ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា សម្រាប់ការផ្ដល់ប័ណ្ណព័ត៌មានអ្នកបោះឆ្នោត នឹងចាប់ផ្ដើមពីថ្ងៃទី៦ ខែមិថុនា ឆ្នាំ២០១៨ ដល់ថ្ងៃទី៥ ខែកក្កដាឆ្នាំ២០១៨ ហើយការកំណត់នេះ បានធ្វើឡើងដោយយោងតាមសេចក្តីសម្រេចលេខ១០៩ គ.ជ.ប ស.ស.រ ស្ដីពីការផលិត និងការចែកប័ណ្ណព័ត៌មាន ក្នុងបំណងកំណត់អំពីការពិនិត្យ និងការចែកប័ណ្ណព័ត៌មានអ្នកបោះឆ្នោត ជូនដល់អ្នកបោះឆ្នោត ដែលមានឈ្មោះក្នុងបញ្ជីបោះឆ្នោតផ្លូវការ។
គ.ជ.ប បញ្ជាក់ថា ប័ណ្ណព័ត៌មានអ្នកបោះឆ្នោតត្រូវបានធ្វើឡើងតាមលក្ខណៈបច្ចេកទេសកុំព្យូទ័រ ដោយមានការផ្ទេរឈ្មោះ និងទិន្នន័យរបស់អ្នកបោះឆ្នោត ចេញពីបញ្ជីបោះឆ្នោតផ្លូវការឆ្នាំ ២០១៧ ចូលទៅក្នុងប័ណ្ណព័ត៌មានអ្នកបោះឆ្នោត។ ប័ណ្ណព័ត៌មាន មានរាងចតុកោណកែង ដែលមានបណ្ដោយប្រវែង៩,៦សង់ទីម៉ែត្រ និងទទឹងប្រវែង៦,៦ សង់ទីម៉ែត្រ។
នៅផ្នែកខាងមុខមាននិមិត្តសញ្ញា គ.ជ.ប កាលបរិច្ឆេទ និងពេលវេលានៃការបោះឆ្នោត ឈ្មោះ ភេទ ថ្ងៃខែឆ្នាំកំណើត និងលំនៅដ្ឋាន ឬទីសំណាក់នៃអ្នកបោះឆ្នោត ព្រមទាំងលេខរៀងនៅក្នុងបញ្ជីបោះឆ្នោត ការិយាល័យ និងទីតាំងការិយាល័យបោះឆ្នោតផងដែរ។ ចំណែកផ្នែកខាងខ្នងនៃប័ណ្ណព័ត៌មាន មានអត្តសញ្ញាណប័ណ្ណសញ្ជាតិខ្មែរ (ប្រភេទទី១ ប្រភេទទី២ ឬប្រភេទទី៣) ព្រមទាំងឯកសារបញ្ជាក់អត្តសញ្ញាណ បម្រើឲ្យការបោះឆ្នោត។
តាមសេចក្តីប្រកាសព័ត៌មានរបស់ គ.ជ.ប បានបញ្ជាក់ទៀតថា បន្ទាប់ពីបញ្ជីបោះឆ្នោតឆ្នាំ ២០១៧ ត្រូវបាន គ.ជ.ប ផ្តល់សុពលភាពរួចមក នាយកដ្ឋានគ្រប់គ្រងទិន្នន័យអ្នកបោះឆ្នោតនិងបញ្ជីបោះឆ្នោតមានភារកិច្ចយ៉ាងសំខាន់ក្នុងការផលិតបញ្ជីបោះឆ្នោតផ្លូវការ និងផលិតប័ណ្ណព័ត៌មានអ្នកបោះឆ្នោតនេះ។
តាម គ.ជ.ប ការចែកប័ណ្ណព័ត៌មានអ្នកបោះឆ្នោតនេះ គណៈកម្មការរាជធានី ខេត្ត មានភារកិច្ចទំនាក់ទំនង និងសហការជាមួយគណៈអភិបាលរាជធានី ខេត្ត និងគណៈអភិបាលក្រុង ស្រុក ខណ្ឌ ពាក់ព័ន្ធដើម្បីផ្ដល់ការគាំទ្រ និងមេភូមិ ជំនួយការភូមិ ដើម្បីផ្ដល់ប័ណ្ណព័ត៌មានអ្នកបោះឆ្នោត។ ចំណែកគណៈកម្មការឃុំ សង្កាត់ រៀបចំការបោះឆ្នោត មានតួនាទីចាត់តាំងក្រុមចែកប័ណ្ណព័ត៌មានអ្នកបោះឆ្នោតមួយ ឬច្រើនក្រុម សមស្របតាមចំនួនភូមិ និងភូមិសាស្ត្រជាក់ស្ដែងរបស់ខ្លួន ដើម្បីផ្ដល់បានព័ត៌មាននេះ។
សូមបញ្ជាក់ថា ដំណើរការបោះឆ្នោតជ្រើសតាំងតំណាងរាស្ដ្រនីតិកាលទី៦ ឆ្នាំ២០១៨ នឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ ហើយគណបក្សនយោបាយ ដែលបានចូលរួមប្រកួតប្រជែងមានចំនួន២០ រួមមាន គណបក្ស “គណបក្សខ្មែររួបរួមជាតិ” លេខរៀងទី១, គណបក្ស “គណបក្សមាតុភូមិយើង” លេខរៀងទី២, គណបក្ស “គណបក្សពន្លឺថ្មី” លេខរៀងទី៣, គណបក្ស “សញ្ជាតិកម្ពុជា” លេខរៀងទី៤, គណបក្ស “ខ្មែរក្រោក” លេខរៀងទី៥, គណបក្ស “សំបុកឃ្មុំសង្គមប្រជាធិបតេយ្យ” លេខរៀងទី៦, គណបក្ស “ប្រជាធិបតេយ្យមូលដ្ឋាន” លេខរៀងទី៧, គណបក្ស “ខ្មែរសាធារណរដ្ឋប្រជាធិបតេយ្យ” លេខរៀងទី៨, គណបក្ស “រស្មីខេមរា” លេខរៀងទី៩, គណបក្ស “សម្ព័ន្ធដើម្បីប្រជាធិបតេយ្យ” លេខរៀងទី១០, គណបក្ស “ខ្មែរសាធារណរដ្ឋ” លេខរៀងទី១១, គណបក្ស “ខ្មែរឈប់ក្រ” លេខរៀងទី១២, គណបក្ស “ហ៊្វុនស៊ិនប៉ិច” លេខរៀងទី១៣, គណបក្ស “ខ្មែរអភិវឌ្ឍន៍សេដ្ឋកិច្ច” លេខរៀងទី១៤, គណបក្ស “យុវជនកម្ពុជា” លេខរៀងទី១៥, គណបក្ស “ធម្មាធិបតេយ្យ” លេខរៀងទី១៦, គណបក្ស “ឆន្ទៈខ្មែរ” លេខរៀងទី១៧, គណបក្ស “ជនជាតិដើមប្រជាធិបតេយ្យកម្ពុជា” លេខរៀងទី១៨, គណបក្ស “ខ្មែរតែមួយ” លេខរៀងទី១៩ និងគណបក្ស “ប្រជាជនកម្ពុជា” លេខរៀងទី២០៕
Source: Kampuchea Thmey Daily
0 Comments