ក្លិបបាល់ទាត់ក្រសួងការពារជាតិ សមាជិកក្នុងពានរង្វាន់លីគកំពូលកម្ពុជា បានម្រេចចិត្តបញ្ចប់កិច្ចសន្យាមុនកាលកំណត់ជាមួយកីឡាករបរទេសម្នាក់ ហើយកីឡាករបរទេសម្នាក់ទៀតនៅក្នុងក្រុមក៏ត្រូវកាត់ប្រាក់ខែ២ខែផងដែរ ក្រោយមានរឿងចម្រូងចម្រាសកើតឡើងក្នុងប្រកួតសប្ដាហ៍ទី៨ កាលពីចុងសប្ដាហ៍កន្លងទៅនេះ។
លោក ខូវ ឆាយ អគ្គលេខាធិការក្លិបក្រសួងការពារជាតិ បានធ្វើសន្និសីទសារព័ត៌មានកាលពីល្ងាចថ្ងៃអង្គារ សប្ដាហ៍នេះដោយបានបញ្ចប់កិច្ចសន្យាកីឡាករកូរ៉េខាងត្បូង Song chi-hun និង កាត់ប្រាក់ឈ្នួលចំនួនពីរខែពីកីឡាករជប៉ុន Yudai Ogawaបន្ទាប់ពីករណីប៉ះទង្គិចគ្នាជាមួយកីឡាករព្រះខ័នរាជស្វាយរៀង កាលថ្ងៃអាទិត្យ ទី០៣ មិថុនា កន្លងទៅលើទីលានកីឡដ្ឋានខេត្តស្វាយរៀង។
លោក ខូវ ឆាយ ថា ការដាក់ពិន័យលើកូនក្រុមខ្លួននេះដើម្បីជាគំរូដល់កីឡាករដទៃទៀតកុំឲ្យពាក់ព័ន្ធនឹងអំពើហិង្សា។ លោកថា«ចំណាត់ការរបស់យើងគឺមានការដាក់ពិន័យដល់កីឡាករយើងពីរនាក់។ ទី១ គឺកីឡាករ Song chi-hun ដែលពាក់ព័ន្ធនឹងអំពើហិង្សានេះ។ យើងមិនកាត់ក្ដីថា អ្នកណាខុស នរណាត្រូវទេ យើងទុកតួនាទីនេះដល់សហព័ន្ធ។ តែសម្រាប់យើង គឺជាលក្ខខន្តិកៈរបស់យើងដែលមិនឲ្យកីឡាករណាមួយពាក់ព័ន្ធនឹងអំពើហិង្សាទេ ព្រោះវាខុសនឹងបទបញ្ជារបស់យើង។ ម្នាក់ទៀត គឺកីឡាករជប៉ុន Yudai Ogawa ដែលពាក់ព័ន្ធដែរ គឺយើងនឹងកាត់ប្រាក់ខែចំនួនពីរខែ។
ថ្នាក់ដឹកនាំក្លិបរូបនេះ បានបញ្ជាក់ថា ការសម្រេចចិត្តនេះគឺលោកចង់ព្រមានដល់កីឡាកររបស់លោក ឯទៀតកុំឲ្យពាក់ព័ន្ធទៅនឹងអំពើហិង្សាបែបនេះ ព្រោះក្លិបលោកជាក្លិបស្ថិតក្រោមចំណុះក្រសួងការពារជាតិ គឺមានវិន័យត្រឹមត្រូវ។ ក្លិបរបស់លោកនឹងទទួលយកការពិន័យដោយឡែកទៀតពីសហព័ន្ធកីឡាបាល់ទាត់កម្ពុជាចំពោះករណីហិង្សានេះ។
សូមរំលឹកថា ការការប្រកួតហៀបនឹងចប់ទៅហើយ ខណៈក្រសួងការពារជាតិនាំមុខម្ចាស់ផ្ទះព្រះខ័នរាជស្វាយរៀង ២ទល់១ ក៏មានករណីប៉ះទង្គិចគ្នានេះកើតឡើងក្រោយ ណុប តុលា របស់ព្រះខ័នរាជស្វាយរៀងឈូសទៅលើកីឡាករ Song chi-hun របស់ក្រុមក្រសួងការពារជាតិ ហើយកើតការប្រទូស្ដរាយគ្នា។ ក្រោយហេតុការណ៍នេះកីឡាករ Yudai Ogawa ក្រសួងការពារជាតិ ត្រូវគ្រូពេទ្យឲ្យសម្រាករយៈពេល១ខែព្រោះរហែកក្រដាសត្រជៀក និងមានរបួសនៅផ្នែកផ្សេងៗនៃរាងកាយ។ យ៉ាងណានៅមិនទាន់មានលិខិតពិន័យផ្លូវការពីគណៈកម្មការវិន័យរបស់សហព័ន្ធកីឡាបាល់ទាត់កម្ពុជា ជុំវិញហេតុការណ៍នេះនៅឡើយនោះទេ៕
Source: Kampuchea Thmey Daily
0 Comments