ភ្នំពេញ ៖ ស្ពានអាកាសនិងផ្លូវក្រោមដីនៅត្រង់រង្វង់មូលចោមចៅនឹងបើកការដ្ឋានស្ថាបនាជាផ្លូវការនៅព្រឹកថ្ងៃទី២៩ ខែមិថុនានេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ហើយដើម្បីរក្សាឲ្យមានសន្តិសុខ សុវត្ថិភាពនិងសណ្តាប់ធ្នាប់ល្អប្រសើររដ្ឋបាលរាជធានីភ្នំពេញ បានចេញសេចក្ដីជូនដំណឹងឲ្យប្រជាពលរដ្ឋពង្វាងចរាចរណ៍ចេញ-ចូល រាជធានីភ្នំពេញ ពិសេសនៅត្រង់ចំណុចរង្វង់មូលចោមចៅនេះតែម្តង។
ពិធីបើកការដ្ឋានសាងសង់ស្ពានអាកាស និងផ្លូវក្រោមដី ចំណុចរង្វង់មូលចោមចៅ នឹងធ្វើឡើងនៅថ្ងៃទី២៩ ខែមិថុនាឆ្នាំ២០១៨នេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា។
ទន្ទឹមនឹងនេះរដ្ឋបាលរាជធានីភ្នំពេញ សូមជម្រាបដល់ម្ចាស់រថយន្ដដឹកទំនិញគ្រប់ប្រភេទ និងម្ចាស់រថយន្ដដឹកអ្នកដំណើរដែលត្រូវចរាចរណ៍ចេញ-ចូលរាជធានីភ្នំពេញ ឆ្លងកាត់ទីតាំងរង្វង់មូលចោមចៅ ត្រូវពង្វាងចរាចរណ៍ទៅតាមបណ្តាលផ្លូវមួយចំនួន ក្នុងនោះរួមមាន៖ ចំពោះរថយន្ដចរាចរណ៍មកពីទិសខាងលិច តាមបណ្ដោយផ្លូវជាតិលេខ៤ ចូលរាជធានីភ្នំពេញ ត្រូវធ្វើដំណើរតាមផ្លូវពង្វាងទៅតាមផ្លូវបែកចាន បត់ស្ដាំទៅទិសខាងត្បូង ឬផ្លូវកប់ស្រូវ បត់ឆ្វេងទៅទិសខាងជើង។ ចំពោះរថយន្ដចរាចរណ៍ មកពីផ្លូវជាតិលេខ៣ ចូលរាជធានី ត្រូវធ្វើដំណើរតាមផ្លូវពង្វាង បត់ស្ដាំទៅតាមផ្លូវព្រៃស មុខវត្តស្លែង ឬទៅតាមផ្លូវទួលពង្រ បត់ស្ដាំតាមផ្លូវ៣០ម៉ែត្រ ឆ្ពោះទៅផ្លូវចោមចៅ។ ចំពោះរថយន្ដធ្វើចរាចរណ៍តាមផ្លូវចោមចៅ ចេញក្រៅរាជធានី ទៅផ្លូវជាតិលេខ៣ ត្រូវធ្វើដំណើរតាមផ្លូវទួលពង្រ បត់ឆ្វេងត្រង់ចំណុចស្ដុប។ ចំពោះការធ្វើចរាចរណ៍ពីផ្លូវចោមចៅ ឆ្ពោះទៅផ្លូវជាតិលេខ៤អនុញ្ញាតឲ្យចរាចរធម្មតា។
សូមបញ្ជាក់ថា ការសាងសង់ស្ពានអាកាស និងផ្លូវក្រោមដីរង្វង់មូលចោមចៅខាងលើនេះ នឹងប្រើពេលប្រមាណ៣០ខែ ដើម្បីបញ្ចប់ឲ្យបានរួចរាល់។ ក្រៅតែពីការសាងសង់ស្ពានអាកាសខាងលើ បច្ចុប្បន្នមន្ទីរសាធារណការ និងដឹកជញ្ជូនរាជធានីភ្នំពេញ ក៏បានកំពុងជួលជុលសាងសង់ពង្រីកផ្លូវជាតិលេខ៤ ឲ្យមានទំហំកាន់តែធំឡើងៗ ដោយមានការចាក់បេតុង និងអ៊ុតកៅស៊ូពង្រីកផ្លូវកាន់តែធំទូលាយ សម្រួលដល់ការធ្វើដំណើរទៅមក និងដាក់លូបង្ហូរទឹកចេញកុំឲ្យភ្លៀងលិច ផ្លូវដូចឆ្នាំកន្លងៗមកទៀត៕
Source: Kampuchea Thmey Daily
0 Comments