សមិទ្ធផល មានតម្លៃជាង៦០ម៉ឺនដុល្លារ នៅក្នុងវត្តចំការខ្សាច់ ត្រូវបានសម្ពោធដាក់ឲ្យប្រើប្រាស់ជាផ្លូវការ

ភ្នំពេញ ៖ ឧបដ្ឋានសាលា និងសាលាពុទ្ធិកបឋមសិក្សា ព្រមទាំងសមិទ្ធផលជាច្រើនទៀត ដែលមានតម្លៃ ៦០៣ ១៩០ ដុល្លារ ដែលជាការជួយឧបត្ថម្ភរបស់លោកបណ្ឌិត លី ឆេង អ្នកតំណាងរាស្ត្រមណ្ឌលភ្នំពេញ អគ្គនាយកប៊ែលធីគ្រុប និងជាសាកលវិទ្យាធិការសាកលវិទ្យាល័យប៊ែលធីអន្តរជាតិ ព្រមទាំងភរិយា នៅក្នុងវត្តចំការខ្សាច់ ត្រូវបានសម្ពោធដាក់ឲ្យប្រើប្រាស់ជាផ្លូវការ កាលពីព្រឹកថ្ងៃទី១៣ ខែមិថុនា ឆ្នាំ២០១៨ ក្រោមអធិបតីភាពសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា។

តាមរបាយការណ៍របស់ប្រធានគណៈកម្មការវត្តបានឲ្យដឹងថា វត្តចំការខ្សាច់ ជាអារាមមួយស្ថិតនៅតាមសណ្តរស្ទឹងព្រែកត្នោត ស្ថិតនៅក្នុងភូមិម៉ឺន្ត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ ហើយឈ្មោះដែលនាំឲ្យអ្នកស្រុកហៅថា វត្តចំការខ្សាច់នេះ ដោយសារតែវត្តនេះបានកសាងឡើងនៅលើទីវាលខ្សាច់ដ៏ធំធេង ដែលត្រូវបានចាក់គរជារៀងរាល់ឆ្នាំ ដោយខ្សែទឹកស្ទឹងព្រែកត្នោត ហើយមកដល់ពេលនេះ ដីខ្សាច់នៅតែបន្តចាក់បង្គរដោយខ្សែទឹកភាគខាងលិចវត្តដដែល។ វត្តនេះផ្តើមកសាងដំបូងនៅឆ្នាំ១៥០៤ ហើយព្រះគ្រូចៅអធិការពីមួយជំនាន់ ទៅមួយជំនាន់បានខំកសាងវត្តនេះជាបន្តបន្ទាប់រហូតមក តែវត្តចំការខ្សាច់ត្រូវបានបំផ្លាញស្ទើគ្មានសល់នៅក្នុងរបបកម្ពុជាប្រជាធិបតេយ្យ។

របាយការណ៍ដដែលបានបញ្ជាក់ថា ក្រោយថ្ងៃរំដោះឆ្នាំ១៩៧៩ សាសនាត្រូវបានបង្កើតឡើងវិញ ហើយសមិទ្ធផលត្រូវបានកសាងឡើងវិញជាបន្តបន្ទាប់ផងដែរ។ រហូតមកដល់បច្ចុប្បន្ននេះ លោកបណ្ឌិត លី ឆេង អ្នកតំណាងរាស្ត្រមណ្ឌលភ្នំពេញ អគ្គនាយកប៊ែលធីគ្រុប និងជាសាកលវិទ្យាធិការសាកលវិទ្យាល័យប៊ែលធីអន្តរជាតិ និងជាប្រធានក្រុមការងារចុះជួយសង្កាត់ស្ពានថ្ម ព្រមទាំងភរិយា លោកស្រី ប៊ូ អ៊ា រួមជាមួយព្រះសង្ឃ គណៈកម្មការអាចារ្យវត្ត និងពុទ្ធបរិស័ទ បានរួមគ្នាកសាងសំណង់សមិទ្ធផលនានា ដែលត្រូវដាក់សម្ពោធនាពេលនេះ។

លោក ឃួង ស្រេង អភិបាល រាជធានីភ្នំពេញបានឲ្យដឹងថា វត្តចំការខ្សាច់ នេះត្រូវបានព្រះសង្ឃ ពុទ្ធបរិស័ទ រួមគ្នាអភិវឌ្ឍន៍ឲ្យមានការរីកចម្រើន គួរឲ្យគត់សម្គាល់ គឺមានលក្ខណៈសមជាទីសក្ការបូជារហូតមក។ ប៉ុន្តែនៅចន្លោះឆ្នាំ១៩៧២ ដល់១៩៧៩ ទីវត្តនេះ បានក្លាយទៅជាទីតាំងសមរភូមិរវាងកងទ័ព ដែលដឹកនាំដោយសេនាប្រមុខលន់នល់ និងចលនារំដោះជាតិខ្មែរក្រហម បានបំផ្លាញសមិទ្ធផលនានា ក្នុងវត្តទាំងស្រុង។ វត្តចំការខ្សាច់ ត្រូវបានបើកឲ្យប្រជាពលរដ្ឋចូលគោរពបូជាឡើងវិញ នៅក្នុងឆ្នាំ១៩៨២។ ចាប់ពីឆ្នាំ១៩៨២ រហូតមក ដល់ពេលនេះ មានព្រះចៅអធិការចំនួន១០អង្គហើយ។ បច្ចុប្បន្ននេះ ព្រះតេជគុណ ឈឿន ឈូក ជាព្រះចៅអធិការ និងមានព្រះសង្ឃគង់អាស្រ័យចំនួន២០អង្គ ហើយសមិទ្ធផលនានាជាច្រើនត្រូវបានកសាងសង់ និងជួលជុលជាបន្តបន្ទាប់ ក្នុងនោះរួមមាន រោងភត្ត បូជណីយដ្ឋាន ព្រះពុទ្ធបដិមាស្ពាន់ ឆព្វណ្ណរង្សី រូបសំណាកព្រះបាទជយវរ្ម័នទី៧ កសាងកុដិថ្មី១ខ្នង ចាក់ដីបំពេញទីធ្លាវត្ត ចាក់សាប បន្ទប់ទឹក រៀបចំសួនច្បារ បង្គោលភ្លើង ជីកអណ្តូងទឹក៣កន្លែង ប្រព័ន្ធទឹកប្រើប្រាស់ក្នុងវត្ត និងកសាងឧបដ្ឋានសាលា សាលាពុទ្ធិកបឋមសិក្សា ដែលមានទំហំបណ្តោយ ប្រវែង៣០ម៉ែត្រ ទទឹងប្រវែង២២ម៉ែត្រ កម្ពស់២៤ម៉ែត្រ ចាប់ផ្តើមកសាងចាប់ពីថ្ងៃទី១០ ខែធ្នូឆ្នាំ២០១៤ និងបានបញ្ចប់ជាស្ថាពរនៅថ្ងៃទី៣០ខែឧសភា ឆ្នាំ២០១៨។

សមិទ្ធផលទាំងអស់នេះ គឺបានកើតចេញពីមនុញ្ញផល នៃការអភិវឌ្ឍជាតិមាតុភូមិ ដើម្បីទ្រទ្រង់លើកស្ទួយវិស័យព្រះពុទ្ធសាសនា និងផ្តើមចេញពីកម្លាំងមហាសាមគ្គីរបស់រាជរដ្ឋាភិបាល អាជ្ញាធរដែនដី ព្រះសង្ឃ លោកយាយ លោកតា ពុទ្ធបរិស័ទចំណុះជើងវត្ត បងប្អូនប្រជាពលរដ្ឋ ព្រមទាំងសប្បុរជនទាំងក្នុង និងក្រៅប្រទេស ជាពិសេសលោកបណ្ឌិត លី ឆេង អ្នកតំណាងរាស្ត្រមណ្ឌលភ្នំពេញ និងជាប្រធានក្រុមការងារចុះជួយសង្កាត់ស្ពានថ្ម ព្រមទាំងភរិយា លោកស្រី ប៊ូ អ៊ា ដែលបានចំណាយថវិកាសរុបចំនួន៦០៣.១៩០ដុល្លារ ហើយសមិទ្ធផលនេះ នឹងក្លាយជាប្រយោជន៍សម្រាប់ព្រះថេរនុថេត្ថេរៈគ្រប់ព្រះអង្គ បំពេញសង្ឃកម្មតាមពុទ្ធោវាទ និងជាទីសេនាសនៈដ៏គត់មត់ សម្រាប់សីលវន្ត សីលវតី និងបងប្អូនពុទ្ធបរិស័ទទាំងអស់ ប្រណិប័តន៍ព្រះធម៌ ព្រះវិន័យ ទុកជាធម្មទានដ៏ល្អក្នុងវិស័យព្រះពុទ្ធសាសនា។

មានប្រសាសន៍ទៅកាន់ពុទ្ធបរិស័ទ ក៏ដូចជាអ្នកចូលរួម សម្តេចវិបុលសេនាភក្តី សាយ ឈុំ បានមានប្រសាសន៍ថា សម្រាប់ប្រជាពលរដ្ឋដែលកាន់ភ្ជាប់នូវព្រះពុទ្ធសាសនា ក្នុងមួយជីវិត គឺនៅជាមួយវត្ត និងព្រះសង្ឃមិនអាចឃ្លាតឆ្ងាយឡើយ ពោលគឺកាលនៅតូច កាលពីជំនាន់មុននេះ ពេលនៅជាកុមារភាពត្រូវបាឪពុកម្តាយយកទៅផ្ញើនៅវត្ត លុះធំបន្តិចត្រូវបួសរៀនជាសាមណេរ បន្តជាភិក្ខុ ។ ក្រោយពីបញ្ចប់ការសិក្សានៅវត្តហើយនោះ ត្រូវចេញទៅបម្រើការងារវិញ។ បន្តមកទៀត ចាស់ទៅក៏ត្រូវការចូលវត្តអារាមវិញ ហើយពេលស្លាប់ទៅក៏ត្រូវនិមន្តព្រះសង្ឃដើម្បីសូត្រមន្តតាមទំនៀមទម្លាប់សាសនាផងដែរ។ ដូច្នេះហើយ សម្តេចវិបុលសេនាភក្តី សូមអោយព្រះចៅអធិការវត្ត ពុទ្ធបរិស័ទជិតឆ្ងាយទាំងអស់ បន្តជួយកសាងវត្តអោយបានរីកចម្រើនថែមទៀត។ ពង្រឹងលើវិស័យសាសនា ជៀសវាង យកសាសនាមកធ្វើជាឈ្នាន់ ដើម្បីបំរើផលប្រយោជន៍ខ្លួនឯងនាំអោយខូចសាសនារបស់យើង។

សម្តេចវិបុលសេនាភក្តី សាយ ឈុំ បានលើកឡើងទៀតថា ដូនតាយើងបានបន្សល់ទុកនូវវប្បធម៌ដ៏ល្អៗ សម្រាប់កូនចៅខ្មែរយើងរហូតមកដល់ពេលបច្ចុប្បន្ននេះ ដូច្នេះយើងត្រូវរក្សាអោយបានល្អបន្ថែមទៀតសម្រាប់កូនចៅជំនន់ក្រោយ៕