កងទ័ពបាននិយាយថាយន្តហោះចម្បាំងអ៊ីស្រាអែលបានវាយប្រហារគោលដៅចំនួន២៥នៅក្នុងតំបន់ហ្គាហ្សាស្ទ្រីបកាលពីព្រឹកថ្ងៃពុធ ដើម្បីឆ្លើយតបនឹងការបាញ់រ៉ុក្កែតពីដែនដីប៉ាឡេស្ទីន។
កងទ័ពបាននិយាយនៅក្នុងសេចក្តីថ្លែងការណ៍មួយថា រ៉ុក្កែតប្រហែល៤៥គ្រាប់ត្រូវបានបាញ់ពេញមួយយប់ចេញពីតំបន់ហ្គាហ្សាឆ្ពោះទៅកាន់អ៊ីស្រាអែល។ រ៉ុក្កែតចំនួនប្រាំពីរគ្រាប់ត្រូវបានស្ទាក់ចាប់ដោយប្រព័ន្ធការពារមីស៊ីល Iron Dome។
សេចក្តីថ្លែងការណ៍បានបន្តថា ជាការសងសឹក, យន្តហោះអ៊ីស្រាអែលបានបើកការវាយឆ្មក់ចំនួនបីលើកប្រឆាំងនឹងទីតាំងយោធាដែលជាកម្មសិទ្ធិរបស់ចលនាឥស្លាមនិយម ហាម៉ាស។
ការវាយប្រហារថ្មីៗនេះបានកើតឡើងខណៈមានភាពតានតឹងខ្ពស់នៅក្នុងតំបន់ហ្គាហ្សាបន្ទាប់ពីការតវ៉ាដ៏ធំនិងការប៉ះទង្គិចគ្នាដែលបានផ្ទុះឡើងនៅតាមបណ្តោយព្រំដែនកាលពីថ្ងៃទី៣០ខែមីនា។ ជនជាតិប៉ាឡេស្ទីនយ៉ាងតិច១៣២នាក់ត្រូវបានសម្លាប់។ ប៉ុន្តែមិនមានអ្នកស្លាប់ជាជនជាតិអ៊ីស្រាអែលទេ។
កងទ័ពអ៊ីស្រាអែលបាននិយាយថា “ក្រុមភេរវកម្មហាម៉ាសបានសំដៅលើជនស៊ីវិលអ៊ីស្រាអែលពេញមួយយប់ជាមួយនឹងការវាយប្រហារដោយរ៉ុក្កែតយ៉ាងខ្លាំងក្លាហើយកំពុងអូសទាញតំបន់ហ្គាហ្សាស្ទ្រីបនិងជនស៊ីវិលរបស់ខ្លួនឲ្យចូលក្នុងផ្លូវអន្តរាយ”។
ប្រទេសអ៊ីស្រាអែលនៅតែអះអាងថា ការប្រើគ្រាប់កាំភ្លើងពិតគឺជាការចាំបាច់ដើម្បីការពារព្រំដែនរបស់ខ្លួននិងបញ្ឈប់ការជ្រៀតចូល។ ខ្លួនបានចោទប្រកាន់មេដឹកនាំឥស្លាមនិយមហាម៉ាសរបស់ហ្គាហ្សាថាកំពុងព្យាយាមប្រើការតវ៉ានោះជាលេសសម្រាប់ការវាយប្រហារ។
អគ្គលេខាធិការអង្គការសហប្រជាជាតិលោក Antonio Guterres និងអ្នកពាក់ព័ន្ធអន្តរជាតិដទៃទៀតបានព្រមានថា តំបន់ហ្គាហ្សាគឺជិតធ្លាក់ចូលក្នុងសង្គ្រាមហើយ។
គួរបញ្ជាក់ថា ប្រទេសអ៊ីស្រាអែលនិងក្រុមហាម៉ាសបានប្រយុទ្ធគ្នាបីដងមកហើយចាប់តាំងពីឆ្នាំ២០០៨មក៕ AFP
Source: Kampuchea Thmey Daily
0 Comments