អាជ្ញាធររាជធានី កាយសំរាម និងព្រៃនៅប្រឡាយស្ទឹងមានជ័យរហូតដល់ប្រឡាយដើមស្លែង បានជាង៣០០ម៉ែត្រហើយ ខណៈជួបឧបសគ្គរាំងស្ទះផ្ទះរំលោភលើប្រឡាយ

ភ្នំពេញ ៖ អាជ្ញាធររាជធានីភ្នំពេញ កាយសំរាម និងព្រៃនៅប្រឡាយស្ទឹងមានជ័យរហូតដល់ប្រឡាយដើមស្លែង ក្នុងភូមិសាស្ត្រខណ្ឌមានជ័យនិងខណ្ឌសែនសុខ បានជាង៣០០ម៉ែត្រហើយ ដើម្បីរំដោះជំនន់ទឹកភ្លៀងនៅរដូវវស្សានេះ។

លោកដួង ចាន់សារ៉ាត់ប្រធានអង្គភាពលូទឹក បូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញ បានអោយដឹងថា អនុវត្តតាមការណែនាំពីរដ្ឋបាលរាជធានីភ្នំពេញ ក្រោមការដឹកនាំរបស់លោកឃួង ស្រេងអភិបាលរាជធានីភ្នំពេញបានអោយមន្ទីរមន្ទីរសាធារណការ និងដឹកជញ្ជូនរាជធានីធ្វើការកាយសំរាមនិងព្រៃនៅប្រឡាយស្ទឹងមានជ័យរហូតដល់ប្រឡាយដើមស្លែង ក្នុងភូមិសាស្ត្រខណ្ឌមានជ័យនិងខណ្ឌសែន សុខ ដើម្បីរំដោះជំនន់ទឹកភ្លៀងជូនប្រជាពលរដ្ឋនៅរដូវវស្សានេះ ដោយមកដល់ពេលនេះសម្រេចជាង៣០០ម៉ែត្រហើយ។

លោកបន្តទៀតថា ការ កាយសំរាមនិងព្រៃនៅប្រឡាយស្ទឹងមានជ័យរហូតដល់ប្រឡាយដើមស្លែងនេះ បានជួបឧបសគ្គច្រើន ដោយសារតែផ្ទះប្រជាពលរដ្ឋសាងសង់លើប្រឡាយតែម្តង។ បញ្ហានេះលោកថា ទុកតួនាទីអោយអាជ្ញាធរខណ្ឌនិងរាជធានីចាត់ចែង ទើបអាចបន្តការងារនេះទៀតបាន។

លោកបានបញ្ជាក់អោយដឹងថា សកម្មភាពការងារនេះ បានចាប់ផ្តើមកាលពីថ្ងៃ២៣ ខែឧសភា ឆ្នាំ២០១៨ ដោយចាប់ផ្តើមពីការដ្ឋានបុកស៊ីផាយប្រឡាយស្ទឹងមានជ័យដល់ប្រឡាយដើមស្លែង ដែលមានប្រវែង១៤៩៨ម៉ែត្រ។ ក្នុងនោះការដ្ឋានជំហានទី១ ប្រឡាយស្ទឹងមានជ័យស្ថាបនាបានប្រវែងជា៣០០ម៉ែត្រហើយ នៅសល់ជាង១០០០ម៉ែត្រ ក្រុមការងារយើងធ្វើការកាយសំរាមនិងព្រៃ ដើម្បីរំដោះទឹកជាបណ្តោះអាសន្នសិនមុនការដ្ឋាននេះបន្តជាជំហានៗ មកដល់ប្រឡាយដើមស្លែងនេះ។

មន្ត្រីរដ្ឋបាលរាជធានីភ្នំពេញបានបញ្ជាក់ផងដែរថា ការកាយសំរាមនិងព្រៃនៅប្រឡាយស្ទឹងមានជ័យរហូតដល់ប្រឡាយដើមស្លែងនេះ ពិតជាបានជួបនៅផលលំបាកច្រើនដោយសារតែប្រជាពលរដ្ឋមួយចំនួន ពួកគាត់សង់ផ្ទះឈើនៅលើពោះប្រឡាយតែម្តង ដែលធ្វើអោយយើងមិនអាចដាក់គ្រឿងចក្របណ្តែតទឹកកាយយកសំរាមបាន ហើយវិធីដែលយើងអាចធ្វើបានមានតែប្រើទូកនិងកាយដោយដៃប៉ុណ្ណោះ ។
គួរបញ្ជាក់ថា នៅតំបន់ស្ទឹងមានជ័យ រដ្ឋបាលរាជធានី បាននិងកំពុងស្ថាបនាប្រឡាយស្ទឹងមានជ័យមានប្រវែង១៤៩៨ម៉ែត្រ ដោយចាក់បេតុងបុកស៊ីផាយ ទទឹង៨ម៉ែត្រ ហើយគម្រោងនេះ ត្រូវបានបែងចែកជា៤ដំណាក់កាល។ ក្នុងនោះដំណាក់កាលទី១ មានប្រវែង៣២៦ម៉ែត្រ សងខាងប្រឡាយសរុបប្រវែង៦៥២ម៉ែត្រ ហើយក្នុងជំហានទី១នេះ រដ្ឋបាលរាជធានីបានសម្រេចចាប់ឆ្នោតប្រគល់ដីជូនប្រជាពលរដ្ឋដែលរស់នៅលើប្រឡាយនេះ១៥២គ្រួសាររួចហើយដែរ កាលពីប៉ុន្មានថ្ងៃមុននេះ។

ប្រឡាយស្ទឹងមានជ័យដែលរដ្ឋបាលរាជធានីភ្នំពេញបាននិងកំពុងធ្វើការអភិវឌ្ឍនេះឆ្លងកាត់ខណ្ឌចំនួន២ គឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនឹង៦ម៉ែត្រជាកម្មសិទ្ធិស្របច្បាប់នៅនឹងកន្លែងតែម្តង។

ប្រឡាយស្ទឹងមានជ័យ បានដើរតួយ៉ាងសំខាន់ ក្នុងការនាំទឹកទម្លាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្ចើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕