កណ្ដាល ៖ ករណីទំនាស់ដីធ្លី រវាងម្ចាស់អាហារដ្ឋានស្រីម៉ុច999 រំលោភយកដីសាលាបុណ្យរបស់អ្នកភូមិជ័យ ឧត្តម ឃុំផ្សារដែក ស្រុកពញាឮ ខេត្តកណ្តាល ចាប់តាំងពីដើមខែកុម្ភៈ ឆ្នាំ២០១៨ រហូតដល់ ខែមិថុនា ឆ្នាំ២០១៨នេះ នៅមិនទាន់ដោះស្រាយចេញនៅឡើយទេ ដោយសារតែភាគីខាងចុងចោទបានអះអាងថា គាត់មានឯកសារប្លង់ដី ដែលលោកមេភូមិនិងមេឃុំបានស៊ីញេឲ្យគាត់។
ទំនាស់នេះធ្វើឲ្យប្រជាជនចំនួនជាង៣០០គ្រួសារ បាននាំគ្នាប្រឆាំងចំពោះការរំលោភបំពាននេះ ទប់ទល់ជាមួយម្ចាស់អាហារដ្ឋាន ស្រីម៉ុច999 ដែលមានទីតាំងកន្ទុយដីឡូត៍នៅជាប់សាលាបុណ្យនោះ។
ម្ចាស់អាហារដ្ឋានមួយនេះ ឈ្មោះ ថន ភេទស្រី អាយុជាង៥០ឆ្នាំ (មេម៉ាយ) តែងតែបដិសេធចំពោះការទាមទាររបស់អ្នកភូមិថានឹងមិនប្រគល់ដីនេះឲ្យទៅអ្នកភូមិ ឬ ខាងសាលាបុណ្យនេះឡើយដោយគាត់បានលើកបង្ហាញឯកសារជាសាធារណៈ នៅចំពោះមុខអ្នកតវ៉ាថា មូលហេតុដែលគាត់រុះរើរបងចាស់មកក្រោយបន្ថែមទៀត មកដល់សាលាបុណ្យនេះ គឺគាត់បានធ្វើការវាស់វែងផ្ទៀងផ្ទាត់ទៅតាមប្លង់ដី ដែលលោកមេភូមិឈ្មោះ ជិន សំអឿន និងមេឃុំផ្សារដែក ឈ្មោះ ញឹប ចាន់ ជាអ្នកបានស៊ីញ៉េ ឯកសារប្លង់ដីនេះ ឲ្យគាត់ជាផ្លូវការរួចរាល់ហើយធ្វើជាភស្តុតាង។
លោក ញឹប ចាន់ មេឃុំផ្សារដែក បានមានប្រសាសន៍បកស្រាយប្រាប់ភ្នាក់ងារកម្ពុជាថ្មី នៅរសៀលថ្ងៃទី២០ខែមិថុនា ឆ្នាំ២០១៨ នេះថា ករណីនេះ លោកដោះស្រាយមិនចេញទេ ព្រោះភាគីខាងរំលោភយកដីសាលាបុណ្យ គេមិនព្រមប្រគល់ដីនោះមកឲ្យខាងសាលាបុណ្យជាអចលនទ្រព្យរបស់រដ្ឋនោះទេដូច្នេះលោកបានបញ្ជូនរឿងនេះទៅកាន់សាលាស្រុកឲ្យដោះស្រាយម្តង។
ពាក់ព័ន្ធដល់ការចោទសួរថា តើលោកជាអ្នកស៊ីញេប្លង់ដីនោះ ឲ្យទៅឈ្មោះ ថន ម្ចាស់អាហារដ្ឋាន999 ដែលមានឯកសារបញ្ជាក់ដីនោះ មានប្រវែងជាង៩០ម៉ែត្រ រហូតដល់សាលាបុណ្យនោះ មែនឬទេ? លោកបានឆ្លើយដោយមិនច្បាស់លាស់ថា គ្រាន់តែធ្វើឲ្យដើម្បីសុំខ្ចីលុយពីធនាគារតែប៉ុណ្ណោះ ដោយមិននឹកស្មានថា វាមានរឿងចឹងកើតឡើង។
ទំនាស់នេះ បានធ្វើឲ្យអ្នកភូមិមានការខឹងសម្បា ហៀបនឹងផ្ទុះកំហឹងដោយអំពើហិង្សាដាក់គ្នា ចំនួន២ដងមកហើយ, លើកទី១ នៅដើមខែកុម្ភៈ ខណៈឃើញស្ត្រីឈ្មោះ ថន បានរុះរើរបងចាស់មកបោះបង្គោលរបងថ្មី ដល់ដីផ្លូវសាធារណៈនិង ជាដីទីធ្លារបស់ សាលាបុណ្យភូមិ។ លើកទី២ នៅល្ងាចថ្ងៃទី៣០ ខែមេសាឆ្នាំ២០១៨ ជាថ្ងៃបុណ្យដារភូមិប្រចាំឆ្នាំ ដែលស្ត្រីម្ចាស់ហាងនេះបានបញ្ជាកូនចៅឲ្យយកពោះវៀនមាន់ទារ ស្អុយៗរួមនឹងសំរាមផង មកចាក់គរនៅជាប់សាលាបុណ្យ ក្នុងគោលបំណងមិនឲ្យចាស់ៗនិងព្រះសង្ឃអាចអង្គុយសូត្រធម៌ធ្វើបុណ្យបានដូចសព្វមួយដង។
នៅពេលនោះ អ្នកភូមិនាំគ្នាចោមរោមជេររិះគន់ចំពោះអំពើមិនគប្បីនេះ រហូតអ្នកខ្លះនាំគ្នាកាន់ដំបងនិងកាំបិតប៉ងប្រយុទ្ធគ្នា រហូតផ្អើលដល់ប៉ូលិសនិងមេភូមិ អន្តរាគមន៍យ៉ាងតក់ក្រហល់។
នៅពេលទំនាស់នោះ មេភូមិបានមកសម្របសម្រួលអង្វរប្រជាជនមិនឲ្យប្រើអំពើហិង្សាដាក់អ្នករំលោភបំពានយកដីសាលាបុណ្យនោះទេ ដោយបានពាំនាំនូវពាក្យសំដីរបស់លោកមេឃុំថា នឹងដោះស្រាយជូនឲ្យបានវិញក្នុងពេលឆាប់ៗនេះ។
រហូតមកដល់ពេលនេះ រយៈពេលជិត៤ខែហើយ លោកមេឃុំ មិនមានលទ្ធភាពដោះស្រាយដោយសារកំហុសរបស់ខ្លួនឯងជាមួយនឹងលោកមេភូមិ ហើយបានរុញឲ្យប្រជាជននាំគ្នាទៅតវ៉ា នៅសាលាស្រុកពញា ដោយលោកបានប្រាប់ថា រឿងនេះប្រគល់ឲ្យ ខាងសាលាស្រុកជាអ្នកដោះស្រាយម្តង។
លោក ថន សុវណ្ណា អភិបាលស្រុក ពញាឮ ខេត្តកណ្តាល បានមានប្រសាសន៍ថា លោកមិនទាន់បានដឹងនិងទទួលឯកសារនេះនៅឡើយទេ ហើយថា លោកនឹងចាត់ចែងឲ្យមន្ត្រីជំនាញរបស់លោកធ្វើការទាក់ទងស្រាវជ្រាវរឿងនេះ។
ចំណែកប្រជាពលរដ្ឋនៅភូមិជ័យឧត្តមវិញ បាននាំគ្នាខឹងសម្បាចំពោះលោកមេភូមិនិងមេឃុំក្រោយដឹងរឿងថា មកពីស៊ីញេដីឲ្យគេដល់សាលាបុណ្យចឹង ទើបបានជាមិនហ៊ានចេញមុខដោះស្រាយផ្ទាល់នៅសាលាបុណ្យ មិនចេញមុខសោះហើយថា បើមិនដោះស្រាយឲ្យប្រជាជនទេ លោកមេភូមិនិងលោកមេឃុំ នឹងត្រូវធ្លាក់ឆ្នោត ឬអាចនឹងនាំគ្នាធ្វើបាតុកម្មទម្លាក់ចេញពីតំណែង៕
Source: Kampuchea Thmey Daily
0 Comments