ព្រះសីហនុ ៖ នៅព្រឹកថ្ងៃ ទី៨ ខែមិថុនា រដ្ឋបាលខេត្តព្រះសីហនុ បានរៀបចំប្រារព្ធទិវាបរិស្ថានជាតិ និងបរិស្ថានពិភពលោក ០៥ មិថុនា ឆ្នាំ២០១៨ ក្រោមប្រធានបទ « រួមគ្នាដើម្បីលុបបំបាត់ការបំពុលប្លាស្ទិក»។
ពិធីនេះបានធ្វើឡើងនៅវេទិកាបុណ្យជាតិ៧មករា និងមានការអញ្ជើញចូលរួម ពីសំណាក់លោក យន្ត មីន អភិបាល នៃគណអភិបាលខេត្តព្រះសីហនុព្រមទាំង មន្ត្រីរាជការជុំវិញខេត្ត អាជីវករ លោកគ្រូ អ្នកគ្រូ និងសិស្សានុសិស្ស យ៉ាងច្រើនកុះករ។
លោក សាមុត សុធារិទ្ធ ប្រធានមន្ទីរបរិស្ថាaនខេត្តព្រះសីហនុ មាន ប្រសាសន៍ថា ទិវាបរិស្ថានជាតិ និងបរិស្ថានពិភពលោកឆ្នាំ២០១៨ ឆ្លុះបញ្ចាំងពីឆន្ទៈរួម ដើម្បីកិច្ចគាំពារបរិស្ថាន និងភពផែនដី ពិសេស ការប្រារព្ធទិវាបរិស្ថាន ក្នុងគោលបំណងផ្សព្វផ្សាយ និងបញ្ជ្រាបការ យល់ដឹងអំពីភាពចាំបាច់ និងសារៈប្រយោជន៍ នៃកិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិឲ្យបានសមស្រប សំដៅកែប្រែផ្នត់គំនិតមហាជនគ្រប់មជ្ឈដ្ឋាន ឲ្យទៅជាកម្លាំងចលករ ដើម្បីចូលរួមចំណែកដល់ការលើកកម្ពស់ប្រសិទ្ធភាពការងារគ្រប់គ្រងធនធានធម្មជាតិ និងបរិស្ថាន នៅលើភពផែនដី ស្របតាមទស្សនទាន «ការអភិវឌ្ឍដោយចីរភាព»។
លោក យន្ត មីន បានមានប្រសាសន៍ថា ការងារបរិស្ថានតម្រូវឲ្យអ្នកពាក់ពន្ធទាំងអស់ក្នុងសហគមន៍ តំបន់ និងពិភពលោកត្រូវបន្តពង្រឹងប្រសិទ្ធភាពគ្រប់គ្រងបរិស្ថាន និងធនធានធម្មជាតិ និងរកវិធីដោះស្រាយឲ្យបានសមស្រប ដើម្បីរក្សាបានសុវត្ថិភាពភពផែនដី វឌ្ឍនភាពសង្គម និងការរស់នៅប្រកបដោយចីរភាព។ រាជរដ្ឋាភិបាលបានអនុម័តផែនការយុទ្ធសាស្ត្រ ឆ្លើយតបនឹងការប្រែប្រួលអាកាស ធាតុកម្ពុជាឆ្នាំ២០១៤- ២០២៣ ដោយចក្ខុវិស័យកម្រងកម្មវិធីអភិវឌ្ឍឆ្ពោះទៅសង្គមមួយបៃតង និងបញ្ចេញកាបូនិច ធន់នឹងការប្រែ ប្រួលអាកាសធាតុ សមធម៌ ចីរភាព និងការផ្តល់ចំណេះដឹងជាគោលដើម្បីជាត្រីវិស័យតម្រង់ទិស ឆ្លើយតបទៅនឹងការប្រែប្រួលអាកាស ធាតុនៅកម្ពុជា។
ការកើនឡើងកម្ដៅភពផែនដី គ្រោះរាំងស្ងួតទឹកជំនន់ ការបាត់បង់ព្រៃឈើ ជីវចម្រុះ កង្វះទឹកស្អាត ថាមពលបញ្ហាជំងឺឆ្លង និងសន្តិសុខស្បៀង។ល។ បានជះឥទ្ធិពលអវិជ្ជមានទៅលើជីវភាពរស់នៅសុខុមាលភាពមនុស្ស និងការអភិវឌ្ឍន៍ប្រកប ដោយចីរភាព និងធ្វើឲ្យអន់ថយខាងសេដ្ឋកិច្ច ធ្វើយ៉ាងណាលើក កម្ពស់នូវកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍប្រកបដោយចីរភាព។
លោកយន្ត មីន បន្តថា ទិវាបរិស្ថានពិភពលោកឆ្នាំ២០១៨ គឺជាការផ្លាស់ប្ដូរឥរិយាបថ និងអាកប្បកិរិយារបស់មនុស្សក្នុងការប្រើប្រាស់ផលិតផលធ្វើពីផ្លាស្ទិច គឺជារឿងចាំបាច់បំផុត ព្រោះការបំពុលដោយថង់ប្លាស្ទិច ធ្វើឲ្យប៉ះពាល់ដល់អាយុជីវិតមនុស្ស សត្វពិសេស សំណល់ផ្លាស្ទិច កំពុងគំរាមកំហែងយ៉ាងធ្ងន់ធ្ងរដល់ភពផែនដីរបស់យើង និងសំណូមពរប្រជាពលរដ្ឋ កុំបោះសំណល់ ឬថង់ប្លាស្ទិកចោលក្នុងបរិស្ថាន ព្រោះបង្កប៉ះពាល់គុណភាពដី ទឹក ប្រព័ន្ធអេកូឡូស៊ី ពិសេសជីវៈចម្រុះក្នុងទឹក រួមគ្នាកាត់បន្ថយថង់ប្លាស្ទិក ដើម្បីសុខភាពយើងទាំងអស់គ្នា៕
Source: Kampuchea Thmey Daily
0 Comments