគ្នា មុន​ទទួល​បាន​បទពិសោធ​ន៍​នៅ​ក្រុម​ធំ​ពេលនេះ​។

​បឹងកេត ត្រូវការ​ពង្រឹងសមត្ថភាព​កីឡាករ​ក្នុងស្រុក​បន្ថែម ចំ​ពេល​ដែល​កីឡាករ​ឆ្នើមៗ​មួយចំនួន​ដូចជា ឃួន ឡា​បូ​រ៉ាវី​, សុខ សុវណ្ណ​, ស៊ូ យ៉ា​ទី ចាកចេញ​នា​ពេល​កន្លងទៅ ខណៈ​ក្រុម​ក៏ត្រូវ​ការពារ​តំណែង​ជើងឯក​ក្នុង​ពានរង្វាន់​លី​គ​កំពូល​កម្ពុជា ព្រមទាំង​ត្រៀម​ប្រកួត​ក្នុង​ពានរង្វាន់​សម្តេច​តេ​ជោ ហ៊ុន សែន នៅ​ខែក្រោយ​។

ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅក្រៅ​ស្រុក​វិញ​ក្រុម​ដែលមាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើងដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផង​ដែរ​។ នៅ​ឆ្នាំ​២០១៨​និង​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់​លំដាប់​ទី​២​ប្រចាំ​ទ្វីបអាស៊ី AF Cup ផងដែរ​តែ​ធ្លាក់​ត្រឹម​វគ្គ​ជម្រុះ​តាម​ពូ​ល​ដូចគ្នា​៕

 

Source: Kampuchea Thmey Daily