បន្ទាយមានជ័យ ៖ បុរសវ័យក្មេងម្នាក់ ត្រូវកម្លាំងអាវុធហត្ថធ្វើការឃាត់ខ្លួនក្នុងករណីស្នេហាត្រីកោណ។ ការឃាត់ខ្លួនជនសង្ស័យ នៅវេលាម៉ោង៤រសៀល ថ្ងៃទី ១ ខែមិថុនា ឆ្នាំ២០១៨ នៅចំណុចភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែត។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា យោងលើពាក្យបណ្តឹងរបស់ឈ្មោះ សារិន វាសនា ភេទ ស្រី អាយុ២៤ឆ្នាំ រស់នៅភូមិក្បាលស្ពាន២ សង្កាត់ប៉ោយប៉ែត ក្រុងប៉ោយប៉ែតជាអតីតសង្សារចាស់បានប្តឹងឈ្មោះមាស វណ្ណនុតហៅ និត ភេទ ប្រុស អាយុ ២១ឆ្នាំ ស្នាក់នៅបន្ទប់ជួល ក្នុងផ្ទះសំណាក់ លឹម ងួន ស្ថិតនៅភូមិក្បាលស្ពាន២ សង្កាត់ប៉ោយប៉ែត ក្នុងករណីជនសង្ស័យបានវាយមកលើខ្លួនហើយបានយកដង្កៀបអ៊ុតសក់ និងកាំបិតចិតបន្លែមកចាក់លើខ្លួន និងសង្សារ ហើយបានគំរាមថានឹងសម្លាប់ថែមទៀត។
លុះព្រឹកថ្ងៃទី៣១ ខែឧសភា ឆ្នាំ២០១៨ កម្លាំងមូលដ្ឋានកងរាជអាវុធហត្ថក្រុងប៉ោយប៉ែតបានដឹកនាំកម្លាំងអាវុធហត្ថ១ក្រុមចុះប្រតិបត្តិការបង្ក្រាបជនសង្ស័យបានភ្លាមៗ ហើយបានបញ្ជូនមកការដ្ឋានកងរាជអាវុធហត្ថខេត្តដើម្បីចាត់ការបន្តតាមនីតិវិធីបន្ត។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ថា ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ ហើយតាមការបំភ្លឺរបស់ជនរងគ្រោះបាននិយាយឲ្យដឹងថា ជនសង្ស័យ ពីមុនមកធ្លាប់មានទំនាក់ទំនងស្នេហាជាមួយគ្នា ហើយបានបែកបាក់គ្នា រយៈពេល ១ខែមកហើយ ចាប់តាំងពីបែកបាក់គ្នាមក ខ្លួនក៏មានសង្សារថ្មីផងដែរ។
លុះដល់ថ្ងៃទី៣១ ខែឧសភា ឆ្នាំ២០១៨ជនសង្ស័យបានឃើញសង្សារចាស់របស់ខ្លួនបណ្តើរជាមួយប្រុសផ្សេង កើតមានចិត្តប្រច័ណ្ឌក៏បានទៅបន្ទប់ជនរងគ្រោះយកដង្កៀបអ៊ុតសក់វាយ ជនរងគ្រោះ និងសង្សារថ្មី បណ្ដាលឲ្យរបួសធ្ងន់ ព្រមទាំងគំរាមសម្លាប់ បើសង្សារដែលទើបបែកគ្នា១ខែមុន មិនព្រមស្រឡាញ់ខ្លួនវិញ។
ផ្អែកតាមចម្លើយសារភាពរបស់ជនសង្ស័យ បានប្រព្រឹត្តបទល្មើស ហិង្សាដោយចេតនា យ៉ាងពិតប្រាកដ កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាង ទៅតុលាការ ដើម្បីចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments