សៀមរាប ៖ រថយន្តម៉ាកនីសាន់មួយគ្រឿង បានហោះរំលងតូបលក់ ដែលគ្មានមនុស្សនៅមួយខ្នង ហើយប្រះខ្លួនទៅដេកត្រាំ ទឹកប្រឡាយទាំងព្រឹក ខណៈព្យាយាមគេចពីម៉ូតូដែលបត់ឆ្លងផ្លូវ ដោយច្រឡំជាន់ហ្គែថាហ្វ្រាំង។
ហេតុកាណ៍គ្រោះថ្នាក់ចរាចរណ៍នេះ បានកើតឡើងនាព្រឹកថ្ងៃទី២០ ខែមិថុនា ឆ្នាំ២០១៨ នៅលើកំណាត់ផ្លូវជាតិលេខ៦៨ ក្នុងភូមិកំពីងពួយ ឃុំក្រឡាញ់ ស្រុកក្រឡាញ់ ត្រង់ចំណុចអក្សរតេ ក្នុងដំណើរស្របទិសគ្នា។
សមត្ថកិច្ចបានឲ្យដឹងថា ក្នុងហេតុការណ៍នេះ មិនមានមនុស្សបាត់បង់ជីវិតនោះទេ ត្រឹមតែរបួសស្រាលភាគីម៉ូតូប៉ុណ្ណោះ។ ប្រភពបន្តថា អ្នកបើកបរម៉ូតូសេ១២៥ឆ្នាំ២០០៨ស្លាកលេខសៀមរាប 1E 7442មានឈ្មោះអ៊ី ទូច ភេទស្រី អាយុ៤៦ឆ្នាំ ជិះឌុបប្តីឈ្មោះអោម ឃៀន អាយុ៨១ឆ្នាំ ទីលំនៅភូមិចន្លាស់ដៃ ឃុំសំបួរ ស្រុកក្រឡាញ់ រងរបួស ស្រាល។ ចំណែកអ្នកបើកបររថយន្តម៉ាកនីសាន់ ពណ៌ទឹកប្រាក់គ្មានស្លាកលេខឈ្មោះជិន សុខហេង ប្រុសអាយុ៣១ឆ្នាំ និងអ្នករួមដំណើរឈ្មោះអឿត ស៊ីនួន ស្រីអាយុ២០ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប មិនមានការរងរបួសនោះទេ។
ប្រភពបន្ថែមថា ក្នុងខណ: ដែលម៉ូតូបើកស្របទិស ហើយបត់ឆ្លងផ្លូវ រថយន្តបានព្យាយាមជាន់ហ្វ្រាំងគេចពីម៉ូតូ តែច្រឡំជាន់ហ្គែ ធ្វើអោយរថយន្តហោះទៅប៉ះតូបលក់ក្បែរផ្លូវដែលគ្មានមនុស្សនៅ ហើយបន្តធ្លាក់ចូលប្រឡាយ ដេកត្រាំទឹកធ្វើឲ្យម្ចាស់វង្វេងស្ទើរមិនដឹងលិចកើតទាំងពីរនាក់។ តែសំណាងមិនបង្កគ្រោះថ្នាក់ដល់ជីវិតទាំងសងខាង ខណៈនេះ សមត្ថកិច្ចបានស្ទូចរថយន្តយកទៅកាន់អធិការស្រុកដើម្បីដោះស្រាយ៕
Source: Kampuchea Thmey Daily
0 Comments